MPL7 – Team of Round 1

MPL7 round hmasa ber chu khelh zawh a ni ta a, kan thlir let dawn a nih chuan MPL-a ball thar Nivia Antrix atanga chhui zau a châkawm. Ball thar vang hian goal mawi zawk kan hmu a, kan hmu zel bawk dawn. A that leh that loh erawh post danah zirchianna kan la nei dawn nia.

Tun tumah chuan a khel tha 11 leh coach che tha kan thlanchhuahte kan han tarlan ang.

Rising star : Kumin February thla khan Mizoram chuan Punjab 3-2 a hnehin Khelo India-ah an champion a, hemi tuma goal khungtute Lalnunzama, F. Lalnuntluanga leh H. Zawnhmingthanga te hi MPL-ah anmahni club theuh tana bul tanin an khel tha em em vek.

Khelo India best player Zama’n Chanmari goal hnihna a khung a, tlarhmaah a maltlat chungin naupan anga en chi a ni lo ,aman of the match-a thlan a ni hial. Tluanga pawh champion lai Chhinga Veng tan bul a tan ringawt lo a, mual sir atanga an nawr na ber pakhat a ni. Electric Veng midfield-ah Thanga hmuh hmaih a harsa, a tlan nasa em em a, Aizawl FC midfielder tawnhriat ngah zawk tan buaina tham a tling a, ball a chan apiangin ball a hrechiang tih a lantir thei zel bawk.

Mi thar tlangnel : Electric Vengin I Day Football-a an match hmasa berah Aizawl FC an hneh a, MPL-ah an hneh nawn a, hei vang hian coach Vanlalsawma Colney hming a lan a tul. EFC tlarhnungah C. Lalnunmawia a khel tha viau bawk a, PUC-a midfielder a hming chher hian right back pawh a ti thei fu a, MPL-a tawnhriat ngahzawk Albert Zohmingmawia a dah tha tiin a sawi theih.

Tualchung footbal tui chin chuan MPL hmain Vanlalzuidika an hre tawh dawn a, MPL chauh ngaihven chauh an hre chho zel ang. Chhinga Veng defender hi a chawr chhuahna Lunglei lamah chuan player langsar a ni a, Assam lamah pawh hming chher tawh a ni.

An la rintlak e : Mizoram Police keeper Laltanpuia’n clean sheet nei bul a tan a, angle a khar that thin avangin tawnhriat nei tam lo BVT forward ten a paltlang dan an hre fuh lo. Veteran midfielder V. Laltanuia a la thawkrim reng a, Police midfielder hi man of the match a thlan a ni.

Chanmari pawhin Police ang thoin goal an chhuah lo a, Champhai tlangval Lalmuanawma tan ZoFooty XI hmunruak zuah a tul. Electric Veng midfielder Isak Vanlalpeka freekick-in sawi zui a hlawh dawn, Kolasib tlangval ball pet thiamna hi MPL kaitharin I League club Aizawl FC an hneh theihna chhan a ni.

Chhinga Veng midfielder Lalromawia an ven uluk avangin a che hleithei lo a, amaherawhchu hun tha a neih erawh a hlah lo. Samlukhai tlangval hian goal ropui leh chakna goal a khung avangin man of the match-ah thlan a ni a, chakna goal khung thei chu ZoFooty duhzawng tak a ni.

Chawnpui winger Vanlalthanga chiah ZoFooty XI zinga chak loh lam atanga thlan awmchhun a ni a, amaherawhchu Hualngohmun tlangval hi a ball pet thiam avang te, a thawhrim avang tein round 1-ah anni aia khelmuala langsar an awm chuang lo.

ZoFooty XI – Round 1
Keeper : Laltanpuia (MPFC)
Defenders : C. Lalnunmawia (EFC), Vanlalzuidika (CVFC), Lalmuanawma (CFC)
Midfielders : V. Laltanpuia (MPFC), Isak Vanlalpeka (EFC), H. Zawnhmingthanga (EFC)
Forwards : F. Lalnuntluanga (CVFC), Lalromawia (CVFC), Vanlalthanga (CFC), Lalnunzama (CFC)
Coach : Vanlalsawma Colney, EFC

Thlirna Tawi
Round 1
Chhinga Veng FC 1-0 Chawnpui FC
CVFC : Lalromawia 83′
MoM: Lalromawia, Chhinga Veng FC

Mizoram Police FC 1-0 Bethlehem Vengthlang FC
MPFC : Lalfakzuala 50′
MoM: V. Laltanpuia, Mizoram Police FC

Electric Veng FC 2-1 Aizawl FC
EFC : Alfred Kemah Jaryan 67′ (OG); Isak Vanlalpeka 69′
AFC : Alfred Kemah Jaryan 77′
MoM : Isak Vanlalpeka, EFC

Chanmari FC 2-0 Ramhlun North FC
CFC : Lalnuntluanga 10′; Lalnunzama 40′
MoM : Lalnunzama, CFC

Posted in Tualchhung and tagged , , , , , , , , .

Leave a Reply

Or