MPL6 : DINTHAR HMAAH RAMHLUN NORTH AN FEI

Vawiin tlaia Mizoram Premier League Round 9 inkhel nung takah si phur hmasa zawk Ramhlun North FC in 2-1 in Dinthar FC an lehthal. He inkhelah hian Ramhlun North midfielder Lalrinfela chu Man of the Match atan thlan a ni a, MPL6-a Man of the Match vawi thum ni thei hmasa ber a ni.

Inkhelh hma boruak

Point 8 nei ve ve an nih avangin inkhel pawimawh a ni a, team pahnihte’n chungnung zawk nih tumin player an rawn rem. Inkhel tan hma in Dinthar FC striker hlui boral ta Michael Lalremruata sunna hun hman a ni bawk.

Tute nge khel ?

Dinthar FC (4-1-2-3) : Malsawmdawngzela; Tlangthanpuia, Malsawma Chhangte, Khrawpupar Tamu, Lalbiakzuala; Joseph Lalthafela (Lalthawmmawia 66′); Clarence Carter, Lalbiakhlua; David Tlau, Jackson Victor, Lalramliana (Lironthung Lotha 76′)

Subs : David Lalrinpuia, Lalmalsawmtluanga, Lironthung Lotha, Vanlalchhanhima Sailo, Stephen Lalnunmawia, R.Lalthantluanga, Lalthawmmawia, Saihmingthanga, Samuel Laltlanthanga

Ramhlun North (4-1-1-4): Liansangpuia; C.Ramdinmawia (P.C.Vanlalhmangaihzuala 38′), Lalfelpuia, Abu Korhena, Lalmuanawma; V.Lalchhuanawma; Harry Delono (Lalramzauva Khiangte 89′); Rosangliana, Lalremruata (Lalmuansanga 86′), Lalliansanga, Lalrinfela

Subs : Emmanuel Mawia, Malsawmtluanga Ralte, Jesse Laldinpuia, Liansiama, Lalramzauva Khiangte, Lalmuansanga, Lalnunpuia, P.C.Vanlalhmangaihzuala, Jessy Vanlalmuana

First-half a hmuhnawm

Inkhel tan veleh Dinthar in an nawr nghal a, David Tlau a ball khen chu Jackson Victor-a’n box chhungah luhpuiin keeper Sangpuia chauh hmachhawn tawh mahse goal zawnah a pet thei lo. Hemi hnu hian Dinthar tan Clarence Carter-a’n hun tha a nei ve leh a, Ramhlun North tan Remruata a hlauhawm teuh hle bawk.

Dinthar tan Jackson Victor a langsar a, box chhunga a ball dawn virpui thutin goal zawnah a kal teuh hle. Minute 33-naah Maimawms in goal an thun ta nge nge a, Lalramliana ball khalh luh chu hlauhawmin lang lo mahse Abu Korhena chuan lo titluin penalty hi Jackson Victor chuan chiang takin a pet lut.

Chak ngei tuma khel Ramhlun North in si an phur rei lo a, Harry ball pek chu Notean fing takin a thianpa Rinfela tan a ‘leave’ a, Khawlailung tlangval hian box chhung atangin far post-ah mawi takin a pet lut.

Ball chang tam zawk Ramhlun North aiin goal hmaah Dinthar an hlauhawm zawk a, Hlutea free-kick pet Tlangthana’n hnai set sawt atanga a thun loh chu uiawm tak a ni.

Second half a nung

Chawlhlawk laiin Samson Ramengmawian a naute a fuih tha tih a lang a, first-half ah an captain C.Ramdinmawia inhliam vangin chan mahse an zam phah lo.

Phase 1-a Ramhlun North an hneh loh tuma own goal lo thun tawh Dinthar FC captain Malsawma Chhangte a chesual nawn a, Muanawma ball vawrh luh chu an lamah a tauh lut.

Lammualah team pahnihten fans au ring tham an nei ve ve a, thawm chhuah na zawk erawh Ramhlun North fans te an ni. Khel tha tak Notea’n post pet per dawpin Pca pet Dinthar keeper Mala lo dan pawh uiawm tak a ni.

Inkhel boruak a tang a, team pahnihte innawr tawn karah in pet thluk tawk tawk a tam a, fans te boruak pawh a tha hle. Hun tawp thlengin goal a luh belh lo a, ti hian Ramhlun North in point 11 hmu in table-ah pangnaah an inhlangkai a, Dinthar erawh point 8 nen paruknaah an awm ta a ni.

ZoFooty Statistics :
Dinthar FC 1-2 Ramhlun North FC
Jackson Victor 33′ – Lalrinfela 36′ Malsawma Chhangte 58′ (og)

49% Ball Possession 51%
11 Shots 15
4 On Target 7
2 Yellow Card 4
0 Red Card 0
MoM : Lalrinfela (RNFC)