MPL : Mizoram Police FC-in 2-1 in Luangmual FC an hneh hram !

10th November 2012 at 7:23 pm by Lalthanzama Vanchhawng

Vawiinah Mahindra 2 Wheelers Mizoram Premier League (MPL) Round 3 khelh zawh a ni a. Mizoram Police FC (MRP FC) leh Luangmual FC inkhelin 2-1 in Mizoram Police FC an chak a, table-ah pahnihnaah an inhlangkai a ni. He inkhelha Man of the Match chu Mizoram Police FC Keeper J.Vanlalhriata a ni.

Mizoram Police FC tana goal thuntute chu Lalbiakhlua leh Lalchhuantlinga te an ni a. Luangmual FC goal awmchhun thuntu chu Denghmingthanga a ni thung. Round 4 hi November ni 14 ah khelh chhunzawm a ni ang.

3.jpg

Inkhelh hma chanchin
Mizoram Police FC hian an match hmasa berah FC RS Annexe an hneh lova. Annexe hian an chhaihkawlh a ni ber mai. MRP FC hian an match hnih naah 5-1 ngawtin Reitlang FC an sawp a, Luangmual FC pawh hi hneh an tum a, chak an tum hle a ni. Match hnih khelhah point thum an hmu mek a ni.

Luangmual FC erawh Coach Vanlalrova tel lova khel tur leh bawk an ni a. Tin, an star player Jerry Zirsanga a la inhliam bawk a. Asst.Coach Saitea hovin chak an tum hle a. An match hmasa berah Chanmari FC an draw a, an match hnih naah FC Kulikawn an hneh lova, chak an mamawh hle a ni.

4.jpg

Tute nge khel?
Mizoram Police FC : J.Vanlalhriata (GK), Lalrinchhana, K.Lalremruata, JS Lalruatthara, Lalhruaitluanga, Lalfakzuala (Lalchhuantlinga), Sama Hnamtea (Captain), Laltanpuia, C.Lalnunmawia (Davis Malsawmpuia), F.Lalrinpuia, Lalbiakhlua

Luangmual FC : Saitluanga (GK), Lalruatthara, B.Lalrawngbawla (Biaksangzuala), Lalrimawia, K.Lalthanpuia, Lawmsangzuala, Isaac Lalrinngheta, Rosangliana, Lalmuankima, F.Lalmuansanga, Denghmingthanga (Captain) (Racy K.Lalremmawia)

1.jpg

First half : A kheltha zawk Luangmual FC-in si an phur !
Inkhelh tan a ni a, game a rang nghal a. Luangmual FC-in an squad an siksawi nasa a. Midfield laiah Aldrin-a, Lalruatdika leh Lalbiaktluanga te aiah Lawmsangzuala (Lalmama), Isaac Lalrinngheta leh Rosangliana (Rsa) te an dah thung a, an tifuh hle. An game a rangin an passing a mawiin a hmuhnawm a. MRP FC lam an bet a. Luangmual FC lamin an nawr chhunzawm zela, Team Captain Denghmingthanga’n goal post a pet per a. Luangmual FC an phur chhunzawm zel a mahse an pet goal thei lova.

Lalmuankima’n vawithum zet tha takin a shot a, mahse MRP FC Keeper ‘thlawkthei’an tih thin J.Vanlalhriata’n mawi takin a lo dang zel a, MRP FC an him phah a ni. Mahse minute 37-ah MRP FC lamin goal an thun zawk tlat mai ! MRP FC striker bench atang rawn lut Lalchhuantlinga’n tha takin ball a head lut a, MRP hmatawng Lalbiakhlua’n chak taka um lutin Luangmual FC defender Lalrimawia leh Keeper Saitluanga te an inringthul a, Biaktea’n chiang zet zawtin a pet goal a, MRP FC fan thawm a tha hle ! Goal dang a luh belh lova, 1-0 in first half a tawp a.

2.jpg

Second half : Mizoram Police nge nge !
Second half tan a ni a, ‘midfield battle’ a hmuhnawm a. MRP FC te’n an hmatawng tlanchak Biaktea, F.Lalrinpuia (Valpuia) leh Nunmawia te hmangin an nawr a, ball an vawr lut nasa a. Chutih rualin Luangmual FC lamin Rsa, Lalmama leh Isaac-a te hmangin midfield play mawi tak tak an nei a. Mahse MRP FC defender te an sutlang zo meuh lova.

Minute 57 naah Luangmual FC lamin an duh an hmu ta ! Local football-a hmingchher tak Denghmingthanga’n Ruatthara ball vawrh luh tha tak chu mawi takin a lo tauh lut a, Luangmual FC fans leh player-te an sapatal a ni ber. Luangmual FC an phur thar a, an nawr chhunzawm a. Mahse MRP FC lam counter attack-ah an hlauhawm thei hle a.

Minute 69 naah MRP FC zawkin goal an thun leh tlat mai. MRP FC defender Lalhruaitluanga’n overlapping tha tak rawn lain Luangmual FC defender te tana lak har tur tawk velin ball a pe lut a, Luangmual FC defender Bawla’n lo dang pialin MRP FC striker Valpuia’n Bawla dan per chu a tlan luhpui nghal a, a chhaka chan (mark) lohva awm Lalchhuantlinga tan ball pe chhovin , Chhungtlinga hian awlsam tein a lo pet goal a ni. MRP FC in 2-1 in hma an hruai der mai.

Luangmual FC lamin an siphurh sut an tum chhunzawm zel a. Bench atanga rawn lut Racy K.Lalremmawia leh Lalmuankima te’n half chance an nei a, mahse an hmang tangkai thei lova. MRP FC hmatawng tlanchak Biaktea leh Valpuia te an hlauhawm tluan zak a. Mahse goal dang a luh belh tawh lova, 2-1 in MRP FC an chak a ni.

MRP VS LFC STATS.jpg

 

Sawi zui ang
Inkhel tir lam minute 30 vel en chuan Luangmual FC an chak kan ring ngei ang le. Mahse minute 90 chhung inkhelh tur a ni a, ball chan tam leh passing mawiin chak leh chak loh a hril lova.

Luangmual FC lamin an midfield an siksawi fuh a, chutih rualin MRP FC defender thate an sutlang thei lo an tuar phah a ni. A nawr zawkah tangin chance tha tak tak an thelh a. A goal ngei tura rin tawh MRP FC Keeper Hriata’n vawi tam alo dang hman a. An vanduai a tih theih bawk awm e. Mahse MPL hi league-a khelh tur a ni a, game a la tam a, an game a dik a, an game a mumal a, an insiamtha leh vat turah ngai ang.

Chutih rualin an defender te duh angin an kheltha tawk lova. Vawiina full back te’n an hna an tlin lo deuhva, tin vawiina goal hnih an lama lut kha an marking chhiat vang leh concentration an hloh vang ve ve a ni. An nawr luatah an mawng a pawp a, an chak loh phah a ni.

Mizoram Police FC khel hi a hmuhnawm hran lova, an khel pawh a mawi hran lo. Mahse mi tam takina an sawi thin angin , Mizoram Police nge nge tih an nitlat ! An khelhchhiat ni paw’n point an hlawkchhuah thei a, an chak thei a, an fakawm takzet. An player te tawnhriat ngahna an hmang tangkai a, a bet zawka an tang chung paw’n an chiai lova, an tang thei hle a ni.

Midfield laiah an hneh em em hran lo, mahse an winger te an hmang thiam a, counter attack-ah an hlauhawm a, Luangmual FC fullback te that lohna lai hriain an attack fuh a, an chak phah a ni. Tin, defender te’n kheltha em em lo mah se goal an chhuah tha duh meuh lo bawk. Tin, Keeper Hriata’n a chhanhim a tih theih awm e, Hriata hi a thlawk thin a ni ber mai.

Man of the match : J.Vanlalhriata (Mizoram Police FC)

MPL Table 10Nov-001-001.jpg

 

Comments:

  1. evergreen 12-11-2012 at 4:02:49 pm
    evergreen

    En ve a chakawm thin mang e. Mizoram police hi ka tan riau a nia kei chu..hehe

Please login to comment