MPL6 : VAWIINAH INKHEL PALI AWM DAWN

12:30 pm Chanmari FC vs Bethlehem Vengthlang FC

Team pahnihte Phase 1-a an inhmachhawn tum khan goal thun thei an awm lo a, kawng engkimah BVT chungnungin Chanmari goalkeeper F.Lalmuanawma chu man of the match atan thlan a ni. Table kan en chuan team pahnihte hian point 15 ve ve hmu tawhin pathumna leh palina an ni mek a, he inkhel result hi semi-final lut tur hriltu pawimawh a ni ngei ang.

Team pahnihte hian October thla transfer hawn chhungin player thar an lalut ve ve a, nimin transfer tawp ni khan Chanmari hian BVT forward B.Zoramthara chu an club a khel turin an ziak lut. Coach nghet nei lo a awm mek BVT in player hming langsar lakluh nei lo mahse tun thla chhungin player thar pali an ziak lut a, an match hnuhnung berah point thum an hmuh theih bawk avangin team zuam awm an ni lo.

3:00 pm Chanmari West FC vs Mizoram Police FC

Semi-final la sawi ri ngam Chanmari West leh Mizoram Police inhmachhawn tur hi en a chakawm tawh a, West Warriors hian point an hlawhchhuak zo lo a nih chuan a sang pali zinga tel an harsat tawh ang.
Point 11 nei a 7-naa awm mek West Warriors hian an coach thar Zirtea hnuaiah vawi khat chak tawhin tum khat an tlawm a, goal thun harsat lo Police hmaah point hlawhchhuak tur chuan game awmze nei an khelh a tul ang.
Mizoram Police hian an game hnuhnung berah Chanmari hneh zo lo mahse an hlauhawmna a nep phah lo a, mahse a zawna point hmuh loh hi semi-final luh tum tan thil tih chi a nih loh avangin West Warriors lakah an inthlahdah a thiang lo.

5:30 pm Chhinga Veng FC vs Ramhlun North

Chhinga Vengin semi-final lut chiang tawh mahse 1st Division an khelh lai atanga vawi khat mah an la hneh loh Ramhlun North an hmachhawn dawn a, semi-final luh tum mek Ramhlun North nena an inhmachhawn tur hi inkhel nghahhlehawm a ni.

Phase 1-a team pahnihte inhmachhawn tum khan Ramhlun North winger Lalrinfela chu man of the match atan thlan a ni a, 3-3 a inhnehtawkna inkhelah hian inkhel thununtu C.Lalruatkima’n yellow card paruk a phawrh.

Ramhlun North hian an midfielder Harry Delona chu a visa a tawp avangin an chhawr chhunzawm thei dawn lo a, a aiah Ghanian midfielder John Kweku Ampong an lalut. Chhinga Veng hi an match hnuhnung berah an chak lo a, an striker chhuanvawr Malsawmfela’n a zawnin match 4 goal a thun tawh lo bawk.

8:00 pm Dinthar FC vs Aizawl FC

Team pahnihte hian inkhel dang result hre sa in an khel dawn a, result dang a zirin he inkhel hi semi-final luh leh relegate hril tu inkhel a ni thei. Dinthar FC in point thum an hmu a nih chuan rinna mitin semi-final an la thlir thei ang a, Chanmari West an chak a, Dinthar an tlawm a nih chuan MPL champion hmasa ber tan thilmak tawpkhawk a thleng a nih loh chuan MPL-ah an hmel kan hmu tawh lo ang.

Pahnihna ni mek Aizawl FC in point thum an hmu thei a nih chuan an tan semi-final chu pen khat chauh a hla a ni tawh ang.
MPL6 Round 14 khelh turah vawiin hi Round 12 a ni tawh a, tun thlengin semi-final lut pakhat chiah la awmin relegate tur team pawh a la hriat loh. Tualchhung football ngainatute tan MPL6 inum hi a ngaihnawm takzet a, cheng 30 nen Lammual rawn pan la, inchhirin i haw hauh lo ang.