MPL6: POLICE LEH AIZAWL FC DANGLAMNA PENALTY ; FINAL AH AIZAWL FC

Zanina Mizoram Premier League semi-final second leg inkhelah Mizoram Police leh Aizawl FC te 1-1 in an inhnehtawk a, first leg-ah 2-2 a an inthathen tawh bawk avangin penalty shootout hmangin chak zawk zawn a ni a, Aizawl FC 5-3 a chakin final an lut.

He inkhelah hian Aizawl FC midfielder H.Lalmuankima chu man of the match atan thlan a ni.

MPL6 final hi December ni 8 zan dar 7:30 ah Chhinga Veng FC leh Aizawl FC te’n an khel ang.

Tute nge khel ?

Mizoram Police FC (4-2-3-1) : Laltanpuia Ralte; TC Vanlalhruaia, Lalrinchhana, Lalhmunmawia, Lalruatpuia (C.Zomuanpuia 34′); V.Laltanpuia, F.Zosangliana; Lalbiakhlua, F.Lalrinpuia, Lalbiakhlua (Lalsangbera 84′); Lalfakzuala

Subs : VK Malsawma, Lalbiaknunga, Lalfakawma, C.Zomuanpuia, Lalsangbera, Vanlalhriata, Lalhriatpuia, C.Lalnunmawia, F.Lalropuia

Aizawl FC (4-2-3-1): Avilash Paul; Lalrinzuala Khiangte, Masih Saighani, Lalhriatrenga, Lalramhmunmawia, H.Lalbiakthanga, David Lalrinmuana; Albert Zohmingmawia, K.Lalthathanga (Lalruatfela Zote 85′) H.Lalmuankima; William Lalnunfela

Subs : Lalawmpuia Hnamte, Paul Ramfangzauva, Ramdinsanga, Lalruatfela, Vanlalthazuala, Jonathan Lalhriatkima, Hmingthanmawia, Lalrozama Fanai, Lalawmpuia

Match referee : Lalrawngbawla Renthlei
Assistant referee : Lalhriatliana & F.Lalramsanga
Fourth official : MS Dawngliana

First half -ah goal hnih

Inkhel ngaihven hlawhah first-half chhungin goal hnih kan hmu a, inkhel a nung hle.

Tan phatah Police in Lalfakzuala hmangin goal thunna hun remchang an nei a, MPL6 top scorer nilai hian Lalbiakhlua cross a tauh pial a, tauh fuh ngat se hma an hruai ngei ang.

East Bengal laka goal hnih thuntu William Lalnunfela’n Police siban nghaktu Laltanpuia Ralte chauh hmachhawn tawh mahse goal a thun thei bik lo. Minute 14-naah erawh K.Lalthathanga’n (Puitea) Police captain V.Laltanpuia ball laksakin William-a a pek phei hnuah H.Lalmuankima’n goal hmahruai a thun.

Police tlarhma te an khel chhe lo a, Aizawl FC defender te an tlan pel fo. Si an phurh atangin minute thum chauh a la liam tihin F.Lalrinpuia’n veilam atanga free-kick a pet chu Aizawl FC keeper Avilash Paul-a’n a chhut sual a, Armed Veng tlangval Lalbiakhlua’n (Hlutea) an siphurh sut nan hnai set sawt atangin a thun.

Ball chang tlem zawk Police in inhliam vangin an defender Lalruatpuia an chan a, mahse October transfer laia an lakluh C.Zomuanpuia an la luhtir theih avangin Police tlarhnung a buai phah lo.

Minute 45 chhungin team pahnihte an innawr tawk a, ball chang tam zawk mahse Aizawl FC in goal hmaah an chungnunna an lantir thei bik lo a, 1-1 a nih hnua Albert Zohmingmawia goal ban pet per chu an hun tha neih zinga mi a ni.

Goal awm lohna second-half

Chawlhlawk zawhah MPL6 a goal la thun hnem ber Mizoram Police in an nawr chhunzawm a, Valpuia ke veilam atanga ball chhuak kawh zet chu Avilash Paul-a’n a nam per thei hram. Fakzuala, Valpuia leh Biaktea te inkawp an hlauhawm teuh thin hle a, ball an inpek kual hnua F.Zosangliana’n goal kham chunga a pet pawh uiawm tak a ni.

Aizawl FC tan H.Lalmuankima leh David Lalrinmuana te an hmuhnawm a, Bawngkawn tlangval Mka hi Police defender TC Vanlalhruaia venna hnuaiah tal put thin mahse duhthusamin hmawr a bawk thei lo.

Team pahnihte’n bench atangin an player tha neih te an luhtir ve ve a, Police in Biaktea aiah Lalsangbera an thun a, Aizawl FC in Puitea thlak nan MPL Best Midfielder nilai Lalruatfela Zote luhtirin ani hian goal a thawk chhuak thelh nghe nghe.

 

Team tha pahnih thelhna – penalty shootout !

Aizawl FC tan David Lalrinmuana, William Lalnunfela, Lalrinzuala Khiangte, Masih Saighani leh H.Lalmuankima te’n an pet goal vek a, Police tan a pet hmasa ber C.Zomuanpuia’n a pet over hnuah F.Lalrinpuia, Lalrinchhana leh Lalbiakhlua te’n thun ve mahse final luhna turin a tawk zo lo.

Inkhel thlirin chak zawk phu an awm lo tih theih a ni a, chutih rualin football-a na ber tih ngam penalty hmangin MPL6 a team hmuhnawm ber zinga mi Mizoram Police in final an thleng zo lo erawh uiawm tak a ni.

MPL6 pum thlirin Aizawl FC in final luh an phu a, player an neih that bakah an fans te’n an tawiawm that avangin final nung tak kan beisei thei ang.

ZoFooty Statistics (Powered by Rainbow Multibrand Mobile Showroom)

Mizoram Police FC 1-1 Aizawl FC
Lalbiakhlua (Hlutea) 17′ – H.Lalmuankima 14′
(Agg: 3-3; Aizawl FC win 5-3 on penalties)

38% Ball Possession 62%
15 Shots 15
7 On Target 5
1 Yellow Card 1
0 Red Card 0
Man of the match : H.Lalmuankima (AFC)

Posted in MFA, MPL, Tualchhung.

Leave a Reply

Or