MPL6 : A HUN NGAI AH, A HMUN NGAI AH

McDowells Soda No.1 Mizoram Premier League Round 8 Thuamluaia Mual, Lungleia khelh mek chu naktuk hian chhunzawm leh a ni dawn a, chawhma dar 11:30 ah Chanmari West FC leh Dinthar FC an inhmachhawn ang a, chawhnu dar 2:15 ah Mizoram Police FC leh Aizawl FC te’n chak zawk nih an inchuh bawk ang.

Vawiinah Thuamluaia Mualah mipui thahnem tak an pungkhawm a, Leitlangpuiah tualchhung football ngainatute an tlem lo hle. Naktuka inkhel turte hi team intiat tlang tak an nih avangin an khel hmuh a chakawm tawh hle.

Aizawl West Derby

MPL table kan en chuan team pariat zingah a hnuai berah Dinthar FC an awmin Chanmari West hi pangana ni mahse team pahnihte inthlauhna hi point thum chauh a ni.

Phase 1 ah Aizawl tlak lam team pahnihte hi 1-1 in an inhnehtawk a, kha inkhelah khan Dinthar in hnehna an chang mai dawn emaw tih hnuah injury time ah H.Lalhlimpuia’n an siphurh a sut a, Lunglei tlangval hi man of the match atan thlan a ni zui bawk.

Chanmari West hian goal thun lama an harsatna su kiang turin Aizawl FC atanga an lak thar forward Vanlalduatsanga chhawr theihin an kawl a, West Warriors hian game 7 ah goal 7 chauh la thunin MPL6 ah goal thun tlem ber an ni.

Dinthar FC lamah an coach thar Vanlalrova chu mipui mit fukna tur a ni a, Luangmual FC leh Zo United coach hlui hian a game hmasa berah chak lo a bul tan a duh lo ang. Rova hian a player lakthar zingah defender Lalthawmmawia a chhawr dawn tih Zofooty.com a hrilh tawh a, ani hi Luangmuala a chhawr hrep tawh a nih avangin player tangkai a ni thei ang.

Mizoram Police vs Aizawl FC

Tum dang ang chu nise a chak zawk tur a hriat mai. Amaherawhchu Lalbiaksanga Colney in Mizoram Police a enkawl hnuah harhtharna an chang a, hnehna a la chan pui ve ve.

MPL6 a goal la chhuah hnem ber Police hian goal thun pawh an thiam a, goal 12 thun tawhin anni aia goal thun hnem chu Aizawl FC (13) leh Chhinga Veng FC (20) chiah an ni. An buaina ber an tlarhnung hnawhphui turin Ramhlun North atangin Toky Zomuanpuia an lalut a, left-back tha thin C.Zomuanpuia an nei tawh bawk.

Tunhnaia an game hnuhnung pahnihah goal 6 an thun thei a, Phase 1 ah I-League champion lakah hian 6-1 ngawtin tlawm tawh mahse an phur vanglai tak a ni a, team hmachhawn chakawm loh ber pawl an ni mek.

Aizawl FC hian an game hnuhnung berah BVT an hneh zo lo a, an hnuaia awm Ramhlun North in vawiinah hnehna an chan bawk si avangin semi-final an lut duh a nih chuan chak an mamawh hle.

I-League champion hian MPL a tawnhriat nei tha an captain Alfred Jaryan leh defender ball pet thiam Kareem Omolaja te aiah an player thar pahnih Romanian midfielder Andrei Ionescu leh Afghanistan defender Masih Saighani te an ziak lut.

Kum 29 a upa PSV Eindhoven Academy ah te pawh lo awm tawh Ionescu hi an ram club tha Steaua Bucuresti tan pawha Europa League lo khel tawh a ni a, feet 6 leh inchi 2 a sang Saighani hian ram tan vawi 11 a khel tawh bawk.

(Pic : MPL table thar ber)