MPL U18-ah BVT champion

Bethlehem Vengthlang FC-in an club history-a vawi khat nan Flying Christabel Mizoram Premier League Under 18-ah an champion.

November 22, Thawhlehni zan final-ah BVT-in minute 86-naa K. Lalmalsawma (Buangpuia) penalty hmangin Chanmari West FC an hneh. Champion team hi khelmual chhungah an chungnung zawk lo mah se khelmual pawnah erawh Chanmari West-in an tluk lo a, Bethlehem Vengthlang mipuiin nomawi an au chhuak.

BVT hian fair play award an dawn bakah captain PC Laltlanhlua chu best defender-ah thlan a ni a, penatly hlawh chhuaktu Joel Lalmuanpuia chu best forward-ah thlan a ni bawk. Champion tura rinkai zawk Chanmari West-in mimal lawmman pathum an hui tho a, kumin MPL U18-a goal 10 khungtu Lalenkawla chu top scorer a ni. Chanmari West captain Lalrinpuia chu best midfielder-ah thlan a ni a, keeper Lalrinchhana chu best goalkeeper-ah thlan a ni bawk.

Goal khat chauh
Final a nih tawh avangin team pahnih an fimkhur tih a chiang a, goal chance a tam lo.

Chanmari West chungnung hret mah se BVT lamin goal chance an nei hmasa a, minute 19-naah attacking midfielder Lalchhanchhuaha’n (Bawihtea) chance nei mah se West Warrior an inrawlh hman. Hemi hnu lawk hian BVT right winger Lalawmpuia chuan a kut hmangin goal chance a insiam a, referee-in chiang taka a hmuh avangin yellow card pek a ni.

West Warrior-in BVT defender Lalmalsawma ball pet sual vangin chance an nei a, forward C. Lalthansanga aiin BVT keeper Ramdinzela’n ball a nangching hmasa zawk. First half tawp hma hretin halfway line pelh hret atanga Lalruatpuia freekick pet chu Lalenkawla’n goal-ah a chantir thei lo a, MPL U18 top scorer Enkawla freekick pet hi BVT keeper Ramdina’n a dan sak bawk.

Second half-ah Enkawla’n BVT winger Amma tih dan ang thoin a kut hmangin ball lakluh a tum a, referee-in hrem loin a chhuah lo. Serchhip rawlthar Enkawla freekick pet a hlauhawm a, forward Sanga freekick-in crossbar a per bawk – Chanmari West vanneih zan a ni lo.

Hun tawp hma minute nga chiah a awm tawh tihin Joel-a ball lalut tur chu West Warrior defender Lalruatpuia’n a titlu a, penalty a chawi. BVT senior tan pawha inlan tawh Buangpuia lo pen chhuakin best keeper a thlan zui tak Lalrinnunga a bum a, chakna goal a ni zui bawk.

Eng nge an sawi?
Chanmari West coach Lalramhluna chuan, “BVT kan tum hmasak ang kha chu an ni tawh lo a, player checking-ah an fimkhur tawk lo ka ti. Ka naute khelh danah ka lawm a, penalty thutluknaah sawisel tur ka hre lo. Kan vanduai a ni,” tiin ZoFooty palai a hrilh.

BVT coach Benjamin Lalhriatpuia chuan, “Vengchhung mipuiin min tawiawm tha a, a vannei zawkah kan tan avangin kan lawm takzet,” tiin an champion avanga a lawm thu a sawi.

BVT U18 boss Benja chuan sawi chhunzawmin, “Chanmari West kan hmachhawn hmasak tum khan exam vangin naupang pathum kan chhawr lo a, tunah chuan kan tha tawh zawk a ni. Heng naupang te hi checking paltlang vek an ni a, tih dik loh kan nei lo,” tiin thiam lohna an neih loh thu a sawi.

Lawmman
Fair Play : Bethlehem VT
Top Scorer : Lalenkawla, CWFC (10 Goals)
Best Forward : Joel Lalmuanpuia, BVT
Best Midfielder : Lalrinpuia, CWFC
Best Defender : PC Laltlanhlua, BVT
Best Goalkeeper : Lalrinchhana, CWFC