Naktuk zan atangin ISL

Indian Super League 2020-21 chu naktuk zan dar 7:30 hian khelh tan a ni dawn a, inkhel hmasa berah team thar tia sawi theih ATK Mohun Bagan leh Kerala Blasters an inkhel ang.
 
Thla 8 hnua Indian football – a inkhel awm leh hmasa ber hi Star Sports 1, Star Sports 2 leh an HD channel – ah te ‘live’ in a en theih ang a, online lamah Disney+ Hotstar leh JioTV – ah te a en theih bawk ang.
 
ATK Mohun Bagan hi Antonio López Habas a enkawl niin ani hi manager tawnhriat ngah tak a ni a. Kum 1997 khan Bolivia chu Copa America – ah pahnihna a lo nihpui tawh a, Spanish club lian Valencia pawh a enkawl tawh. ISL hi kum 2014 atang khan chenchilh tawhin 2014 leh 2019/20 season te khan ATK tan ISL nomawi a chawi. Mizo player a kawl lo thung.
 
ISL – a vawi hnih runners-up ni tawh Kerala Blasters hian Lalruatthara leh Lalthathanga Khawlhring te an kawl a, an khelh that ni chuan danglamna siam thei khawpa player tha ve ve an ni. An manager chu Spanish mi Kibu Vicuña niin kum 20 dawn tawnhriat lo nei tawh a nih bakah season liam ta I-League a Mohun Bagan champion puitu kha a ni a, ATK nen an inzawm hnuah club neitute’n Habas hi an duh zawk avangin a contract neih lai pawhsei a ni lo a, naktuk zan inkhel tur hi Vicuña tan a thatzia pholanna hun remchang a ni thei ang.