MPL6 : FIAHNA HMACHHAWN TUR CHHINGA VENG LEH AIZAWL FC

Zanin dar 7:30 ah tualchhung football ngainatute Lammualah an pungkhawm leh dawn a, tun season-a chak loh la nei lo Chhinga Veng FC leh India ram champion Aizawl FC te inkhel an en dawn.

Fiahna chu

Chhinga Veng hian an coach thar Lalsangzuala Hmar hnuaiah tun season-ah hneh loh an la nei lo a ni mai lo a, match 14 an khelh tawhah an la chak fai vek ! Heng match 14 an khelh tawhah hian goal thun an harsat lo a, MPL club Chanmari West FC, Bethlehem Vengthlang FC, Chanmari FC leh Mizoram Police te chu an hneh tawh zinga mi an ni. MFA Super Cup leh I-Day champion hian I-League champion Aizawl FC hi an la hmachhawn lo a, hei tak hi Chhinga Veng tan fiahna a ni dawn. India champion hi an hneh leh a nih ngat chuan Chhingcows te an pawr lehzual khawp ang.

MPL6 bikah Chhinga Veng hian game hnih khel tawhin point 6 an hmu a, goal 7 khung tawhin goal khat chauh an la chhuah. Chhinga Veng tlarhmaa ding Laldampuia, Malsawmfela leh match hmasaa inlan lo Malsawmdawngliana te hi chakpui vek tham khawpa thiam an ni a, midfield general R.Malsawmtluanga hi match hnih an khelh tawhah ‘man of the match’ ni thei ve ve a ni. Chhingcows player – te zingah Aizawl FC tana lo khel tawh an awm nual a, an goalkeeper T.Mawia hian amah duhlotute lakah hian goal a chhuah duh kher lo ang.

Aizawl FC hi Portuguese coach Paulo Menezes an chhawr hma in an player hlui Rohmingthanga’n a enkawl a, MFA Super Cup leh I-Day ah match ruk khelin vawi 4 an chak a, vawi hnih an chak lo. Portuguese coach in MPL6  atanga rawn zawmin chak ni hmel a la hmuh pui thei lo a, game hnih an khelh tawhah Ramhlun North leh Chanmari FC te 1-1 ve ve in an inhnehtawk pui.

I-League club hian khelmual lai luahlum turin an captain hlui David Lalrinmuana leh Alfred Jaryan te an neih miau avangin eng team tan mah hmachhawn chakawm an ni lo a, an winger hrem tuar H.Lalmuankima an chhawr thei tawh bawk ang. Aizawl FC forward Rochharzela a hmuhnawm thin a, Northeast United atanga an hawh K.Lalthathanga (Puitea) leh rawlthar thangduang Jonathan Lalrawngbawla te an nei bawk.

Hetihlai hian tun season-ah I-League champion tlarhnung hi a phui tawk lo a, an hmatawngte hi India ram champion meuh hmatawng atan chuan an patuai deuh niin a ngaih theih bawk. Zaninah hian tun season-a a vawikhat nan Chhinga Veng FC an tlawm thei a nih chuan ‘I-League champion nge nge’ kan ti thei ang.

Rs.30 chauh !

Tunhmaa kan chung en thin Manipur League leh Calcutta Football League te aiin Mizoram Premier League in ngaihven a hlawh tial tial a, a hmun a en thei lo te tan a pechhuaktu Zonet Cable TV lamin HD channel in min la chhawpchhuah sak deuh deuh ! Chutih rualin TV-a en leh a hmuna en chu a boruak a dang lo thei lo a, Aizawl FC Red Army leh Chhingcows te an tlem dawn loh avangin thutna tha i chan duh chuan a hma lamin Lammual pan la i tisual lo ang.

(Pic: Mizoram Premier League)