MPL6 : GOAL THUN THULH LO CHHINGA VENGIN POINT THUM HMU

Mizoram Premier League Season 6 khelh mekah vawiin tlai khan Chhinga Veng FC in Chanmari West FC 3-0 in an hneh a, game hnih khelah point 6 hmu in MPL – ah hma an hruai ta.

He inkhelah hian Vanlallawma, R.Malsawmtluanga leh Malsawmfela te’n goal an thun a. Msa hi a tum hnih nan Man of the Match atan thlan a ni.

Tute nge khel ?

Chanmari West FC : (4-2-3-1) J. Vanlalhriata; Lalmawizuala, H.Lalhlimpuia, Ronald Zothanzama, Calvin Zosangliana (Tlangthanpuia 69′); Lalramluaha (Lalromawia 68′), Jacob Lalrawngbawla; Lalnunmawia; Lalremruata, H.Lallianzama, Vanlalthlamuana.

Subs : Lalmalsawma Hmar, Lalengmawia, Lalrintluanga, Lalromawia, David Lalnunfela, Khiangdingpuia, JH Lallawmkima, H.Sanglianmawia, Tlangthanpuia.

Chhinga Veng (4-4-2) : Zothanmawia; Lalthlamuana, R.Lalawmpuia, Lalrinchhana Tochhawng, Ramfangzauva (Hmingthanmawia 45′); Vanlallawma, R.Malsawmtluanga, Lalrinchhana (Zosangliana 86′) Laldampuia; Malsawmfela, Lalkhawpuimawia (Lalrammuanpuia 89′)

Subs : Laldingngheta, Francis Rambeiseia, Zosangliana, R.Lalhmangaihzuala, Lalramliana, R.Laldinliana, Lalrammuanpuia, Hmingthanmawia, T.Shalomlala.

First-half a hmuhnawm

Inkhel bul tan atangin team pahnihte an inhlau lo tawn a, chak ngam khawpin an tha tawk tih lantirin an innawr nghal.

Minute 8-naah Chanmari West striker Lianzama ‘through ball’ tha zet chu Remruata tan a chak hret a, Zautea’n a lo tibuai hman. Remruata hian umpha ngat se chu Zara naute’n hma an hruai ngei ang.

Hemi hnu lawk hian Chanmari West bawkin goal thunna hun remchang nei lehin Thlamuana pet chu goal zawnah a kal lo hlauh. Chhinga Vengin nawr veleh nghalin Msa’n keeper chauh a hmachhawn tawh tihah Hriata pet khum a tum a, goal kham chungah a kal.

Champion ngei tuma tan la Chhinga Veng tan Lawma leh Dampuia te’n hun tha an nei leh a, Police keeper hlui Hriata an paltlang thei lo.

Minute 23-naah Lianzama’n Chhinga Veng captain Rinchhana chiang zeta a bum hnuah Mawitea a pe thla a, Ramhlun South forward hian Remruata tan siam rem lehin Chanmari West forward hian ho takin a chhuah.

Team pahnihte an innawr tawn zak zak a, hun tha nei thin mahse an ke a aikhirh leh thin. Goal awm lo in first-half a tawp.

Goal thum leh point thum

Second-half ah Chhinga Vengin bul an tan tha zawk a, goal an nawrna lamah Chanmari West keeper Hriata a chesual a, a ball pet chhuah sual chu Mapuia’n lo dawngin Lawma a pe chho a, Chhinga Veng midfielder hian awlsam takin a lo thun. 1-0 a ni ta.

“Min ti mai mai suh se” tia au Chhingcows te lawmna thlen turin minute 63-naah khelmual ding lam atanga Malsawmfela ball vawrh luh fing tak chu box chhungah Msa’n a lo tauh zauh a, keeper Hriata a che hman lo !

Chanmari West lamin Jacob Lalrawngbawla ball vawrh luh tha tak tak an chhawr tangkai zo lo a, chhum ruahtui pai lo ang maiin a thamral thin.

An striker tha Dawngtea chhawr thei lo mahse Chhinga Veng ha hmai a bil phah lo a, minute 67-naah box pawnah Malsawmfela’n ball changin Chanmari West player te inrin loh laiin far post-ah a pet thut a, nalh lutukin a lut.

Sanga naute’n inkhel an thunun chhunzawm zel a, vawi duai lo Chanmari West tlarhnunga ding Lalhlima leh Ronald-a te an rumthaih.

Minute 73-naa Dampuia cross Lawma’n goal ban a pet per chu uiawm tak a ni. Si thum an phurh hnuah Chanmari West in tho chhuak leh turin chakna an nei tawh lo a, first-half a an hun tha neih zozaite kha an ui a zual ngei ang.

Hun tawp thlengin goal a luh belh lo a, inkhelh dawnin ruahsur mahse team pahnih fans te’n Lammual pan an thulh phah lo a, a au ring zawk Chhinga Vengin hnehna chan an phu e.

ZoFooty Statistics :
Chanmari West FC 0-3 Chhinga Veng FC
Vanlallawma 53′ R.Malsawmtluanga 63′ Malsawmfela 67′

47% Ball Possession 53%
9 Shots 18
1 On Target 11
1 Yellow Card(s) 0
0 Red Card(s) 0
Man of the Match : R.Malsawmtluanga (CVFC)
Powered by : Rainbow Multibrand Mobile Showroom

(Pic : MFA)