NAKTUK KAWR SEN HAK NI

Hero I-League khelh mekah naktuk chawhnu dar hnih hian Aizawl FC chuan Rajiv Gandhi Stadium ah Chennai City FC an mikhual dawn a. He inkhel hi TV ah pek a nih dawn loh avangin a hmun a en duh chuan cheng 100 emaw cheng 200 an sen a tul ang.

TEAM INANG LO

Mualneitu Aizawl FC hi mahni mual a la tlawm lo, club lian Kingfisher East Bengal hneh zo hlim an ni a, an phur vanglai tak a ni ngei ang. Tunah hian table – ah pathumna niin game 10 atangin point 20 an hmu tawh a, an chak a nih chuan midang result a zirin I-League hmahruaitu an ni thei ang.

Khalid Jamil-a hian a defender pawimawh Lalruatthara chu a inhliam avangin a chhawr thei dawn lo a, a tlarhnung a sik sawi hret a ngaih a rinawm. Team pahnihte an intum hmasak khan Chennai khawpuiah mualneitu lam si hnih faiin an chak a, Aizawl FC hian an chetsual tawhna khuh mawi leh turin mau a awm loh pawhin rua tal an puah mawp mawp a tul ang.

Chennai City FC hi tun season I-League club zinga manager ban hmasa ber an ni a, khelh 10 ah point 8 chauh an la hmuh avangin club 10 awm zingah pakuana an ni mek. Chennai team hian Aizawl FC hneh puitu Robin Charles Raja an kawl tawh lo a, a aiah Railways coach hlui V.Soundara Rajan an lalut.

Rajan a hnuaiah game thum khel tawhin point 4 an hlawhchhuak thei a, an match hnuhnung berah erawh an mualah ngei Shillong Lajong in 4-1 in an sawp. Chennai City FC hian Aizawl FC an hneh tum a goal thuntu Brazilian forward Marcus ‘Tank’ Vinicius leh an star midfielder Haroon Amiri an chhawr thei dawn lo a, an player te’n hlawh an lak mumal loh avangin club chhungkaw boruak a tha lutuk lo niin sawi a ni bawk.

Hetiang hi an dinhmun ni mahse I-League club thar hi zuam chi an ni lo a, Indian footballer tha tak tak an la kawl nual bakah Mizo player pathum an rawn hruai Malsawmfela, Lalnunmawia leh Liandala (Sena) te hi game thlak thei khawpa player tha an nih vek avangin Mualpuiah hian engpawh thleng thei a ni.

ENGE AN SAWI ?

A dan pangngaiin Aizawl FC boss Khalid Jamil a tawng fimkhur leh hle a,” Naktukah hian a hmaa kan hneh tawh loh te kan tum dawn avangin match pawimawh tak a ni a. Kan theihtawp kan chhuah a nih phawt chuan kan hneh ve theih lohna chhan tur a awm lo,” tiin a sawi. Aizawl FC tan a goal pawimawh thun thei tak Brandon VL Remdika pawhin an team tanrualna avanga la chak chho ve zel an nih thu leh Mizo mipuite tawiawmna tha an hmuh leh a beisei thu a sawi.

Chennai City FC boss V.Soundara Rajan pawhin an inkhelh tur chu thlirlawkin,” Ka player te an dam tha a, chutih rualin artificial turf a inkhel tur kan nih avangin insiamrem kan mamawh maithei,” a ti thung. Rajan chuan sawi chhunzawm zelin,” Game khelh tur a la tam a, hengah te hian result tha nei vek turin kan bei dawn a ni,” tiin I-League a an dinhmun a hniam thu a zep bik lo. Mizoram a tawnhriat ngah tawh Lalnunmawia pawhin Aizawla an inkhel tur chu a nghahhleh tawh thu a sawi bawk.

KAWR SEN HA

Aizawl FC in naktuk match tiamin Mualpuiah vawi thum an la khel dawn a, hengah te hian kan tih thin dan pangngaiin mipuite’n kawr sen ha in tawiawm leh theuh thei ila a va ropui dawn em ! A huho a thuawih thin hnam Mizo te’n club hruaitute ruahman angin R.Dengthuama Indoor Stadium leh 3^rd Battalion MAP Ground ah te kan lirthei dah ila, mahni thutna turah tak thu in “Aizawl FC” tiin au rual dual dual mai ang u aw…