Sports Direct Arena-a Premier League inkhel hmuhnawm takah mikhual Chelsea chuan 3-0 in Newcastle United an hneh a, palina an ni leh ta. He inkhelah hian Drogba, Kalou leh Sturridge ten goal an thun a ni.

Line ups:

Chelsea: Cech; Ivanovic, Luiz, Terry, Cole; Ramires, Romeu, Lampard (Meireless 60′); Sturridge, Drogba (Torres 79′), Mata (Kalou 74′).

Newcastle United: Krul; Simpson, Coloccini (Perch 27′), Steven Taylor, Ryan Taylor; Obertan, Cabaye, Guthrie, Lovenkrands (Sammy Amoebi 71′); Ben Arfa (Amoebi 45′), Demba Ba.

First half: Sturridge vs Krul

Inkhel ṭan chiah aṭangin team pahnihten goal venhim ngawr ngawr aiin  goal thun an tum a chiang a, minute 4 lekah David Luiz chuan penalty box pâwnah Ba a pawtthlu a, yellow card a hmu nghal. Red card a hmu lo chu vannei tak a ni.

Midfield-a chungnung zawk Chelsea in goal chance an ngah chhunzawm hle. Newcastle defence veilamah hmunawl a awm leh duai ṭhin a, he hmunawlah hian English forward Daniel Sturridge a tal na thei kher mai. Newcastle United left back Ryan Taylor hi attacking wing back a ni a, a tlanchhuak nasa. Game dangah chuan Gutierrez nen veilamah awmdunin an invenpui tawn ṭhin kha a ni a, mahse Gutierrez suspend a nih avangin a aiah striker Lovenkrands chu veilamah a khel a, Newcastle veilam hi a pawp ngun kher mai.

Minute 12 ah Cabaye chuan penalty box chhungah Sturridge a tihtluk avangin penalty a chawi a, Frank Lampard pêt chu season ropui tak hmang mek Newcastle United keeper Tim Krul chuan a lo save. Hemi hnu, minute 15 leh 21 ah Sturridge chuan uihawm tak takin a ṭhelh bawk. Chelsea goal hlauhawm te hi Ryan Taylor defending ṭhat tawk loh vang a ni deuh zel. Mual neitu lam hian Demba Ba hmangin an thun ve teuh hle bawk.

Minute 38 ah Chelsea hian an thun ta nge nge a, veilam aṭanga Juan Mata cross chu Didier Drogba chuan awlsam angreng takin a head goal. Hei hi tunhnai BPL game 11 hnua Drogba goal thun hmasak ber a ni. First half-ah mikhual lam hi an chungnung a, midfield-ah Romeu chuan Ben Arfa an vêng hneh viau a, Juan Mata pawh a langsar leh e.

A goal thei lo

Newcastle United manager Alan Pardew chuan Ben Arfa aiah Shola Amoebi luhtirin formation a thlak. Newcastle goal nawr a na sawt a, counter attack-ah Chelsea an hlauhawm sawt bawk.

Premier League tihmuhnawm em em tu, attacking game rang tak kan hmu chhunzawm a. Minute 54 ah Newcastle United corner aṭangin Drogba chuan Chelsea goal ban a head per a, a ‘hero to zero’ hman teuh ngei mai. Hemi ball kal zel aṭanga Chelsea counter attack-ah khel ṭha tak Ramires chuan keeper chiah a awm tawh hnuin a pet goal lo bawk. Hei hi chu a pêt ṭhat loh vang ai mahin Krul save ṭhat vang a ni awm e.

Mual neitu lam tân Demba Ba a langsar tawlh tawlh a, mahse Newcastle United attacking move tam zawk chu Pter Cech tibuai lo tawk vel chiahin Chelsea defender ten an lo dang thei zel. Newcastle keeper leh defender te inkara hmunawlah Chelsea hmatâwng tlanchakte an dawk leh puat ṭhin.

Team pahnihten chance an nei mawlh mawlh a ni ber a, minute 73′ ah lut thar Sammy Amoebi shot chu goal line-ah Terry chuan a lo dang a, minute 80 ah Shola Amoebi chuan goal bar a pet per bawk. Minute 83′ ah Sturridge chuan one-on-one ah a pet goal lo bawk.

A tawpah Chelsea nge nge

Minute 89′ ah Solomon Kalou chuan penalty spot bul aṭangin Chelsea goal 2 na hi a thun a ni. He goal hi Torres thawhrah kan ti thei awm e.

Chelsea hian an la duhtawk lo a, Chelsea player khel ṭha ber Daniel Sturridge chuan penalty box chhung aṭangin goal mawi tak a thun. Newcastle United keeper hi Tim Krul ni kher lo se hattrick a siam ngei awm e.

Inkhel pumpui thlirin Chelsea an khel ṭha zawk a, chak pawh an phu zawk.

Chelsea up

Chelsea an chet chhiat lai khan player upa tawh hlawm lutuk, din thar ngai tawh niin an sawi hman hial a, mahse an player te han en hian naupang leh upa an inpawlh mawi tawk viau awm e. Tawnhriat ngah tawh Terry, Cole, Lampard, Drogba te leh naupang thaza Luiz, Sturridge, Romeu, Mata te an khel ho a ni a, form chhiat lai chu awm mahse player malkhaiah chuan Premier League team awhawm ber pawl an ni. Mata leh Sturridge ten Kalou, Anelka, Malouda te ho an nekchhuak tawh a ni ber a, Romeu hian Mikel a luahlan leh ngei dawn niin a lang bawk.

Arsenal leh Manchester United ten player naupang an neih ṭhat zia kan sawi uar a, Andre Villas Boas hnuaiah Chelsea player an naupang ve tawlh tawlh mai. Senior player ho erawh an ṭan viau a ngai. Anelka, Drogba leh Torres ten tun season Premier League-a an goal thun tawh zat belhkhawm chu 5 chiah a la ni tlat.

Newcastle United hian player ṭha filawr nei lo mahse, an khelh ṭhat rual em avanga tun dinhmun hi thleng an ni a, an thawhhona leh Alan Pardew game plan fuh vang a ni kan ti thei awm e. An game hi team game tak tak a ni a, hetiangah hi chuan player pakhat khelh ṭhat loh emaw, awm loh emaw an tuar bik ṭhin a ni. Engpawhnise, a zâwnin Manchester City, Manchester United leh Chelsea an tum tawh a, beisei ai chuan an che ṭha hrim hrim e.

Chelsea hian game 14 ah point 28 an hmu a, point 26 hmu tawh Newcastle United lehpelin top 4 ah an inhlangkai leh ta.