MPL6 : Zaninah final luh inchuhna; Chhinga Veng vs Chanmari

Mizoram Premier League Season 6 – ah league hmahruaitu Chhinga Veng FC leh champion lai Chanmari FC te zanin dar 7:30 hian semi-final first leg-ah an inhmachhawn dawn. Inkhel en duh tan kamram man bakah luh man cheng 50 a ngai dawn a, kum 14 hnuai lam tan erawh a thlawnin a en theih ang.

4-0

Team pahnihte hi tun season-ah vawi li (4) inhmachhawn tawhin Chhinga Veng an la chungnung vek. Chhingcows hian I-Day football-ah Chanmari hi group stage-ah leh final ah an hneh a, MPL Round 5 -ah Lalkhawpuimawia goal hmangin 1-0 in an hneh a, Round 8 – ah MS Dawngliana goal hnih hmangin 2-1 in an chak bawk

.
Hei bakah hian Chanmari in tualchhung league-a hneh loh nei lo a khel rei ber record an siam chu Chhinga Veng hian an rawn khum bawk a, chuvangin team pahnih inkar boruak hi a te thei lo.

Champion lai

H.Vanlalthlanga enkawl Chanmari hi champion lai an nih miau avangin dah hniam theih an ni lo a, MPL2 a champion pui tu Thlang enkawlna hnuaiah league-ah palina an ni. Team tha an nihzia pholangtu chu Round 14 chhungin palina aia hniamah vawikhatmah an awm lo.

Chanmari hian league-ah bul tan tha mahse a laihawlah an talbuai deuh a, duhthusamin league hmawr an bawk thei lo bawk. Chutih rualin an player te en in team huaisen an ni a, an winger tlanchakte leh Phase 2-a an lakluh fuh tak MC Malsawmzuala hi a khelh that ni chuan dan hleihtheih loh khawpin a thiam a, an fans te’n an tawiawm that bawk chuan an nomawi humhim leh thei an ni.

Hmahruaitu

Chhinga Veng hian tun season ah MFA Super Cup leh I-Day nomawi an chawi tawh a, a lungthu kim nan MPL chawi an tum hle. Tuma el rual lohin league hmahruaitu an ni a, season hmasaa Chanmari champion puitu Lalsangzuala Hmar leh champion player tha an kawl nual avangin an inringtawk hle ang. Chutih rualin semi-final a nih tawh dawn avangin chetsual palh a pawi thei a, an fimkhur hle a tul ang.

Chhingcows hian goal thun thei player an ngah avangin an buai lo niin a ngaih theih a, mahse an striker hmachhuan ber Malsawmfela’n Round 8 hnuah goal a thun tawh loh avangin Sanga tan luhaina tham a tling. Ramhlun South tlangval hian Round 7 chhungin goal 6 thun mahse goal thuntu zingah a hming a ziah belh leh tawh lo a, striker tha dang nei mahse champion tur chuan Sawmfela hian a club hlui lakah a khelh that a pawimawh ang.

A tawp tak takah erawh R.Malsawmtluanga bawk an innghahna a rinawm a, MPL2 Best Player hian khelmual lai a thunun thei a nih chuan minute 90 hnuah Chhingcows te an au ring zawk a nih pawhin thilmak a ni lo ang.

Posted in MFA, MPL, Tualchhung.

Leave a Reply

Or