#ZoFooty

Season liamtaa Indian Super League (ISL) Semi-Finalist Northeast United chuan kum thum chhung khel turin Electric Veng FC midfielder hlui Emanuel Lalchhanchhuaha an lalut.

Pehlawn tlangval Emanuel Lalchhanchhuaha hi Mizoram Premier League U-18 ah Chhinga Veng FC tan khel tawhin CVFC U-18 hi a champion pui a. Senior team-ah erawh 2018 khan Electric Veng FC tan MPL ah a inlan thung a, 2018-ah vek hian Dr B.C. Roy Trophy-ah Mizoram chu a Captain-na hnuaiah an champion bawk.

Hemi season zawhah hian Bengaluru FC a zawm a, Bengaluru FC U-18 Player of the Year-ah thlan a ni zui a. Nimahsela, Bengaluru FC senior team-ah hian chance a nei thei meuh lova, NE United-ah chance tam zawk a neih theih in beiseiin a lut ta zawk a ni.

Mizo tlangval Lalengmawia (Apuia) larchhuahna NE United hian Apuia thlak turin Chhanchhuaha hi an la pawh a tih theih awm e. NE United hian BFC ațang thovin full back Joe Zoherliana an lo lalut tawh bawk.

Chhanchhuaha hi Tata Trusts U-Dream project hnuaiah Germany-ah football zirin a lo awm tawh țhin a, India U-14 Captain a ni țhin bawk.

NE United hian BFC ațang hian Chhanchhuaha hi Nuai 15 velin an lei chhuak niin tarlan a ni a, ZoFooty chuan Chhanchhuaha hi țha taka khel turin duhsakna kan hlan a ni.