MPL6 : INKHEL NGHAHHLEHAWM

Tunkarah Round hnih khelh a nih dawn avangin team tin tan a pawimawh a, tunkar hi semi-final lut tur leh relegate tur hriltu a ni thei. Round 10 ni hmasa zawkah Ramhlun North FC leh Mizoram Police FC te an inhmachhawn ang a, Dinthar FC leh Chhinga Veng FC an intum bawk ang.

3:00 pm Ramhlun North vs Mizoram Police (23.10.17)

Thawhtanni chawhnu tlaia inkhel tur te hi tun round-a inkhel nghahhlehawm ber te zinga mi a ni. Team pahnihte hian point 11 ve ve an hmu tawh a, head-to-head ah Mizoram Police an tha zawk. Zirtawpni kal ta khan Round 9 an khel ve ve a, hnehna an chang ve ve bawk. Phase 1-a an inhmachhawn khan Lalremruata hattrick in Ramhlun North a chhan zo lo a, Police 4-3 in an chak.

Round 7-a an chak loh hnu hian Samson Ramengmawia naute hi a zawnin vawi hnih an chak leh tawh a, tun season-ah goal thun harsat lo pawl niin an player pawimawh pahnih striker Lalliansanga (Notea) leh V.Lalchhuanawma te an dam tawh a, MPL6-a man of the match vawi thum ni thei awm chhun an winger Lalrinfela leh top scorer ni mek Lalremruata te sawi hmaih chi an ni lo.

MPL6-a team hmasawn ber tih ngam Mizoram Police hi Round 5 hnuah an tlawm leh tawh lo a, vawi thum chakin tum khat an draw. Police hian goal thun thei player tha an ngah avangin dan an harsa a, goal 18 thun tawhin anni aia goal thun hnem team pakhat chiah an awm. An tlarhnung thawm that nan defender thar pahnih an la tawh a, chutih rualin tunhnaia khel tha tluang tak Ramhlun North an hmachhawn dawn avangin an tlarhma te mai bakah an tlarhnung a phui that a pawimawh ang.

7:30 pm Dinthar FC vs Chhinga Veng FC (23.10.17)

Naktuk zana inhmachhawn tur te hi team inang lo tak ni mahse inkhel nung tak kan beisei thei ang. Phase 1-ah khan Chhinga Veng hian minute 89 hnuah goal hnih thunin 3-1 in hnehna an chang a, an defender R.Laldinliana chu man of the match atan thlan a ni. Kha inkhelah khan 1-1 a nih laiin Dinthar in goal ban an pet per a, kha mi ball let leh kha Chhinga Vengin thunin hnehna an chang zui ta a ni.

MPL champion hlui DInthar in an coach thar Vanlalrova hnuaiah game hnih khel tawhin point thum an hlawhchhuak a, an game hnuhnung berah ‘own goal’ vangin an vanduai. Dinthar hian point 8 neiin table-ah 7-na an ni mek a, Chhinga Veng lakah point khat tal an hlawhchhuak lo a nih chuan an team la hmachhawn tur te en in an kawng a hautak tawh maithei. Chutih rualin foreigner pahnih an neih bakah Khasi leh Naga player an nei bawk a, he team-ah hian theihna a awm a, chu chu an phochhuak thei a nih chuan zamna tur an nei lo ang.

Lalsangzuala Hmar hnuaiah Chhinga Veng hi a zawnin vawi 21 chhung hneh lo nei lo in an kal tawh a, Dinthar FC lakah an tlawm lo a nih chuan H.Vanlalthlanga hnuaia Chanmari in hneh loh nei loa awm rei ber record an neih kha an khum thei ang. Chhinga Veng hian foreigner awmna team an hmachhawnin team dang aiin an awlsam lo thin niin a lang a, tunah erawh Nigerian pahnih Olumide Olawale leh Lasisi Adeyemi an neih tawh avangin an tawh a khirh lehzual tawh hle. Hei mai bakah Round 9 a an hahchawlhtir an player tha Malsawmfela, R.Malsawmtluanga leh Lalrinchhana te an rawn kir tawhin a rinawm a, record thar an siam a nih pawhin thil mak a ni lo ang.

Tarlan tawh angin tunkar hian Round 10 leh Round 11 khelh a ni dawn a, MPL6-a round pawimawh ber a tih theih hial ang. Tualchhung football ngainatute tan chil ti put tham inkhel hmuhnawm a awm zel dawn e.