MPL : Aizawl in Reiek an ngamlo!

13th April 2013 at 12:07 am by Lal Zarzova

 

Aizawl-fc.jpg
Mizoram Premier League khelh meka champion thei dinhmun a ding Aizawl FC chuan Reiek khaw club Reitlang FC an hneh lova. He result avang hian Reitlang FC hi 8-na atangin 5-naah insawn chhovin relegation zone an chhuahsan a. Aizawl FC erawh 3-naah tho la awm mahse champion theihna erawh a chhe tawh hle.
 
Aizawl FC 2-3 Reitlang FC
(Lalnuntluanga 11'; Justice Morgan 53')(Zirsangzela 26'; Joseph Lalfakzuala 36'; Lalruatfela 67')
Man of the Match : Lalmalsawma (Reitlang FC)
 

Tute nge khel?

Aizawl FC : Msa; Zuala, Zohmaa, Malsawma, Thomas; Joel Thangmawia, Rinliana, Lalnuntluanga; Pauia, Justice, Zirtea.
Reitlang FC : Malsawma; Tetea, Patea, John, Mapuia; Zion, Faka, Lalnuna; Sena, Lianzama, Fela.
 

First half-ah goal thum!

Inkhelh tan tirh atangin boruak a tang nghal a, first half tir atanga a tawp thlengin chance hmuh tur a awm a. Team pahnih zinga goal thun tam zawk erawh Aizawl FC ni lovin Reitlang Fc an ni.
 
Reitlang FC lamin PC Lalnunsiama freekick hmangin chance an nei hmasa a, mahse Aizawl FC in Lalnuntluanga hmangin goal hmahruai an thun a. He goal hi MPL goal 100-na a ni a, Justice Morgan thawhrah Tluanga'n a seng a tih theih awm e. Team pahnih ten chance an in neih chhawk zak zak a, Reitlang defence a pherh a Zohmangaiha'n thelh ho viau mahse Justice Morgan a dummy leh Joel Thangmawia pass te chu hmuhnawm viau a, Joel-a volley Reitlang keeper Lalmalsawma (Mala) save pawh pui tak a ni. 
 
Aizawl FC in an chance tha an thelh hnuah Reitlang lamin goal an thun thung a, Lalnuna cross defender dang per chu Aizawl FC keeper MS Dawngliana dang hram mahse a per chu Zirsangzela'n (Sena) goal-ah a chantir a. Hemi hnu hian Sena cross chu Joseph Lalfakzuala'n lo hmang tangkaiin Reitlang goal hnihna a thun a. He goal hi referee in goal-ah pawm lawk lo mahse assistant referee in a hmuh chiang em avangin goal-ah pawm a ni a, referee thuthlukna hi a dik ngei niin replay-ah pawh a lang bawk. First half chance dang chu awm bawk mahse goal dang a luh belh tawh lo.
 

Second Half-ah Aizawl FC an nawi!

Aizawl FC in second half tan phat atangin an nawr nghal a, Tluanga cross tha tak chu Malsawma Chhangte-a'n tha takin tauh mahse Mala'n a dang hman a. Amaherawhchu Aizawl FC ball bawh anat em avangin goal erawh an thun ta thova, Joel-a ball vawrh tha tak chu Justice-a'n goal-ah a chantir a. Mahse hemi hnu Aizawl FC attack hi a nep sawt a, Reitlang FC lamin chance an nghah viau thung a. Aizawl FC defence pherh nangchhingin Lalruatfela'n Reitlang goal thumna a thun a. Hemi hnu pawh hian Lallianzama'n goal thun ngeina tur chance a nei a, mahse goal zawnah a pet lo thung. Aizawl FC in bench atanga rawn lut Michael Lalremruata hmangin chance chu an nei a, mahse an thun thei lova. Extra time-ah Justice-a'n freekick a thun loh bawk avangin Reitlang FC lakah Aizawl FC chu an tlawm ta a ni.
 

Eng nge an sawi?

Aizawl FC manager Hmingthana chuan ,"Champion kan in beisei tawh lova, mahse team dang pawh hi che chhe thei vek tho a ni a. Vawiin kha chu kan chance kan thelh hnem hret a ni e" tiin a sawi a. Hetihlai hian Reitlang FC head coach Benjamin L. Khiangte chuan,"Vawiin hian chak mahila, kan dinhmun hi a la him lova. Theihtawp kan chhuah zel ang" tiin him ngei tura theh tawp an beih tur thu a sawi ve bawk.
 

Sawi belh ang

* Aizawl FC in 2nd Phase-ah a vawikhat nan point an hloh a, hemi hma an match 3 erawh an chak fai vek thung. Aroh Joel hrem tuar hi Aizawl FC game-ah hian a hriat tak meuh meuh a. Ani hi match thum khelh a man of the match vawi hnih la thei kha  a ni a. A match thumnaah pawh hian Aizawl FC chakna goal thunin man of the match la thei tur khawpin khel tha mahse red card a hmuh vangin a hmu ta lo a ni.
* Reitlang FC hian chak an phu hrim hrim a, Aizawl FC player hlui Sena'n a club hlui tan harsatna a siam zeuh zeuh bakah 2nd Phase a vawikhatna atan rawn in lan Lallianzama Reitlang tan a khel tha a, chance tha tak thelh bawk mahse Aizawl FC defender te ti buai tu ber chu Lianzama hi a ni.

Mizoram Premier League Standing
553100_538377879546470_973728644_n.jpg

 

Comments:

  1. Lalramenga Hmar 13-04-2013 at 8:36:20 am
    Lalramenga Hmar

    A ngaihnawm thin e. Reitlang FC an chak ve leh si chuan relegtion battle hi a ngaihnawm chho dawn riau mai.

  2. Jeremy Ngila 13-04-2013 at 11:26:26 am
    Jeremy Ngila

    FCRS ho an lawm hman tawh tehlul nen, vawi hnih khat chakah an invawrh dawr dawrh zel mai a. Team 20 vel nei ve tawh ila ka ti ngawt mai.

Please login to comment