November ni 23 (Ningani) zan dar 7:30 a ri ang a, Lammual khat tlatin mipui an au hum hum ang. Heng mipuite hi Aizawl FC leh Mizoram Police FC te’n MPL6 semi-final hmasa zawk an khelh en tur a lokal an ni.
Team pahnihte hian December ni 4 zanah thawhhnihna (second leg) an khel leh ang. Inkhel en man hi cheng 50 a ni dawn a, naupang kum 14 hnuai lam tan erawh en man a ngai lo ang.
Thawnthu hlui
MPL6 – ah team pahnihte hi tum hnih an insu tawh a, Aizawl FC dinhmun a tha zawk. Round 5 – ah Paulo Meneses a naute hian 6-1 in hnehna an chang a, hattrick siam tu Rochharzela chu man of the match atan thlan a ni. Kan hriat reng tur erawh chu Round 5-ah hian Mizoram Police hi ‘team thar’ an la ni lo a, Phase 2-ah chuan Aizawl FC pawhin an player chhawr te an thlak nual tawh.
Mizoram Police-in coach thar an neih hnuah a hmaa an hneh loh Aizawl FC an chelh thei a, si hnih an phurh hnuah 2-2 in an inhnehtawk. Round 8 inkhelah hian khelmual chhungah Police striker F.Lalrinpuia aia langsar an awm lo a, Aizawl FC Romanian midfielder thar Andrei Ionescu pawhin a club thar tana a khelh hmasak berah goal mawi bik a thun.
Meneses-a naute
League stage-ah Aizawl FC hian vawi 14 khelin vawi 7 an chak a, tum thum tlawmin vawi 4 draw an nei. Inkhel hnuhnung berah Ramhlun North lakah tlawm mahse semi-final hi chu boruak dang daih a nih tawh dawn avangin an result hian nghawng a neih thui a rinawm loh. I-League inelna hmachhawn tur a inbuatsaih mek Aizawl FC tana thu lawmawm loh erawh chu Andrei Ionescu dinhmun chiang lo hi a ni.
Romanian midfielder hian hliam a neih avangin a dinhmun a chian loh thu leh training pawh a zawm theih loh thu an coach Paulo Meneses chuan a sawi a, inkhel thununtu te’n a player te an pet pawhin a pet tu yellow card takngial pawh an pe lo thin chu a lawm loh thu a sawi.
“Aizawl FC hi kan thawhhona a tha a, kan inlungrual bawk a, kan game pawh a mawiin ka hria,” tiin Meneses hian a sawi a, attacking football khel thin an nih thu a sawi uar hle.
Aizawl FC tan hian David Lalrinmuana leh H.Lalmuankima te an khel tha leh tawh hle a, hmatawngah Phase 2-a goal thun thei tak William Lalnunfela an neih bawk avangin an tawh a khirh dawn a, tlarhnungah ‘ball playing defender’ Masih Saighani leh a thiante an khelh that bawk chuan sut tlang an harsa khawp ang.
Bsa a inringtawk
Mizoram Police in Phase 1 inkhel pangaah point 1 chauh an hlawh chhuak a, coach atana Lalbiaksanga Colney an rawih hnuah vawi 6 chakin vawi khat an draw a, tum khat an tlawm. Police hian league stage-ah goal 33 thunin goal thun hnem ber an ni a, thu lawmawm loh erawh chu goal 36 zet an chhuah hi a ni, an game khelh zawng zawngah goal an chhuah vek !
Round 6 atanga Police enkawltu Bsa chuan an khingpui tur te chu team tha an nih thu a pawm a, mahse an thatna leh thatlohna lai a hriat avangin a hman tangkai tur thu a sawi. Police hian player inhliam an nei lo a, duh ang tawk a rem tur player an neih dawn avangin an hmuhnawm ang.
An hmatawng a ding tur Lalfakzuala, F.Lalrinpuia, Lalsangbera, Lalbiakhlua te hi sakei zan vak ang mai a chak an nih hlawm avangin dan an harsa dawn a, chutih rualin an tlarhnung te bakah khelmual laia ding tur V.Laltanpuia leh F.Zosangliana te’n an thlawp that a tul ang.
Goal chhuah tlem vs goal thun tam
He inkhel ti nghahhlehawm tu ber pakhat chu MPL6-a ‘goal chhuah tlem ber’ Aizawl FC leh ‘goal thun hnem ber’ Mizoram Police an nih vang hi a ni.
Aizawl FC hian goal thun an harsat chuang lo a, an chakna hnar ber pakhat erawh goal an chhuah tlem hi a ni. Round 14 chhungin goal 13 an chhuah a, ‘clean sheet’ vawi 4 neiin heng zinga pathum hi Phase 2-ah a ni. Khelmual lai an thunun a, Police goal nawr tur an dang chat thei a nih chuan Paulo Meneses-a naute dinhmun a tha thei ang.
First leg-a kawr pawl ha tur Police tan erawh an tlarhma te bawk an innghahna a nih a rinawm a, goal an chhuah zel hi lu ti hai tu ni mahse an tlarhma te an khelh that phawt chuan eng team pawh hneh thei an ni.
+ There are no comments
Add yours