MPL6 : CHHINGA VENG CHAK TLUANG LAI TITAWPTU AIZAWL FC

Zanina Mizoram Premier League inkhel hmuhnawm takah tun season a vawi 14 chak zawn tawh Chhinga Vengin point thum an hmu zo lo a, I-League champion Aizawl FC nen 2-2 in an inhnehtawk. He inkhelah hian Chhinga Vengin Malsawmfela leh Lalhriatrenga te ‘own goal’ hmangin goal an nei a, Aizawl FC tana goal thuntu te hi K.Lalthathanga leh Jonathan Lalrawngbawla an ni.

Inkhel hmuhnawm chu

Inkhel tan atangin game a tang nghal a, minute 3-na lekah S.Malsawmtluanga free-kick hlawh chu David Lalrinmuana’n a pet over hlauh. Chhinga Veng FC in an nawr let nghal a , free-kick leh corner te an hmuh zawn hnuah, box pawna free-kick an hmuh chu Malsawmfela’n minute 7-naah mawi takin a pet lut. Replay ennawn leh chuan Aizawl FC keeper Avilash Paul-a’n wall a siam thiam tawk loh a tuar niin a ngaih theih. Ramhlun South tlangval hian Aizawl FC player pahnih inkarah kawt zetin a pet a, Avilash-a tan ban phak mai ni mahse a dang zo lo.

Si an phurh hnuah Aizawl FC an talbuai mai duh bik lo a, an Portuguese coach Paulo Menezes zirtir angin ‘passing game’ khelh zel an tum. Laldampuia’n free-kick atanga Chhinga Veng goal hnihna a thun tep hnu lawk minute 19-naah dinglam kil atanga Rochharzela ball vawrh chu box chhungah changtu nei lo K.Lalthathanga (Puitea) an an si phurh sut nan chiang zetin a pet lut.

Tun season a la chak fai vek Chhinga Vengin Aizawl FC right-back Rinzuala tlanchhuah apiangin remchanna lei tumin an nawr thin. Minute 37-naah Vanlallawma’n Kareem-a tlanpelin box chhungah a vawrh lut a, Aizawl FC defender Achia’n an lamah a ti lut palh. 2-1 niin first-half a tawp.

Second-half ah Aizawl FC an insiamtha a, Lammuala Chhingcows aia thawm nei ring zawk Red Army te beidawnga haw tir an tum lo. Minute 49-naah dinglam kil atanga Rochharzela cross ball tha tak chu Jonathan Lalrawngbawla’n an siphurh sut nan nalh zetin a tauh lut. Chhinga Veng FC defender Mapuia leh Dinliana te’n an tihtur an ti lova, an pahnih in Jojo kha feet 4 vel ve ve in an hlat.

Ball chang hnem zawk Aizawl FC tan minute 60- naah David Rinmuana’n magic show a nei a, rangtakin ball herpuiin Chhinga Veng FC defender a bum hnuah goal-ah thatakin a pet a, Chhinga Veng FC goalkeeper T.Mawia’n thatakin a lo namchhuak thei hlauh. Chhinga Vengin a zawna vawi 15 chak an tum tih entirin an striker Mapuia pawtletin Malsawmfela’n tlarhma a luah a, hemi hnu hian bench atangin Dawngtea, Dingngheta leh Apuia te an luhtir bawk.

Team pahnihte’n goal thun belh tumin an innawr tawn a, heng zingah hian Alfred Jaryan-a’n box pawn atanga goal ban a pet per te, minute 88-naa David Rinmuana ball lakluh Mka-a’n hnai set sawt atanga goal-a a chantir thei lo leh Malsawmfela’n injury time-a a free-kick atanga goal kham a pet per dawt te chu a uiawm zual an ni.

Sawi zui ang

Team pahnihte’n attacking game an khel avangin inkhel a hmuhnawm a, player-te pawh an inngam tawk hle. Coach pahnih te tactic enin AFC coach Paulo Menezes-a’n fak a phu. Player a hman tangkai dan te, defensive an play danah leh attacking an khelh danah mumal takin ball an ‘control’ thei a. Rochharzela khel a hmuhnawm a, winger diktak a nih zia lan tirin a ball cross a that piah lamah ball dahna tur leh a dah hun a hre viau. Chutih rualin first-half ah Aizawl FC hmatawngte an naupanna a lang a, an goal nawr tam zawk ‘attacking third’ ah a zuzi fo. Second-half ah erawh an insiam tha niin a lang.

Chhinga Veng FC coach Lalsangzuala Hmar hian ‘sub’ a siam tlai deuh thin em aw tih theih turin a khingpuite inthlak dan a zirchiang phawt thin niin a ngaih theih. An goal chhuah dan pahnih thlirin defender te’n an tihtur an ti lo ve ve niin a lang a, siamthat vat a nih loh chuan nakin zelah team tan a pawi thei ang. Hmatawng nei tha tih takah Chhinga Veng goal nawr danah ‘solo’ a tam deuh niin a lang a, tun aia thawhho that lehzual an mamawh niin a lang.

Inkhel pumpui thlirin draw result hi team pahnihte’n an phu ve ve kan ti thei awm e.

ZoFooty Statistics :

Aizawl FC 2-2 Chhinga Veng FC
K.Lalthathanga 19′ Jonathan Lalrawngbawla 49′ – Malsawmfela 7′ Lalhriatrenga 37′(og)
55% Ball Possession 45%
9 Shots 14
5 On Target 7
2 Yellow Card(s) 2
0 Red Card(s) 0
MOM : Zothanmawia (CVFC)

Powered by Rainbow Multibrand Mobile Showroom

(Pic: Mizoram Premier League)

Posted in MFA, MPL, Tualchhung.

Leave a Reply

Or