MPL6 : MIMAL LAWMMAN

Mizoram Premier League Season 6 hmawr bawk zanah mimal lawmman sem a ni a, lawmman lak theih panga atangin champion ta Chhinga Veng FC in pahnih an la.

Best Goalkeeper : F. Lalmuanawma
MPL season 5 khelh tawhah Best Goalkeeper ni thei mi pahnih chiah an la awm a, tunah chuan F.Lalmuanawma hming ziah belh theih a ni ang. Chanmari FC goalkeeper Muanawma hian match 16 an khelh a\angin vawi 12 a inlan a, clean sheet vawi li neiin goal vawi 11 chiah a chhuah. Man of the match atan vawi hnih thlan niin keeper zingah amah chiah vawi khat aia tam he lawmman dawng thei hi a awm. Semi-final a vanduai ta Chanmari in Muanawma tel loin inkhel vawi li an hmachhawn a, tum thum an tlawm.

Best Defender : R. Laldinliana
Chhinga Veng defender R. Laldinliana hian match 17 an khelhah vawi khat chiah khelh loh a nei a, Armed Veng South tlangval hi vawi 14 starting eleven-ah inlanin goal hnih a khung bawk. An champion thlengin minute 1299 a khel a, Chhinga Veng player zingah khel tam ber palina a ni phak.

Best Midfielder & Best Player : R. Malsawmtluanga
Final a goal awm chhun thuntu a ni a, final an luhna kawngah goal 5 thunin ball tha siam thiam hmingthang a ni bawk. Chhinga Veng midfielder R. Malsawmtluanga hian man of the match lawmman vawi 4 dawngin a dawng hnem ber a, MPL2-ah Best Player a nih tawh bawk avangin MPL chanchina he lawmman hlu dawng nawn thei hmasa ber a ni.

Best Forward : H. Lalmuankima
Bawngkawn tlangval H.Lalmuankima hian hrem a tawh vangin MPL match hmasa pahnih a khel lo a, phase 1-ah khelhna hmun chan harsat mah se season chawhnuah hmun pawimawh changin goal nga a khung a, \um thum man of the match-ah thlan a ni. Aizawl FC in phase 2-a ‘harhtharna’ an channa a player pawimawh a ni.

Top Scorer : Lalfakzuala
Mizoram Police striker Lalfakzuala’n goal 10 khung top scorer a ni a, Armed Veng tlangval hian match 14 khelin match hnih a inlan lo a, minute 123 dana goal khat khung zel ang a ni. A goal thun zingah semi-final first leg a Aizawl FC laka mawi taka a volley kha theihnghilh a harsa.