National Futsal Tournament-ah Mizo Referee!

#ZoFooty

National Futsal Tournament-ah Mizo Referee!

All India Football Federation (AIFF) buatsaih Hero Futsal Club Championship-ah Frank VL Rinpuia (Leitan) chu Referee a ni dawn a, he inelna hi November 5-13, 2021 chhungin Delhi-ah khelh a ni ang.

Rinpuia hi MFA Futsal Committee Secretary niin AFC leh AIFF hnuaia Youth Development, Grassroots kalpui/buaipui mektu a ni bawk.

Mizoram aiawhin Chanmari Zothan Futsal Club an tel dawn a, anni hi MFA Futsal League-a țum hnih champion tawh niin North East Futsal Championship-ah an champion tawh bawk. November ni 1 hian Delh an pan dawn a, Mizo 6 awmna Delhi FC chu Delhi Football Association aiawhin an tel bawk ang.

He inelna hi club inelna niin club 16 an tel dawn a, group 4-ah club 4 zela țhen niin group tin leader ten semi final an lut ang.

Hero Futsal Club Championship-ah hian champion-in nuai thum an dawng ang a, pahnihnain nuai hnih an dawng thung ang. AIFF chuan club tin hnenah an zin vei vahna atan nuai khat țheuh an pe dawn a ni.

AIFF a fimkhur a, inelna hmun thlen hmain a tel turte chu RT-PCR test vawihnih nei turin a hriattir a, a hmun thlen hunah RT-PCR bawkin test leh an ni ang. Tin, 2nd dose vaccine la chauh tel an phal bawk.

Hero Futsal Club Championship hi Shillong-a khelh tura ruahman a ni zet a nimahsela a hmun hmain a zo lo deuhah ngaiin AIFF chuan Delhi-ah a sawn.