MPL6 : RAMHLUN NORTH NGUI NI AH CHANMARI AN NUI

Rinna nen semi-final an thlir a, kut an beng a, point thum an hmu ngei dawn niin a lang tawh. Hun a tawp erawh chuan Ramhlun North ni lo in Chanmari in kut an beng ta zawk.

Vawiin tlaia Mizoram Premier League inkhel pawimawh takah Ramhlun North leh Chanmari te 2-2 in an inhnehtawk a, ti hian Chanmari in point 19 neiin semi-final an hnaih lehzual a, point 16 nei mek Ramhlun North tan semi-final kalkawng a khirh lehzual ta.

Tute nge khel ?

Ramhlun North (4-1-4-1) : Liansangpuia; C.Ramdinmawia (Jesse Laldinpuia 75’), Lalfelpuia, Abu Korhena, Lalmuanawma; V.Lalchhuanawma; Rosangliana, Lalramzauva Khiangte (Lalmuansanga 83’), John Ampong, Lalrinfela (P.C.Vanlalhmangaihzuala 90’); Lalliansanga

Subs : Lalrinhlua, Lalmuansanga, Jesse Laldinpuia, Lalnunpuia, P.C. Vanlalhmangaihzuala, Lalzatluanga, Lalremruata, Jessy Vanlalmuana, Malsawmtluanga Ralte

Chanmari FC (4-4-2) : F.Lalmuanawma; Thomas Lalengkima, Joseph Lalnunpuia, C.Lalmuanawma, Joe Zoherliana; Joseph Lalfakzuala, B.Zoramthara (Rochhingpuia 75’); Vanlalbiaa Chhangte, Jakob Vanlalhlimpuia (Lalmuanzova 64’), Gani Ahammed (MC Malsawmzuala 26’), Thasiama

Subs : Lalmuanzova, C.Lalrosanga, MS Dawngliana, Rochhingpuia, Zomuanpuia, Lalnunzama, Lalruatfela, MC Malsawmzuala, Emmanuel Chijioke

Match Referee : Lalruatfela

Hun tha hloh a pawi

Ramhlun North in chak an mamawh tih hria in Phase 1-a an ngam tawh loh Chanmari an nawr nghal a, first-half ah pawh inkhel thunutu chu Samson Ramengmawia naute an ni. An striker Notea’n keeper chauh a hmachhawn hnuah goal a thun thei lo a, awlsam takin a thianpa Rsa pass turin awm bawk mahse Durtlang tlangval hian a pawl te hma a hruai pui thei lo.

Hemi hnu lawk hian Rsa’n hun tha a hlah ve leh a, Chanmari in half chance nei ve zauh zauh thin mahse an hmang tangkai zo lo.

Minute 6 chhungin goal thum

Second half-ah Ramhlun North in inkhel thunun chhunzawmin box chhunga Chhuantea, Notea leh Rsa pet chu Muanawman a dan zawt zawt hnuah a ball dan per chu Chhuantea’n minute 54-naah box chhung atangin chiang zetin an hmahruai nan a thun.

He mi hnu lawk minute 57-naah box chhunga Chanmari keeper Muanawma ball ben per chu John Ampong-a’n B.Thara a bum hnuah box pawn hret atangin mawi takin a pet goal a, 2-0 a ni ta. Ramhlun North in an goal hnihna an thun atangin minute hnih chauh a la liam tihin Phase 1-a an inhmachhawn tum a man of the match atan a thlan Vanlalbiaa Chhangte chuan Chanmari si phurh sut then na goal a rawn thun ve leh a, inkhel a nung hle.

A tawpah a pawi

Minute 5 hun pek pelh a ni a, Ramhlun North in point thum an hmu mai dawn niin a lang. Bench atanga rawn lut Rochhingpuia ball pet naran tak chu keeper tha an mamawhzia nem ngheh nan Ramhlun North keeper Liansangpuia’n ho takin a kap karah a luhtir. Ramhlun North in point khat an hmu a ni mai lo a, point hnih an hloh bakah semi-final luh an tumna a thuanawp.

Ti khan Chanmari in point 19 neiin semi-final lut tumin an kal zel a, round hnuhnung berah Dinthar FC an hmachhawn ang. Ramhlun North in point 16 neiin round hnuhnung berah Aizawl FC an hmachhawn dawn a, anmahni inkhel mai bakah midang result in a thiam pali zinga an tel leh tel loh a hril ang.

ZoFooty Statistics :
Ramhlun North FC 2-2 Chanmari FC
V.Lalchhuanawma 54’ John Ampong 57’ – Vanlalbiaa Chhangte 59’ Rochhingpuia 90+3’

55% Ball Possession 45%
19 Shots 15
9 On Target 7
3 Yellow Card 0
0 Red Card 0
MoM : V.Lalchhuanawma (RNFC)