MPL6 : AIZAWL FC LEH POLICE INTHATHEN

Vawiin tlaia Mizoram Premier League Round 8 inkhel hmuhnawm takah Aizawl FC leh Mizoram Police 2-2 in an inhnehtawk. He inkhelah hian Mizoram Police striker F.Lalrinpuia chu man of the match atan thlan a ni.

Inkhelh hma boruak

Dinthar FC in hnehna an chan avangin point 8 hmu in Aizawl FC an hnaih chho a, point 9 hmu tawh Aizawl FC tan semi-final an lut duh a nih chuan chetsual a thiang lo.

Point 7 nei mek Mizoram Police in an chetthat chhunzawm tumin an player thar pahnih C.Zomuanpuia leh Toky Zomuanpuia te bul an tan tir a, Aizawl FC in a vawikhat nan Afghanistan defender Masih Saighani leh Romanian midfielder Andrei Ionescu te tualchhung football-ah an phochhuak bawk.

Chetsual a pawi

Aizawl FC in inkhel an thunun zawk niin a lang a, goal hmaah erawh Mizoram Police an hlauhawm zawk.

Paulo Menezes a naute tan defender thar Masih Saighani an tlarhnung atangin ball a sem chhuak nasa a, an hmatawngte’n hmawr an bawk tha thei lo.

Police tan Valpuia corner pet atangin F.Zosanglianan hnai set sawt atanga a pet chu Avilash Paul an tha takin a lo dang a, hemi hnu lawk hian Aizawl FC siban nghaktu hi inhliam vangin lakchhuah a ni.

Feet 6 leh inchi hnih a sang Saighani chetsualah Sangberan goal a thun thelh a, minute 41-naa Police defender B.Zoramthanga chetsualah erawh goal a lut.

B.Sena hian anmahni box chhungah ball tauh thelhin keeper Tpa’n a man mai dawn emaw tih hnuah a kapkarah a lut ve leh a, ball umtu William Lalnunfela’n Aizawl FC hmahruai nan awlsam takin a thun.

Police nge nge

Second half ah Mizoram Police in chance an nei lehnghal a, Puitea chetsual chu F.Zosanglianan a hmang tangkai zo lo a, ITI Veng tlangval hian a hnuah half chance tum thum vel a thelh bawk.

Aizawl FC in inkhel an thunun telh telh a, Rinzuala ball vawrh luh Mka tauhin goal kham a per hnu lawkah Romanian midfielder Andrei Ionescu chuan box chhungah Police defender te a bum hnuah mawi takin a pet lut.

Mizoram Police in an siphurh sut tumin Toky Zomuanpuia lachhuakin striker C.Lalnunmawia an luhtir a, goal an hlawhchhuah ta nge nge. Minute 78-naah lut thar Nunmawia leh Tri-a te an in ‘one two’ hnuah box chhung atangin kawh zetin Biaktea’n goal a thun.

Thuamluaia Muala entu mipui tam tak karah Aizawl FC in point thum an hlawhchhuak mai dawn emaw tih hnuah F.Zosangliana a lo lang a, hun tha a hlah ngat ngat hnuah minute 89-naah an siphurh sut nan box chhung atangin chiang zetin a pet lut a, goal dang a luh belh lo.

Chik zawkin

Tum dang ang lo takin Police in si an phurh hnuah an la tang thei a, chutih laiin an captain V.Laltanpuian red card a hmu lo erawh a vannei hle. First-half a chance an hlah te kha thun ngat se chu inkhel result a danglam thei bawk.

Lalfakzuala awm lo mahse F.Lalrinpuia leh Aizawl FC defender te inveng vel a hmuhnawm a, fak phu ber erawh an coach Lalbiaksanga Colney a ni. Bsa hnuaiah game 3 khelin point 7 an hlawh tawh.

Aizawl FC in an player thenkhat siksawiin K.Lalthathanga chu left-back ah an dah a, second-half ah vawi tam tak Police hmatawngte an talput. Phase 1 a Police laka hattrick siam tawh Rochharzela hmuh tur a awm lo a, bench atanga lut te danglamna siam tur khawpin an khel ropui lo bawk.

An player ziah luh thar pahnih Masih Saighani leh Andrei Ionescu te an khel chhe lo a, a bik takin Romanian midfielder hi second-half ah a langsar hle.

Goal hnih an thun zet hnuah point khat chauh an hlawhchhuah avangin Aizawl FC tan result lawmawm a ni lo a, chutih rualin Police khelh dan en chuan result fair tak niin a lang.

ZoFooty Statistics :

Mizoram Police FC 2-2 Aizawl FC
Lalbiakhlua 78′ F.Zosangliana 89′- William Lalnunfela 41′ Andrei Ionescu 55′

45% Ball Possession 55%
19 Shots 19
6 On Target 13
2 Yellow Card 1
0 Red Card 0
MoM : F.Lalrinpuia (MPFC)

Powered by : Rainbow Multibrand Mobile Showroom