Arsenal manager Arsene Wenger chuan Arsenal fans te chu Thawhlehni zan Carling Cup quarter final-a an mikhual tur, Manchester City player Samir Nasri lo au nawmnah lo turin a ngen.

August thlaa Arsenal chhuahsan a, Manchester City zâwm ta Samir Nasri hian Arsenal-ah contract thar a ziak duh lo a, Arsenal a chhuahsan pawh khan fans ṭhenkhat chu a lakah an thinrim viau a nih kha. Khati kha ni mahse, Arsenal manager chuan a player hlui hi ṭha taka lo dawngsawng turin fans te a ngen a ni.

Arsene Wenger chuan, “Samir (Nasri) hi ṭha taka dawnsawn a nih ka beisei. A khel dawn nge dawn lo ka hre lo a, mahse ka ngaihdanah chuan he club tâna khel tawh te hi chu club dang jersey ha chungin lo lêt leh mahse zah (respect) an phû em em a ni. Samir hian kan bula a awm lai khan hma a sâwn em em a, player pet goal ngai mang lo kha player ṭha takah a chhuak thei a ni. Kan player pawimawh tak a ni ṭhin a, Man City player pawimawh tak a ni ang tihah hian ka chiang bawk a ni.” a ti.

Arsene hian a ti dik em?

Football fans te hian player te hi kan lo ngaisang thei khawp a, an laka kan thikthu pawh a chhe thei khawp mai. Kan club ṭan bera kan player duh ber maite an han chhuak daih a, club dang tân theihtawp an han chhuah mai hi chuan rilru hi a hrehawm ve duh viau.

Nasri pawh hi Arsenal player pawimawh tak a ni ṭhin a, Thawhlehni zânah hian a khel a nih chuan boo tawk chu an awm ngeiin a rinawm. Chutihrualin player ṭhenkhat chu an club chhuahsan tawh mahse, an chhuah chhan azirin fans te hian an hrethiam thei viau thung. Arsenal player tho hlui tho a ni bawk a, Cesc Fabregas hi han sawikai ta ila. Barcelona-a chhuah a châk em em tawh hnuah, Arsene Wenger-a ngenna angin season 1 a châm leh a, a chhuah tak tak meuh kha chuan fans te kha an lo inring hman deuh tawh a tih theih awm e. A chhuahna chhan leh a chhuah hnua a ṭawngkam te ngaihtuahin, Arsenal fans te zingah Fabregas haw zui ta viau hi chu a tlem zawk an ni ngeiin a rinawm.

Tunhnaiah pawh Fernando Torres, Cristiano Ronaldo, Andrea Pirlo leh midang dangte pawh a sawikai theih zel awm e. An chhuah chhan chu engpawh lo ni ta se, club danga an chhuah tâk avanga haw ringawt lovin, kan club ṭan tâna an hnathawh leh an inpeknate kha hrereng thei ila a pawm a hahdam deuh awm e.

Arsenal fan ni la, Samir Nasri hi i boo angem?