MPL6 : BVT IN POINT THUM HMU

Hun pangngai minute 5 chauh awm tawha Vanlalzuia Hnamte free-kick mawi zet hmangin Bethlehem Vengthlang FC in Ramhlun North FC 2-1 in an hneh a, point 8 hmuin table ah pathumna an ni ta.

He inkhelah hian Laldinliana Varte chuan BVT hmahruai puiin hei hi Lalremruata’n Ramhlun North tan a sut a, minute 85-naah Zuia Hnamte hian BVT chakna goal a thun a ni.

Tute nge khel ?

BVT FC (4-2-3-1) : Lalruatpuia; Israel Laldingngheta, MS Dawngzela, P.C.Laldinpuia, Vanlalzuia Hnamte; K.Lalnunzama, Lalnuntluanga; P.C.Lalthazuala (Joel Lalmuanpuia 70′), Vanlalthanga, Laldinliana Varte (Edenthara 90+1′); Ramengmawia (Lalmawizuala 78′)

Subs : K.Lalruattluanga, C.Vanlalhmangaiha, B.Zoramthara, Lalmawizuala, Laltlankima, Lk.Hmangaihzuala, Edenthara, Lalruatkima, Joel Lalmuanpuia

Ramhlun North FC (4-1-4-1) : Lalrinhlua; Malsawmtluanga Ralte, Lalfelpuia, Toky Zomuanpuia, Lalmuanawma (Jessy Vanlalmuana 85′ ; C.Ramdinmawia; Rosangliana, Harry Delano (Lalmuansanga 64′), Lalramzauva Khiangte, Lalrinfela; Lalremruata

Subs : Liansangpuia, Lalmuansanga, Jessy Vanlalmuana, F.Vanlalruata, Liandawngliana Colney, Liansiama, Lalrinawma, R.Lalmalsawma, Lalhmunsiama.

BVT an vannei

Team in tluk tawh taka ngaih pahnihte inkhel hi first-half ah game dul deuh mahse second-half ah game a nung tha hle. Ball chang tam zawk Ramhlun North in minute 10-naah Lalremruata hmangin hun tha an nei a, passing mawi taka BVT tlarhnung an thiah hnuah Remruata hian goal zawnah a pet thei lo.

BVT ball vawrh luh hlauhawm lem loh takah Ramhlun North defender Toky Zomuanpuia a chesual a, ball per lo changtu Dina Varte in minute 16-naah BVT hmahruaina goal a thun.

Ramhlun North lamin an winger Lalrinfela hmangin half-chance nei thin mahse an siphurh an sut thei lawk lo.

Half-time laiin Samson Ramengmawia’n a naute a fuih tha tih a lang a, minute 46-naah captain Ramdinmawia’n box pawn hret atanga a pet chuan goal kham fuhin he mi lo let leh hi Lalremruata’n an siphurh sut nan goal-ah a thun.

Inkhel a nung a, Ramhlun North in inkhel thunun zawk mahse BVT lamin an rum thaih ve reng a, Zuia Hnamte cross Vanlalthanga’n a ke veilama a pet keeper Muanawma’n a lo ben chhuah te chu uiawm tak a ni.

Chutah le, minute 65-naa Ramhlun North tan Rosangliana’n dinglam kilah ball tha zeta tlanpuiin box chhungah a vawrh thla a, pen hnih vela hla atanga an goal hmasa thuntu Remruata’n a tauh pial a, goak sirah a kal.

Team pahnihte an inhnehtawk mai dawn emaw tih hnu, minute 85-naah BVT in box pawn dinglam kil atanga free-kick an hmuh chu Zuia Hnamte in far-post ah petin Muanawma lo inkham zawk mahse dan theih a ni lo. Hun tawp thlengin goal dang a luh belh lo a, BVT in point thum an hawn ta a ni.

Sawi zui ang

BVT in an match hnuhnung berah Chhinga Veng hneh lo mahse Ramhlun North an hneh leh tak avangin game 5 ah vawikhat chauh an la tlawm a, record chhia a ni lo. Karleh match pawimawhah Chanmari FC an hmachhawn dawn a, hrem tuar an coach Chawngthansanga’n a ho theih tawh dawn avangin an phur khawp ang.

Ramhlun North hian player nei chhelo mahse an player lak thenkhat fuh lo an awm niin a lang. An foreigner Harry hi Chanmari FC an hneh loh tumin minute 60-naah lakchhuah a ni a, vawiinah lakchhuah ngai khawpin a khel ropui lo bawk.

An player pawimawh pahnih Lalliansanga(Notea) leh V.Lalchhuanawma te inhliam chhuanlam tur nei bawk mahse a match hmasa pahniha point 4 hmu thei khan match hnuhnung pathumah point khat mah an hlawhchhuak thei lo.

Karlehah hneh loh la nei lo Chhinga Veng an hmachhawn dawn a, October thla player transfer huna insiamrem dan tur ngaihtuah a hun tawh viau e.

ZoFooty Statistics:

Bethlehem Vengthlang FC 2-1 Ramhlun North FC
Laldinliana Varte 16′ Vanlalzuia Hnamte 85′ – Lalremruata 46′

44% Ball Possession 56%
10 Shots 15
7 On Target 6
2 Yellow Card 2
0 Red Card 0
MOM : P.C.Laldinpuia (BVT FC)