MPL : Goal thun thei lo FC Kulikawn leh Chanmari FC an in draw !

16th November 2012 at 8:57 pm by Lalthanzama Vanchhawng

Mahindra 2 Wheelers Mizoram Premier League (MPL) Round li-na khelh chhunzawm zel a ni a, FC Kulikawn leh Chanmari FC intumin 0-0 in an in draw a, point 1 ve ve an insem a ni. He inkhelha Man of the Match chu FC Kulikawn player Rohmingthanga niin match thum Man of the Match ni thei hmasa ber a ni.

Tihian FC Kulikawn-in match li-ah point nga an hmu a, table-ah panga naah an awm a (GD neitha zawk Aizawl FC an tluk lo a ni). Chanmari FC erawhin match thum khelhah point hnih an hmu a, table-ah pasarih naah an awm thung.

Inkhelh hma chanchin
FC Kulikawn hian an match hmasa berah Dinthar FC an hneh lova. Match hnih naah insiamthain Luangmual FC an hneh a, an match thum naah goal awm lovin Aizawl FC an draw a ni. Chak an tum hle a, Manager paw’n Playoff atanga kaithar Chanmari FC hneh loh  kan duh lova, hneh kan tum dawn a ni” tiin a sawi nghe nghe.

Chanmari FC lam hian an match hmasa berah Luangmual FC 1-1 in an draw a. An match hnih naah 1-0 in Reitlang FC an hneh lova, chak loh an duh tawh lova, chak an tum hle a ni. Khelh pangaiah Chanmari FC hian minute 180 chhung goal an thun tawh lova, vawiina inkhelah pawh squad an siksawi deuhva, goal thun an tum hle a ni. First division hlun annih avanga an hlauh loh thu pawh Coach Lch-a’n a sawi nghe nghe.

Tute nge khel?
FC Kulikawn : Ramhlunngaia (GK), Lalthanzama, Vanneihtluanga, Lalnunpuia, MS Dawngzela, Lalchhuanmawia (Lalrintluanga Hauhnar), Rohmingthanga(Captain), Lalhnehzova (Lalramliana), B.Zoramthara, N.Suresh Singh (Lalrinchhana), Lalrintluanga Hauhnar, Lalhungchhunga

Chanmari FC :  Lalawmpuia (GK), Lalrinchhana, Zothanpuia, C.Zomuanpuia, Lalhriatrenga, Lalbiakhlua, R.Lalrammawia (R.Malsawmtluanga), Malsawmzuala, Lallawmsanga (Captain), Malsawmdawngliana, Lalhlimpuia (MS Dawngliana)

First half : Goal a lut lo, mahse chance a tam !
Home team FC Kulikawn lamin hmatawngah Suresh Singh bawk hmang lehin a sirah tharum ngah leh chak Lalhungchhunga (Lachuma) leh Lalhnehzova te an dah a, nawr nat an tum hle a. Playmaker-ah Rohmingthanga bawk awm lehin Suresh-a thlawp turin B.Zoramthara bawk dah leh a ni.

Chanmari FC lamin squad an siksawi nasa a. Malsawmdawngliana, Lalhlimpuia (Tat-a) leh Lalrammawia te hmatawngah an dah a. Nidanga an game ang lo takin short passing leh game mawi khel hran lovin ‘hit and run’ ang chiin an khel a. Match hnih chhungin inkhelh pangaiah goal an thun lova, hei vanga player han siksawi pawh an ni a, ‘risk’ an la pawh a tih theih awm e.

FC Kulikawn-in an nawr nghal a. Chutih rualin Chanmari FC lam counter attack-ah an hlauhawm thei hle a. FC Kulikawn lamin game an thunun deuh zawk a. Mahse Chanmari FC lam an insiamtha a, an nawr let ve thei zel a. Clear chance sawi tur a awm meuh lova mahse half chance leh shot a tam hle thung a ni.

FC Kulikawn lamin an winger te an hmang tangkai a mahse Thangpuia leh Rinchhana te an sutlang zo meuh lova, Chanmari Keeper Lalawmpuia’n ball a man zing malh malh hle a ni.

Chanmari FC lamin game style thar an khel a. An la in adjust thei lo a tihngam a, an khel erawh a hmuhnawm hran lo, mahse an hlawhtlinpui teuh thei hle a ni.An striker Tata ‘form’ deuh phei se chuan a pet goal ngei ang le. Lalthanzama tihsual nangchingin Tata hian clear chance tihngam a nei a mahse a tuan a muang deuh tawh a, Kulikawn defender MS Dawngzela (Notea)'n a rawn nangching hman hlauh a ni. Kulikawn Angaia ‘move’ a mawiin a dang tha thei hle bawk.

Beisei pha lo Second half-ah goal a lut lo tluan !
Chanmari FC lamin chak loh an duh lova, chak ngei an tum a. An tang hle a. Chutih rualin Kulikawn lamin midfield-ah Team Captain Rohmingthanga hmangin ro an rel a. Rohmingthanga hian a kheltha mai ni lovin a chevel, a ball vawrh leh a passing hrim hrim hian ‘player class’ sang anih zia a pholang chiang viau awm e.

Chanmari FC lamin Team Captain Rochhingpuia awm lo an tuar deuh a tih theih a, Kulikawn hmatawng te’n box pawn atang shot-na chance an ngah phah hle a ni. Tata bawkin clear chance tihngam a nei leh a. Kulikawn Keeper Angaia nen one on one chance an nei a, mahse Angaia hian tha takin a lo dang a, Chanmari FC lamin an ui khawp ang le. Sawmdawnga ball head luh Angaia lo save pawh mawi tak a ni.

Kulikawn lamin Lalrammawia an luhtir a. Rammawia hi a talna nghal hle a. Mahse ani pawh hian Kulikawn mamawh goal a thun thei bik lo a ni. Goal a luh lova, 0-0 in an inhneh tawk a, point 1 ve ve an insem ta a ni.

Sawi zui ang
FC Kulikawn hi Striker tha Zothansanga (Valtea) leh Nigerian striker sang Kingsley tel lova khel an ni a. Match hnih (180 minutes) chhung chu goal an thun tawh lo a ni. An hmatawng te hian inenfiah an mamawh hle a ni.Chutih rualin Chanmari FC Central Defender sang lo sutlang tur leh air ball-a ball tauh lut tura Kingsley an dah lo kha chu thilmak a ni. A ball khawih a mawi lovin a tha tawk lo kan ti pawh a ni thei. Mahse feet 6 leh inches 2 a sang chu a hnawk pha hrim hrim a ni. Duh aiin Suresh a chetha tawk lova, tin ball an pe tam tawk lo bawka, a hlauhawm tur angin a hlauhawm thei lo a ni. Match lehah chuan goal thun ngei an tum dawn a, an hmatawngte an siksawi ngeiin a rinawm.

Chanmari FC lamin inkhelh laia minute 180 chhung goal an thun tawh loh avangin huaisen takin an hmatawngte an siksawi a. An tifuh teuh hle. Tat-a chance thelh zozai te an ui khawp ang le. Team Captain Rochhingpuia a inhliam avangin a khel thei lova, field chhunga team ho thei tur an nei lova, an tuar a ni. Vawiinah goal an thun lo leh tawh a, match thum chhung inkhelh pangaiah goal an thun tawh loh avangin an inenfiah viau a ngai tawh ang. An khelhdan thin anga khelin striker tha tak nei bawk se chuan Chanmari FC hian goal an thun nual tawh ngei ang le.

Man of the Match : Rohmingthanga (FC Kulikawn)

Comments:

  1. Hriat Puia 16-11-2012 at 9:28:50 pm
    Hriat Puia

    post a ngaihnom e..mce tihsual palh om a nih hmel a tirah 1-1 tia top ah 0-0 tih leh sia a khoi zawk nge dik zok

  2. Hriat Puia 16-11-2012 at 9:31:06 pm
    Hriat Puia

    chuan a top statistic ah 0-1 ni leh daih bok..:-)

  3. Marka Pa 16-11-2012 at 10:16:34 pm
    Marka Pa

    Lalthanzama Vanchhawng

    "Mahindra 2 Wheelers Mizoram Premier League (MPL) Round li-na khelh chhunzawm zel a ni a, FC Kulikawn leh Chanmari FC intumin 1-1 in an in draw"

  4. Marka Pa 16-11-2012 at 10:17:24 pm
    Marka Pa

    Goal awm lovin tiin commentator in i ti sia?? :)

  5. kimkima chennai 16-11-2012 at 11:06:03 pm
    kimkima chennai

    Home team Chanmari FC lamin hmatawngah Suresh Singh bawk hmang ??????????????????????????????

  6. Marka Pa 17-11-2012 at 7:02:28 pm
    Marka Pa

    Zama, live a min hmuh tlai hi chuan zan ah i ti dik lo ve ziah :D

  7. Lalthanzama Vanchhawng 19-11-2012 at 9:19:13 am
    Lalthanzama Vanchhawng

    @marka pa : ni ngawt mai :) ka hmu tawh lovang che, min chhiat tlat. haha

Please login to comment