MPL5-ah Chanmari FC an champion


Mizoram Premier League Season 5 khelh zawh a ni ta a, Chanmari FC chuan si thum faia Bethlehem Vengthlang FC hnehin an champion.
December 16, Zirtawpni zanah Chanmari tan hian Ugochukwu Godswill, Vanlalbiaa leh R. Malsawmtluanga ten goal khat theuh an khung a, 3-0 in hnehna an chang.

Inkhel hmuhnawm
Chanmari hian a tir atanga a tawp thlengin inkhel hmuhnawm an entir a, chak an phu. Minute 32-naah Msa corner pet chu Ugo-a’n a head goal. Minute 55-naah MS-a freekick pet atangin Chanmari FC-in goal hnihna an khung a, goal khungtu chu Mabiaa a ni. An goal thumna pawh Msa thun niin Msa hi a che tha hle a, final zanah player langsar a ni.

Chak phu Chanmari
Chanmari hian chak an phu a, game an thununin inkhel hmuhnawm tak min entir. An goal thun bakah hian Sawmfela hian goal ban a pet per a, a hnuah Mala dan turin ball tha a pet bawk. Hei mai bakah hian an chhuanvawr Dodoz chuan goal thun ngei theihna tur chance tha a hloh a, substitute Rammawia ball pek tha chu Mabiaa’n lain Dodoz a pe a, Ivorian forward-in goal-ah a chantir thei lo. Hun tawp dawn hnaiah Mabiaa pass tha chu Sawmfela’n a thun mai dawn emaw tih hnuah a pet goal lo bawk.

BVT an vanduai
BVT an khelchhe lo a, goal-ah an vanduai kan ti thei ang. Goal thun lo mah se Chanmari tlarhnung an tibuai ve hle a, tan atanga minute thum lekah Hmingtea freekick chu Dinpuia’n tauhin Chanmari goalkeeper Muanawma’n a nam per hman a, Sangkima pass tha tak mai Mawitea’n a lak, Dina Varte-in a pet goal loh te chu goal khung theihna tur a ni.

First half-ah Mawitea chuan chance tha uiawm takin a hlah a, Dina varte-in goal kham a pet per hnuah Mawitea chuan a chhuah ho hle bawk. Chanmari keeper Muanawma a che tha a, goal khat leka hma an hruai laia BVT midfielder Zosangkima ball tauh goal ngei tura ngaih a dan chu Chanmari chakna chhan pakhat a ni.

Sawi belh ang
A tir atangin final game ropui kan hmu a, player-ten goal thun tumin long shot ropui tak tak kan hmu nghal a, Chanmari FC-in goal an thun hma kha chuan team pahnihte attacking game (game open tak) kan hmu a, inkhel hmuhnawm tak a ni. Chanmari lamin goal an thun hnu atangin game tempo a muang nghal a, BVT FC player te CFC game-ah an lut a ni ber e. CFC player te an khel tha tlang a, an thawkrim zawk bawk. Chanmari player-ten full pressure an pekin defence pahnih chiahte an awm thin a, BVT lam counter attack goal khungna tur khawpin a na tawk lo.

BVT FC-in winger ah player tlan chak tak tak an neih lai a, counter attack an neihin center-ah ball an la lut hmasa thin a, winger atang ball la hmasa se an tihfuh zawk a rinawm.

Bethlehem Vengthlang player-ten tih fuh loh lian tak an neih chu open play ah foreign player-te nen inang tlang viau mah se, palian leh chak zawk an ni a, setpiece-ah BVT FC player ten man marking an neih tha tawk thin lova, Chanmari goal hnih luhnaah hian corner atang ball lo kal ve veah foreign player ten hriatreng tur thil an hnuhchhiah. MPL season 5 thlahna R.Malsawmtluanga goal erawh sawi hmaih phal a ni lo. Goal ropui a ni. Best midfielder nominee-a a tel lo hi a mak a ni.

BVT FC tan Samson Ramengmawia a khel tha leh em em a, Sangkima erawhin beisei a pha lo tluan. BVT coach BS-a’n a thlak har niin a lang.. Inkhelh pum thlirin chak phu zawk an chak kan ti thei anga, R.Malsawmtluanga’n goal ropui tak hmangin inkhel MPL5-a thlah liam a, a tawp a LilZo zaiin mipui min thlah liam. Seng seng seng MFA-in rilru an seng , Leng leng leng football fan-te tan lung a leng dawn em mai.

Tute nge khel?
Chanmari FC (4-4-2) : F. Lalmuanawma; C. Lalrosanga, Ugochukwu Godswill, Lalrinchhana Tochhawng, Ramfangzauva; Vanlalbiaa Chhangte, R. Malsawmtluanga, Lalrinchhana, Leonce Dodoz (Rochhingpuia 90′); Lalruatfela Zote (Lalrammawia 19′), Malsawmfela (Lalmuanzova 80′)
Sub tluan : MS Dawngliana, C. Vanlalhriatpuia, MS Dawngzela, Thasiama, Rosangliana, Francis Rambeiseia.

Bethlehem VT (4-4-1-1) : Malsawmdawngzela; K. Lalmalsawma, H. Lalhlimpuia, Zothanpuia, Hmingthanmawia; Laldinliana Varte (R. Lalrinsanga 75′), Zosangkima (Lalmawizuala 83′), Samson Ramengmawia, Lalnunmawia; Lalrammuanpuia; PC Laldinpuia (PC Zosanga 75′).
Sub Tluan : Lalmuansanga, Lalhruaitluanga, B. Zothanmawia, Laldingngheta, Lalrintluanga, Lalzatluanga.
ZoFooty Statistics
Chanmari FC 3 – 0 Bethlehem VT
CFC : Ugochukwu Godswill 32′; Vanlalbiaa 55′; R. Malsawmtluanga 90+2′
49% Ball Possession 51%
18 Shots 14
6 On Target 6
4 Yellow Cards 3
0 Red Cards 0
Powered by Rainbow Multibrand Mobile Showroom