MPL6 : TEAM THA PAHNIH INBEIHNA; POLICE NGE AIZAWL FC ?

Estimated read time 2 min read

Aizawl FC leh Mizoram Police te hi semi-final ah minute 90 inkhel tawhin 2-2 in an inhnehtawk a, minute 90 dang khelh tur a la awm. December ni 4 (Thawhtanni) zan dar 7:30 ah inkhel hi tan a ni dawn a, final a Chhinga Veng FC tum tur hriat zan a ni.

Police chakna – tlar hma

Mizoram Premier League Season 6 – ah Mizoram Police in goal 35 an thun tawh a, anni aia goal thun hnem an awm lo. Tun dinhmunah Lalfakzuala (10) leh F.Lalrinpuia (9) te hi goal thun hnem ber pahnih an ni a, goal hmaa hlauhawm tak tak player dang an la nei bawk. Season pum thlirin an tlarhmate hi an chakna a tih loh theih loh a, khelmual laiah Best Midfielder nominee F.Zosangliana an kawl bawk.

Police hian I-League khel a Kolkata zin Aizawl FC aiin inbuatsaihna hun leh hahdamna hun an ngah zawk a, an hman tangkai ngei pawh a rinawm. First leg-ah khan set piece atangin vawi hnih ngawt goal an chhuah a, minute 90 chauh hun a awm tawh avangin an tlar hma te khel tha mahse goal an chhuah zel chuan final an lut thei dawn lo, player tin an pawimawh vek dawn !

Aizawl FC an tha rual

Aizawl FC hi MPL6 a goal chhuah tlem ber an ni a, goal 15 an chhuah. Goal an chhuah tlem vang hian goal an thun tlem phah lo a, game 15 ah goal 33 thun tawhin anni aia goal thun hnem chu Mizoram Police chiah hi an ni.

MPL nomawi vawi hnih chawi tawh Aizawl FC hian position tinah nominee an thawh thei a, Avilash Paul, Masih Saighani, David Lalrinmuana leh H. Lalmuankima te hi innghahna tlak vek an ni. Inhliam vanga first leg inlan thei lo Andrei Ionescu pawh a dam chho tan a, a tul chuan chhawr theih a ni ang. I-League inkhel vangin inbuatsaihna hun nei tlem zawk mahse an tan fiahna a ni dawn a, Police hmaah an dingchang thei a nih chuan fak an hlawh khawp ang.

C Tlanthianghlima

Football tui ve tak

You May Also Like

More From Author

4Comments

Add yours

+ Leave a Comment