NEIDA-in Mizoram Football Association hnenah thilpek an hlan

NEIDA-in Mizoram Football Association hnenah thilpek an hlan

Aizawl, 18th Oct. 2021

Tata Trusts hnuaia NGO pakhat, Northeast Initiative Development Agency (NEIDA) chuan vawiin khan Mizoram Football Association (MFA) hnenah Mizoram aiawha zin chhuak tura inpuahchah mek, AR Lammual a hmeichhe football team camp mekte ei leh in tur leh mamawh dang thahnem tak an hlan.

NEIDA State Coordinator Pu B. Lalrinkima chuan, “NEIDA leh MFA te hi hun rei tak chhung kan lo thawkho tawh a, kan thawhhona hian rah tha tam tak chhuah tawhin, hlawhtlinna tamtak kan chang ho tawh a; hun khirh tak kara hetiang thawhhona kan nei leh thei hi a lawmawm kan ti takzet a ni,” a ti a. “Mizoram aiawha fehchhuak tur mipa leh hmeichhe senior team te pawh NEIDA chuan duhsakna sangber a hlan a ni,” a ti bawk.

NEIDA aiawha thilpek hlantu Pu R.Lalnunsanga, Senior Accounts & Admin pawhin MFA te nen coaching leh grassroots development lamah rei tak an lo thawh ho tawh thu sawiin, chu chuan rah tha a chhuah a, hmasawnna tam tak an hmu tih a sawi. MFA te tihtak zia leh tumruh zia an hmuhin NEIDA, Tata Trusts chuan tun aia nasa leh hnemhnanawm zawk pawha MFA te puih an chakzia sawiin, hun lo awm turah MFA nena thawhho zel an beisei tih a sawi.

MFA Sr. Vice President PC Vanlalhruaia chuan NEIDA, Tata Trusts ten MFA senior team pahnih training mekten an mamawh em em — training materials leh ei tur tuihnai tak tak an rawn hlan chu lawmawm a tihzia a sawi a. “MFA chuan Tata Trusts te hi hun lo awm turah thawhpui zel kan duh takzet a ni,” a ti bawk

NEIDA lam hian MFA hnenah hian Football equipments hrang hrang, Covid hri dona hmanrua leh Mizoram team camp mekte ei leh in tur buhfai, dal, tel bakah taksa tihfaina hmanraw dang thahnem tak an pe a, an thilpek hi Rs. 1,00,000 (cheng nuai khat) manhu a ni.

Mizoram a Football inelna kum hnih dawn a chawlh tawh hnuin MFA chuan Santosh Trophy a Mizoram aiawh tur player engemawzat a ko khawm a, AR Lammual ah kar thum chuang training a pe tawh a, Senior Men’s team hian November thla hian Northeast Zone Qualifying round an khel dawn a ni. Hetihrual hian National Senior Women’s Championship khel tur pawh ko khawmin AR Lammual ah kar khat chuang training a pe tawh bawk a ni.

Issued by Information & Publicity Committee
Mizoram Football Association