Nimin khan Mizoram chuan 48th National Junior football Championship final round-a game hmasa ber an khel a, Jharkhand 1-0 in an hneh.

Mizoram tan hian Lalruafela, Republic Vengthlang chuan goal awm chhun a thun a, minute 45-naa goal mawi tak a thun bak hi Mizoramin an thun belh thei ta lo. Siliguri, West Bengal-a inkhelah hian Mizoram hian natukah vawi 17 Champion tawh leh rinkai ber West Bengal an hmachhawn leh ang.

Inkhel inhnehtawk
Mizoram leh Jharkhnad inkhel hi an inbei tawk hle niin Mizoram manager Benjamin Laldinpuia (Didina) chuan a sawi a, Mizoram hian ball an chang tam zawk a, goal chance pawh an ngah zawk a; nimahsela pumraw lian zawk leh tharum ngah zawk Jharkhand pawh hi an khel tha hle a ni.

Jharkhand hi tata Football Academy player-te an ni a, kum 2005 khan AR Lammualah National Junior Football Championship-ah vek hian Mizoramin penalty shoot out-ah an hneh tawh lo a, tunah chuan an hneh ta.

Goal awm chhun hi a mawi hle tih coach Laltuakliana Renthlei chuan sawiin, “A class a sang ve khawp mai, entute pawhin an lawm a, a goal mawi takzet a ni,”a ti. Mizoram coach hian chance hlah zozai chu a uiawm thu sawiin, “Goal khat aia tama chak thei kan ni a, tun tum chu kan striker-te’n goal an thun thei tlat lo a, nidanga an goa thun thin aia awl zawk an hlah fo a; amaherawhchu Jharkhand pawh hian chance an hmu a, an hlah ve tho a ni,” a ti.

Mizoram Vs West Bengal
Final found-ah hian state pali- Mizroam, Jharkhand, West Bengal leh Karnataka – an awm a, an inkhelh kual hnua point hmu sang ber hi Indai champion a n ni ang. Nimin khan West Bengal- in Karnatka 5-1 in an sawp a naktukah Mizoram leh Bengal hi an inhmachhan ve leh ang.

Bengal hi vawi 17 champion an ni a, a thlengtu state an ni bawk a, tun tumah hian rinkai ber an ni. final round-ah pawh goal nga thun thei an ni a. Mizoram tan huphurhawm tak an ni thei a; nimahsela Mizoram hi tun hnaiah hian kan inhnehtawk thei em em mai a, tun tum chu kan ingringtawk khawp mai. Football-ah chak zawk tur a zawi lawk theih ngai lo a, chuti chung chuan ka naute hi an zam lem lo tih hi chu ka sawi ngam a, Bengal an nih vangin stte dangin an tawngpawng hlauh thin a, inkhelh hma chuan kan hlau ngawt lo ang,” a ti.

Source: Vanglaini (Thursday, January 26, 2012)