MPL6 : CHHINGA VENG TAN GOAL KHAT A TAWK

Tun season-ah Chhinga Veng FC leh Chanmari FC vawi thum an intum tawh a, Chhinga Veng an la chak vek. Zanina MPL6 Round 5 inkhel hnuhnung berah Chhinga Veng chuan Lammuala entu mipui tam tak karah Lalkhawpuimawia goal hmangin Chanmari an hneh a, point thumin hma an hruai ta.

Tute nge khel ?

Chhinga Veng FC (4-4-2) : Zothanmawia; R.Laldinliana, R.Lalawmpuia, Lalrinchhana Tochhawng, Hmingthanmawia; Vanlallawma (Lalkhawpuimawia 56′), Lalrinchhana, R.Malsawmtluanga, Laldampuia (Laldingngheta 86′); MS Dawngliana (Lalthlamuana 90+5′), Malsawmfela

Subs : Laldingngheta, Francis Lalrambeiseia, Lalkhawpuimawia, R.Lalhmangaihzuala, Lalchhuanpuia, Ramfangzauva, Lalramliana, Lalrammuanpuia, Lalthlamuana

Chanmari FC (4-4-2) : F.Lalmuanawma; Thomas Lalengliana, C.Lalrosanga, David Lalchhuanawma (Lalmuanzoa 69′), Joe Zoherliana; Vanlalbiaa Chhangte, Joseph Lalfakzuala (Lalmuanzuala 90+1′), Rochhingpuia (Lalmalsawma 84′), Lalthasiama; Alex Whittemore, Jakob Vanlalhlimpuia

Subs : Lalmuanzoa, MS Dawngliana, Zothansanga, P.C.Zosangliana, Lalmuanawma, Lalmuanzuala, Lalruatfela, Lalmalsawma.

Inkhel danglamna – goal khat

Tan dawn tepah Chanmari utility player leh Chhinga Veng captain hlui ni bawk Joseph Lalnunpuia a inhliam a, Chanmari in an tlarhnung an siam rem a tul. Inkhel tan atangin game a nung nghal a, team pahnih tantute an in au chhawk zak zak.

Minute 20-naah inhliam Joseph-a aia lut David Lalchhuanawma ball chan lai chu Malsawmfela’n a chuhsak a, MPL6 top scorer ni mek Sawmfela’n a chhuah hlauhawm hle. Hemi hnu lawk hian Chanmari winger Mabia’n free lutukin ball a khalh a, a first touch duhthusam ni mahse ball a khalh chak hret a, Chanmari fans te an au thlawn.

First-half a tawp tep tihin team pahnihte’n au na tur an nei ve ve a, Chhingcows tan Vanlallawma tauh chu goal sirah a kal a, Mabiaa cross duhthusam chu Alex Whittermore-a’n kawh zetin tauh mahse goal zawnah a kal lo.

Chawlhlawk zawhah tun MPL – a goal la thun tam ber Chhinga Veng an hlauhawm zual a, minute 51-naah Malsawmfela’n Chanmari tlarhnung a pal darh hnuah goal kham a pet per dawt. Minute 56-naah Chhinga Veng coach Sanga’n inkhel ti danglamtu tur thutlukna siamin Vanlallawma lachhuakin Kelkang tlangval Lalkhawpuimawia a dahlut.

Mapuia hian a luh hnu minute thumah Sawmfela ball pek chu box chhungah um lutin Chanmari defender nen an inchuh karah keeper Muanawma lo tlanchhuak a hmu a, lei hrulah a pet lut. Chanmari in an siphurh sut tumin winger tlanchak Lalmuanzoa dah lut mahse Chhinga Veng tlarhnung an ding khawng tlat a, hun tawp thlengin team pahnihte’n goal an thun belh thei lo.

Inkhel thlir ang

Chanmari in tlarhnunga an player pawimawh Joseph Lalnunpuia awm lo an tuar a tih loh theih loh a, hemi vang hian an left-back Joe Zoherliana a laiah a din a tul. Lengpui tlangval hi khel chhe lo mahse left-back a khel David Lalchhuanawma a khel tha tawk lo.

Passing game aia ‘hit and run’ hmang nasa Chanmari tan an striker Alex Whittemore-a’n goal a la thun lo tluang zel a, inkhel dangah a thiante goal thun theih nan hna tangkai thawk thin mahse zaninah erawh goal chance tha a thelh bakah inkhel pawimawhah ‘foreign striker’ a nihna a lantir tawk lo.

Chhinga Veng lamin an game hnuhnung bera Malsawmfela an chawlhtir kha an ti fuh a, Ramhlun South tlangval hian vawi tam tak Chanmari tlarhnung a tibuai. Tlarhnung dinglam sir a ding R.Laldinliana a khel tha a, tunhnaia ‘form’ em em mai Thasiama a dah nil hnuah Muanzoa a dang bet leh thei. Fak phu ber erawh Electric Veng tlangval Lalrinchhana a ni a, Chhinga Veng no.9 hian ball a lak theih bakah a tlan tam a, a club hlui Chanmari midfielder te a dang chat hnem hle.

Inkhel pumpui thlirin squad nei chhah zawk Chhinga Vengin an player tha ngah an vanneihpui a, team pahnih te khel chhe lo mahse result fair tak niin a ngaih theih.

ZoFooty Statistics:

Chhinga Veng FC 1-0 Chanmari FC
Lalkhawpuimawia 59′
50% Ball Possession 50%
15 Shots 12
7 On Target 5
0 Yellow Card(s) 2
0 Red Card(s) 0
MOM : Lalrinchhana (CVFC)