MPL6 : AIZAWL WEST DERBY – AH CHAK ZAWK AWM LO

Manchester derby a ni emaw, Merseyside derby a ni emaw, Kolkata derby pawh nise ‘derby’ a nih tawh phawt chuan boruak a te ngai lo. Zanina MPL6 a Aizawl West derby kan hmuh hmasak berah Dinthar FC in an goal thun an hum zo lo a, Chanmari West FC nen 1-1 in an inhnehtawk.

Tute nge khel ?

Dinthar FC (4-3-3) : Malsawmdawngzela; R.Lalthantluanga, Lalnunpuia, Malsawma Chhangte, Lalbiakzuala; Lalbiakhlua, Clarence Carter, Lalbiaknia Pautu; David Lalrinchhana, Jackson Victor, Lalramliana (Samuel Laltlanthanga 90+3’)

Subs : David Lalrinpuia, Lalbiakthara, Zothanzuala, Vanlalchhanhima Sailo, Stephen Lalnunmawia, H.Malsawmtluanga, Samuel Laltlanthanga, Lalnunsanga, Lalmalsawmtluanga

Chanmari West FC (4-2-3-1) : Lalmalsawma Hmar; Lalmalsawma (Tlangthanpuia 87’), Ronald Zothanzama, H.Lalhlimpuia, Vanlalnghenga (Calvin Zonunsiama 87’); Lalromawia, Jacob Lalrawngbawla; Lalremruata, Lalnunmawia, Vanlalthlamuana; H.Lallianzama (R.Lalthanmawia 62’)

Subs : J.Vanlalhriata, H.Lalruatkima, Calvin Zosangliana, Lalengmawia, Lalrintluanga, David Lalnunfela, JH Lallawmkima, R.Lalthanmawia, Tlangthanpuia

Derby nge nge !

First-half ah inkhelin beisei a pha lo a, minute 39-naah David Tlau-a’n dinglam kil atanga a ball vawrh chhoh tha tak chu an game hnuhnung ber a penalty chawitu Lalnunpuia’n Dinthar hmahruai nan a tauh lut. Team pahnihte hi an inbuktawk hle a, Chanmari West lamah an captain Mawitea’n half-chance nei thin mahse a vanneih ni a la inhrechhuak lo a, MPL6 ah goal a la thun lo.

Dinthar lamah Jackson Victor-a khel chhe lo a, chutih rualin inkhel pumpui thlirin nidang a pha lo deuh niin a lang. Minute 60-naah Chanmari West in ‘penalty shout’ an nei a, referee a ngawi. Hemi hnu lawk hian Mawitea’n box chhungah chance nei leh mahse ball a tauh na tawk lo.

Si phur zawk Chanmari West fans te a au ring zawk an ni a, Dinthar in point thum hmuhna hun tha an neih chu minute 78-naah a thamral. Jackson Victor-a penalty hlawhchhuah pet turin captain Malsawma Chhangte a rawn pen chhuak a, keeper veilama a pet chu siban nghaktu Lalmalsawma’n a ben per sak.

Inkhel boruak a sang a, player te an indim lo sawt hle. Minute 88-naah bench atanga rawn lut hlim Calvin Zonunsanga’n an siphurh sutna hun remchang nei mahse corner atanga ball lokal chu goal kham chungah a pet. Dintharin a zawnin hnehna an chang mai dawn emaw tih hnu injury time-ah Dinthar player tul lo takin a ‘foul’ a, ball pet thiam Jacob Lalrawngbawla rawn pen chhuakin a free-kick pet chu box chhunga lo awm H.Lalhlimpuia’n an siphurh sut nan a tauh lut a, West Warriors an sapatal.

Hun a tawp zui a, inkhelh tirh lamin beisei angin mipui mit fah lo mahse Lammual inkhel en haw te’n “derby nge nge” an ti haw ngei ang.

ZoFooty Statistics :
Dinthar FC 1-1 Chanmari West FC
Lalnunpuia 39′ – H.Lalhlimpuia 90+5′

47% Ball Possession 53%
8 Shots 13
2 On Target 7
4 Yellow Card (s) 2
0 Red Card (s) 0
Man of the match : H.Lalhlimpuia (CWFC)