MPL : FC Kulikawn leh Aizawl FC an in draw a, Aizawl FC an sang ta ber !

7th November 2012 at 7:32 pm by Lalthanzama Vanchhawng

Vawiinah Mahindra 2 Wheelers Mizoram Premier League Round 3 khelh tan a ni a. Match hmasa berah FC Kulikawn leh Aizawl FC inkhelin 0-0 in an in draw a, point 1 ve ve an insem a ni .He inkhela Man of the Match chu FC Kulikawn midfielder Rohmingthanga a ni.

Tihian Aizawl FC in point 5 hmuin table-ah an sang ber a, FC Kulikawn in point 4 hmuin table-ah pathumnaah an awm mek a ni.

Inkhelh hma chanchin
Home team FC Kulikawn hian match hnih khelhah point 3 an hmu a, Aizawl FC hnena table-a sang ber nih an tum hle a. Team Captain Valtea a inhliam avangin Rohmingthanga a Captain thung a ni.

Aizawl FC hian point 4 hmuin table-ah Dinthar FC nen a sang berah an awm a. Tha taka bul tana hahdam taka season chawhnu lam hman an duh a, hei vang hian chak an tum hle a ni. Inhliam langsarah chuan midfielder Johny-a leh Albert-a an ni thung.

Tute nge khel?
FC Kulikawn : Ramhlunngaia (GK), Lalramchullova, Lalnunpuia, MS Dawngzela, Vanneihtluanga, Lalchhuanmawia, Lalhungchhunga (R.Lalnuntluanga), Rohmingthanga (Captain), B.Zoramthara, Suresh Singh, Kelechi Kingsley (Lalramliana)

Aizawl FC : Issac Vanlalpeka(GK), Imanuel H.S Lalthazuala, Ricky Lallawmawma, Malsawma Chhangte, Zohmangaiha Ralte, R.Lalrammawia (Brandon VL Remdika), Francis Zonuntluanga, Lalrinliana, Zoremtluanga (K.Lalrintluanga), B.Malsawmzuala (Captain) (H.Lalnunzira), Michael Lalremruata  

First half : Beisei pha lo inkhel !
Team pahnih te hian winger an nei tha a, an tlan chak a. Hei hi hmachhuanin an winger te ball an pe nasa a. Mahse team pahnih te fullback te’n an hna an tlin a, an winger te hian ball hlauhawm an chhuah thei meuh lo a ni.

FC Kulikawn lamin ‘target man’-ah Kingsley hmang lehin ahnu chiahah Lachuma a awm a, ani hi ‘free role’ pek a ni a. Mahse Kulikawn lam hian Kingsley hi an hmang tangkai thei lova, first half tawp dawnah an lachhuak nghe nghe.

Aizawl FC lam paw’n an winger te hmanga nawr a, an striker tha pahnih-Sawmtea leh Michael-a te tana ball tha siamsak an tum a. Mahse an tum an hlen thei bik lova. Inkhelin beisei a pha lova, game a dul em em bawk.

Midfield-ah FC Kulikawn an chungnung hret a. Rohmingthanga’n ro a rel a, mahse clear chance an nei meuh lova. Aizawl FC paw’n clear chance an nei lova, ‘goal mouth action’a  tlem hle a ni.

Second half : Clean sheet hmasa ber record an siam !
Second half-ah erawh goal a lut tawh ang a, game a hmuhnawm tawh ang chu tia mi tam takin an rin laiin first half ang bawkin game a dul a, goal mouth action pawh a tlem chhunzawm zel a ni.

Aizawl FC lamin an nawr zawk a. Midfield-ah Francis-a’n ro a rel ve thung a. Mahse FC Kulikawn lam an insiamtha thuai a, ‘midfield battle’ a hmuhnawm chho dawn chauhva, long ball-in an khel leh ve ve a, inkhelin beisei a pha lo chhunzawm leh a.

An khelhdan enin an inhrechiang a, an indangtawn ve ve a, an inhlautawn deuh niin a lang. Goal a lut thei meuh lova, goal awm lovin an in draw ta a ni.

MPL KULIKAWN VS AIZAWL FC.jpg

MPL table ..jpg

Sawi zui ang
Team pahnih te hian game hmasa lama an game an pha lo ve ve a. FC Kulikawn lamin Luangmual an hneh tuma an game an pha lova, an tumpui Aizawl FC lamin an game plan an hrechiang a, an dang hneh ni berin a lang. Kingsley hi an hmangthiam tawk lo nge Kingsley hian FC Kulikawn game plan hi a man fuh loh zawk tih hi zawhna lian tak a ni.

Aizawl FC lam paw’n Dinthar FC an draw tuma an game an pha lo hle a. An game plan a fuh tawk lo deuhva, FC Kulikawn defender te an sutlang zo meuh lo a ni. Midfield atang duhthusamaa ball han semkual tur an nei lo an tuar niin a lang. An defender te an kheltha a mahse an hmatawng Sawmtea (Captain) leh a pawlte’n an pet goal thei tlat lo thung.

Man of the Match : Rohmingthanga (FC Kulikawn)

Inkhel Highlights

Comments:

  1. Eddya Pa123 07-11-2012 at 8:07:43 pm
    Eddya Pa123

    a NGAIHNAWM THIN E

  2. Lalramenga Hmar 07-11-2012 at 8:30:14 pm
    Lalramenga Hmar

    Rohmingthanga hi a zawnin man of the match a ni ta ni maw? Transfer thleng ta se tih article ah khan a hming a awm a, Kulikawn chuan an la fuh cher cher hle mai.

    Rin aiin Aizawl FC hi an pet goal thei lo reuh :)

  3. sakaralte 07-11-2012 at 9:06:53 pm
    sakaralte

    ROHMINGTHANGAAAAAAAAAAAAAAAAAAAAAAAAAAAAAAAAAAAAAAA

  4. lalmama 08-11-2012 at 10:26:38 am
    lalmama

    an lo in draw nimaw..

Please login to comment