NECS CUP 2017 ROUND OF 16 KHELH TAN A NI; THINGSULTHLIAH LEH RAMHLUN NORTH CHAK NGHAL – Rooney Opa

NECS CUP 2017 Round of 16 chu vawiin khan Aizawl Sipai Lammual-ah khelh tan a ni a, Thingsulthliah VC team leh Ramhlun North LC team te chuan an khingpui ve ve hnehin quarterfinal an inhlangkai. Thingsulthliah hian Chite Veng chu 3-1 in an hneh a, Ramhlun North hian Dinthar chu 2-1 in an hneh bawk.
.
Chite Veng LC 1-3 Thingsulthliah VC:
Vawiin chhun dar 11 khan Aizawl khaw pawn team tha Thingsulthliah leh Chite Veng an innuai a, Thingsulthliah hian game pumpui thununin hnehna an chang chiang hle.
.
Mizoram Premier League a Chhinga Veng FC defender Lalfelpuia captain na hnuaia khel Thingsulthliah hian an striker tha Joel Lalmuanpuia hmangin minute 17-ah hma an hruai a, he goal hi goal mawi tak niin Chite Veng defender-te inrinthulh karah winger KT Vanlalhruaia chuan Joel hi through ball pe in rem leh rem lo in Joel hian a pet a, goalkeeper veilam kil sirah mawi takin a lut a ni.
.
Thingsulthliah hian chawlhlawk hma hretin goal an thun belh a, hei erawh thilthlawn pek liau liau a ni. Mual dinglam atanga defender Henry Zorempuia ball pet chu Chite Veng goalkeeper Andy Lalrinchhana tan man harsa tur niin lang lo mah se Andy hi a chesual a, an lamah a hui lut hlauh!
.
Chawlhlawk zawhah Chite Veng an rawn kang hlek a, minute 57-ah freekick pet tha thei em em mai Lalbiakdika chuan mawi tak maiin freekick atangin goal a thun a, Chite lam an pawng zual zel. Thingsulthliah hian Chite hmatawngte atangin game harsa an hmachhawn a, amaherawhchu, minute 89-ah counter attack atanga goal thun lehin nuamsa takin inkhel an khar ta a ni.
.
Chite Veng hian an nawr luatah tisualin Lalbiakzuala, Hmingthanmawia leh Joel te hmangin Thingsulthliah lamin counter attack-ah an nawr thut a, Chite defender pakhat chiahin lo hmachhawnin awlsam takin an tlanpel a, Biakzuala hian petin Chite goalkeeper Andy chuan lo dang mah se a per leh lam chu Joel chuan awlsam takin tun tournamnet a goal nga nan a lo thun.
.
Inkhel hi a hmuhnawmin game a tang em em a, lehlam lehlamin chance neiin finishing tha tawk lo an tuar ve ve kan ti thei ang. A bikin Chite Veng hi an finishing a tha tawk lo a, Thingsualthliah captain Felpuia tihsualah chance tha an hmuh pawhin an thun thei lo. Thingsulthliah hian player an neitha a, an fit tih a hriat bawk a, a bikin striker Joel leh winger Isaac te an hmuhnawmin tournament kalzelah en hlawh bik tur an ni ngei ang.
.
Line-Ups:
.
Chite Veng: Andy Lalrinchhana, Johan Lalremruatdika, Isak Lalchhuanmawia, Michael Lalruattluanga, Lallianzuala Ralte, Lalbiakfela, Eddie Chawnghnuna, David Lalrongenga, Lalbiakdika, Joseph Hmingthanmawia, Lalbiaknia.
.
Subs: C. Lalrinthara, Lalrintluanga, Joseph Malsawmtluanga, Malsawmdawngzuala, C. Lalchhanhima, Lalhriatpuia, Henry Zorammawia, Lalnunfela Ralte, Ramthianghlima.
.
Thingsulthliah: Edison Chhachhai, Lalfelpuia, Lalhlupuia, Lalbiakzuala, Henry Zorempuia, Lalbiakzuala, Hmingthanmawia, Lalnunpuia, KT Vanlalhruaia, Isaac Vanlalremruatfela, Joel Lalmuanpuia, Johny Lalthanpuia.
.
Subs: Laldintluanga, Malsawmzuala, Lalchhanchhuaha, Laldailova, Lalhmangaihzuala.
.
Dinthar LC 1-2 Ramhlun North LC
Mizoram Premier League club nei veng pahnih, veng lian ve ve Dinthar leh Ramhlun North te chawhnu lamah an innuai a, Ramhlun North in 2-1 in hnehna an chang.
.
Inkhel hi chawhma lam khel nen a inthlau hle a, game a dulin tihsual a tam a, inkhel hmuhnawm tia sawi tur a ni lem lo. Dinthar hian Mizoram football a hming lang tham an kawl nual a, Dinthar FC captain Samuel Laltlanthanga te, Mizoram Police forward Lalnunmawia te, Mizoram Police defender Lalropuia te, Ramhlun North FC winger Isaac Lalruatpuia te, Chanmari West FC midfielder Reuben Zosangpuia te chu a langsar pawl niin han en mai chuan team tha zawka ngaih an ni.
.
Amaherawhchu, Ramhlun North hian tihpalh vanga Round of 16 lut an ni lo tih lantirin goal an thun hmasa a, hming langsar Dinthar an hlau lo tih lantirin minute 45-ah Lalhunruata (Huna) chuan goal mawi a thun. Hemi hma hian Lalruatdika Khiangte (Puipuia) pass tha tak chu Huna hian ho takin a pet lut lo bawk.
.
Inkhelh tantir lamah Dinthar hian Samuel-a hmangin chance tha an hmu a, mual dinglam atanga Lalnunsanga pass tha tak chu mawi taka lo dangin goalkeeper chiah a awm tawh tihin chip tumin a pet a, ho takin goal kham chungah a pet a ni. Si an phurh hnuah Samuel hian a tihsual siamtha in Reuben freekick fing tak chu keeper veilam kil sirah mawi takin a pet lut a, tun tournament a a goal lina niin Dinthar siphurh a sut.
.
Team pahnihten penalty appeal an nei ve ve a, referee in a pe lo ve ve. Hei vang hian game boruak a tang ru hle a, inpet luih deuh zauh zauh pawh a awm nual mai. Ramhlun North tan Lalmuanpuia chuan free ball tha tak mai a pet lut lo a, sikhat ve ve inpe a hun a tawp avangin extra time khelh chhunzawm nghal a ni.
.
Extra time-ah pawh team pahnihte an inhnehtawk chho zel a, penalty an pet ngei dawn nia a lan hnuah minute 114-ah Robert Lalruatdika chuan Puipuia tan bal tha mi pe in Dinthar goalkeeper Freddy man hman lohin goal-ah a thun a, hei hi chakna goal a ni zui ta a ni.
.
Ramhlun North lamah hian goalkeeper Liansangpuia a khel tha hle a, vawi tam tak a team-te chhanhimin a hmaa dingte tan thlamuanna a siam. Tin, Aizawl FC Academy player Hmingthanmawia (Valpuia) a chetha in Ramhlun North tlarhnung innghahna a ni. Ani hian tum tam tak Dinthar attacking dang chatin hmatawng lamah lah header hlauhawm tak tak a nei nual bawk.
.
Line-Ups:
.
Dinthar: Freddy R Zothanpuia, C. Lalnunsanga, F. Lalropuia, B. Lalfakzuala, Lalsiamthara, Eddie Lalfelkima, Lawmsangzuala, Reuben Zosangpuia, Samuel Laltlanthanga, C. Lalnunmawia, Lalnunsanga.
.
Subs: Lalhriatpuia, George MS Dawngliana, K. Lalthlangliana, Vanlalnghaka, C. Lallawmsanga, Malsawmtluanga, Lalherliana, Lalenkawla, Isaac Lalruatpuia.
.
Ramhlun North: Liansangpuia, Hmingthanmawia, Lalmuanchhana, John Lalduhawma, Lalchhanhima, Lalrintluanga, D. Liansanga, Zothansanga, Lalhunruata, Lalruatdika Khiangte, Robert Lalruatdika.
.
Subs: Samuel Lalropuia, V. Lalneihsanga, C. Vanlalnghaka, Lalmuanpuia, Lalduhzuala, PC Zothansanga, James Lalngaihawma, John Lalmuanpuia.

Posted in Mizoram, Ramchhung, Tualchhung.

Leave a Reply

Or