MPL6 : ROUND 13 A ‘HOT’ DAWN

Estimated read time 2 min read

Mizoram Premier League Season 6 khelh mekah Round 14 a awm dawn a, November ni 9 (Ningani) leh ni 10 (Zirtawpni) hian Round 13 khelh a ni dawn. Tunah hian Aizawl FC leh Chhinga Veng te’n semi-final an lut tawh a, team pahnihte zui tumin team pali an inel mek a, Chanmari West leh Dinthar FC te’n inhamtan tumin an bei thung.

Round 13 ni hmasa zawkah semi-final luh tum club pali zinga pathum an inlan dawn a, Ramhlun North FC leh Chanmari FC an inhmachhawn ang a, Bethlehem Vengthlang leh Chhinga Veng an innuai bawk ang.

3:00 pm Ramhlun North FC vs Chanmari FC

Phase 1-a team pahnihte inhmachhawn tum khan Ramhlun North in Chanmari winger Vanlalbiaa Chhangte an ngam lo a, khelmual chhungah 2-0 a Chanmari hnehna chanpuitu Hriangtlang tlangval aia langsar an awm lo. Tunah erawh league hmawr bawk a hnaih tawh avangin team pahnihte’n ‘pressure’ neiin an khel tawh dawn a, Round 13 khuhhawnna tur hi a hmuhnawm dawn.

Champion lai Chanmari hian an game hnuhnung berah BVT an hneh avangin inrintawkna an nei leh tawh a, he inkhelah hian point thum an hmu thei a nih chuan semi-final chu round khat chauhin a dal tawh ang. Ramhlun North hi tun season-a team hmuhnawm ber pawl an ni a, an game a ran avangin team tawhkhirh ber pawl an ni. Point 15 nei mekin table-ah 5-na an ni a, semi-final luh an duh a nih chuan tun season-a goal la chhuah tlem ber zinga mi Chanmari FC lakah an hmatawngte an khelh that a tul ang.

7:30 pm Bethlehem Vengthlang FC vs Chhinga Veng FC

Nikum finalist BVT hian inkhel hmasa result hre sa in an khel dawn a, a pawimawh ber erawh point thum hmu tur a an beih a tul tih hi  a ni. Phase 1-a an inhmachhawn tum khan MS Dawngliana goal hnih hmangin Chhinga Vengin hnehna an chang a, tun tumah erawh semi-final lut chiang tawh Chhinga Veng tan theihpalingkawh a khel tur BVT dan hi hna awlsam a ni dawn lo.

Round 12 ah team pahnihte hian hnehna an chang zo lo ve ve a, semi-final khelh a hnaih tawh avangin Chhinga Veng tan MPL6 tan tirh lam a an game nung leh tha tak ang khan an khelh leh a hun tawh a, BVT in Chhinga Veng hi an hneh dawn a nih ngai chuan tun aia hun remchang hi a awm kher lo ang.

C Tlanthianghlima

Football tui ve tak

You May Also Like

More From Author

3Comments

Add yours

+ Leave a Comment