MPL6 : MIZORAM POLICE TLAWMTU CHANMARI FC

Zanina Mizoram Premier League inkhel hmuhnawm takah Chanmari FC in Mizoram Police 2-1 in an lehthal. He inkhelah hian Chanmari striker MC Malsawmzuala chu man of the match atan thlan a ni.

Tute nge khel ?

Mizoram Police FC (4-4-2) : VK Malsawma; TC Vanlalhruaia, Lalhmunmawia, Lalrinchhana, C.Zomuanpuia; Lalbiakhlua (F.Lalrinpuia 78′), F.Zosangliana, V.Laltanpuia, Lalsangbera; Lalfakzuala, Lalfakawma.

Subs : Toky Zomuanpuia, C.Lalnunmawia, B.Zoramthanga, Andrew Lalhmingliana, F.Lalrinpuia, R.Vanlalhriata, Lalhriatpuia, Lalruatpuia, Vanlalhriata

Chanmari FC (4-4-2) : F.Lalmuanawma; Thomas Lalengkima, Joseph Lalnunpuia, C.Lalmuanawma, Joe Zoherliana; Lalmuanzoa, Emmanuel Chijioke (Vanlalbiaa Chhangte 53′), Joseph Lalfakzuala, Thasiama (Rochhingpuia 75′); Gani Ahammed, Jakob Vanlalhlimpuia (MC Malsawmzuala 56′)

Subs : MS Dawngliana, Rochhingpuia, Vanlalbiaa Chhangte, Lalnunzama, Lalmuanawma, Lalruatfela, Lalmalsawma, Sajid Hossain, MC Malsawmzuala

Match Referee : C.Lalruatkima

Inkhel hmuhnawm

A zawna match 5 tlawm tawh lo Mizoram Police leh a zawna match 6 chhung hneh nei tawh lo Chanmari FC te inkhel hian ngaihven a hlawh a, team pahnih tantute Lammualah an pungkhawm hnem hle.

Tawnhriat nei tha zawk Police in inkhel an thunun a, ball zawnga an tlan tam bawk avangin Chanmari midfielder te’n hmun awl an nei tlem hle.

Minute 18-naah C.Zomuanpuia free-kick chu box chhung atangin F.Zosanglianan mawi takin a tauh lut a, Chanmari keeper Muanawma tan dan hman a ni lo.

Chawlhlawk hma in Police bawkin hun tha an nei a, Biaktean box pawn atanga kawh zeta a pet chu Muanawman a dan sak a, Fakzuala free-kick in goal ban a per bakah hnai set sawt atangin Hruaian a pet ‘over’ bawk.

Chanmari tana Thasiama pet chu goal sirah a kal a, hei bak hi first-half chhungin Chanmari fans ten au na tur an nei lo.

Second-half tir lamah thil a danglam tam lo a, Police hmatawngte an hlauhawm a, an finishing tawih phei se chu goal thunna hun tha an ngah hle. Chanmari in an siphurh sut tumin Mabiaa leh MC Malsawmzuala te luhtir mahse hun tha an insiam thei lo.

A zawna a vawi 7 nan Chanmari in point thum an hlawh chhuak zo dawn lo emaw tih hnuah minute 72-naah pen 25 vel atangin bench atanga lut MCa’n mawi takin free-kick a pet lut a, a pet tu in pet tha mahse keeper VKa’n a tihtur a ti tawk lo deuh niin a lang.

A hnu minute ruk lekah Mca bawk a rawn lang a, box pawn atanga a pet tha zet chuan goal kham a per hnuah Mabiaa ke ah a tla a, Hriangtlang tlangval hian an goal hnihna a thun.

Injury time-ah Chanmari keeper Muanawman tha zet a a dan hnuah penalty a chawi a, TV replay atanga a lan danin Muanawma hian ball a khawih hmasa niin a lang. Penalty pet thiam a sawi Sangbera rawn penchhuak mahse Dawrpui tlangval hian goal zawnah a pet thei lo.

Ti hian Chanmari in point 15 hmu in pathumna an ni ta a, point 14 nen Mizoram Police hi panganaah an awm mek a ni.

Inkhel pum pui thlirin Police in point khat tal an hmu lo kha an vanduai a, si khat a hma an hruai laiin hun tha tam tak nei mahse an hmatawngte’n an hmang tangkai zo lo a, penalty an thelh bawk nen Bsa hnuaiah a vawikhat nan an tlawm.

H.Vanlalthlangan substitution a siam fuh a, bench atanga lut MC Malsawmzuala chu inkhel danglamtu thlentu niin chakna goal thuntu pawh bench atanga lut Mabiaa a ni. Champion lai hian point thum an hmuh leh tak avangin inrintawkna an neih belh sawt ang.

ZoFooty Statistics

Mizoram Police FC 1-2 Chanmari FC
F. Zosangliana 18′ – MC Malsawmzuala 73′ Vanlalbiaa Chhangte 78′

53 % Ball Possession 47%
13 Shots 8
7 On Target 5
1 Yellow Card 1
0 Red Card 0
MoM : MC Malsawmzuala (CFC)

Powered by : Rainbow Multibrand Mobile Showroom

Posted in MFA, MPL, Tualchhung.

Leave a Reply

Or