MPL : Reitlang an vannei, Chanmari FC 1-0 in an hneh !

10th November 2012 at 6:00 pm by Lalthanzama Vanchhawng

(ZoFooty.com in chhiat kan tawk a. Kan ambassador Sangsangi Pa a boral a. Internet a lo chhe bawk nen, kan lo inringthul a, nimin inkhel review a hunah tak kan rawn tichhuak thei lova, ZoFooties te hriatthiam kan ngen tak meuh a ni.)

Mahindra 2 Wheelers Mizoram Premier League (MPL) Round 3 khelh chhunzawm zel a ni a. Nimina inkhelah home team Reitlang FC chuan 1-0 in Chanmari FC an hneh a, point thum hlawhchhuakin table-ah paruknaah an awm chho a ni. Reitlang FC tana goal thuntu chu Vannunmawia Vanchhawng niiin Man of the Match chu Reitlang FC midfielder PC Lalnunsiama a ni.

Inkhelh hma chanchin
Reitlang hian match hnih khel tawhin point an la hmu lova, an match hmasa berah an chak tawh dawn emaw tih hnuah Aizawl FC an hneh lova. An match hnih naah Mizoram Police FC lakah an tlawm bawk, chak an mamawh mai ni lovin an chak ngei ngei angai a ni. League a ni a, hun ala tam ti mah se, match thum a zawna an chak loh chuan an rilru a hnual ang a, inrintawkna an hlauh ve thei a ni. Match hmasa bera red card hmu Simon-a a khel leh thei tawh dawn bawk a, defence a phui sawtin a rinawm.

Chanmari FC hi MPL team zinga MPL kick-off hnua chawl rei ber leh hahdam rei ber an ni a. Match hmasa ber an khel a, Round 2-ah ruahsur vangin an khel thei lova, ni 16 hnuah an inkhel leh chiah a ni. An Asst.Coach leh player hrem tawkte hmel pawh kan hmu leh tawh bawk a. Sound system nen an rawn thawkchhuak a, chak loh an duh lova, an duh lo mai nilovin chak loh an thiam lova, chak an tum hle a ni.

Tute nge khel?
Reitlang FC : Benjamin Lalrinsanga (GK), Simon Hmingthanzuala (John Malsawmtluanga), Lalruatkima, B.Lalramdinpuia, PC Vanlalmuanawma, Zion Lalramluaha (Captain), PC Lalnunsiama, Vannunmawia Vanchhawng, Lalruatfela, H.Lallianzama, Zirsangzela (Lalvensanga) (Zohmingthanga)

Chanmari FC :  Lalawmpuia (GK), Lalrinchhana Tochhawng, Zothanpuia, Lalnghinglova (Malsawmdawngliana), Lalhriatrenga, Malsawmzuala, Lalbiakhlua, MS Dawngliana, R.Malsawmtluanga, R.Lalrammawia (C.Lalnuntluanga), Lallawmsanga (Captain)

First half : Chanmari FC an chungnung mahse a goal thei lo !
Chanmari FC player te hi MPL team-a chawhruala ‘te ber’ an ni a. Reitlang FC erawh ‘sang ber’ an nitung. Hei vang hian Chanmari FC lam hian ‘air ball’-ah an hlauhawm lo tih an inhria a, ground ball-in ball an inpe nasa a ni.

Chanmari FC hian striker - 'target man' tih tur ang an hmang lova. An tihdan thin angin midfield-a ball inpek tam a, defence thiah an tum a ni. An khel a mawiin an khel a hmuhnawm a, an rang hle a. Reitlang FC player te karah an pit zeuh zeuh a ni ber mai. Mahse Reitlang FC defence an thiat zo meuh lo a ni.

Reitlang FC an fimkhur a. Anmahni aia game rang khel an tum tih an hria a. An tawngpawng nawr duh lova. Target man-ah Zirsangzela (Sena) hmangin a hnungah Vannunmawi (Nuntea) an dah a. Defensive midfielder pahnih Zion-a leh Lalnunsiama te an hmang a, fimkhur takin midfield-ah ball chan hnema, game thunun a, Counter attack atanga goal thun an tum ber a ni.

Midfield battle a hmuhnawm a, mahse clear chance an nei thei lo ve ve a. An defender te ve ve an fakawm a, ‘goal mouth action’ a tlem hle a ni. Chanmari FC lamin ball an chang hnem zawk a, game an thunun a, mahse an pet goal thei meuh lova. Reitlang FC lamin counter attack atang an nawr ve reng a, Reitlang FC target man - Sena a ‘nil’ hle a, duh angin an nawrna tawk thei lo a ni. Goal inpe lovin first half a tawp a.

Second half : Game plan mumal nei Reitlang FC an chak !
Reitlang FC lamin an player an siksawi deuh a, an tifuh khawp mai. First half-a ‘nil’ tak Sena lachhuakin Reiek rawlthar, U-19 player Lalvensanga (Ventea) an dah lut a. Sena position-ah Lianzama tawlh chhovin Nuntea leh Aruattea te a sirah an awm thung a. Lianzama hnungah Ventea awmin ‘free role’ pek a ni a. Game-ah chuan a bet zawkah an tang chhunzawm zel a, mahse an game plan tihngam ‘counter attack’-ah an hlauhawm thei hle a ni.

Chanmari FC lamin Reitlang FC defender pasang leh tharum ngahte an sutlang zo meuh lova. Air ball ah nise, Reitlang FC defender te’n an head khalh zel a, hei vang hian box pawn atang an shot hnem a. Hmunawl an hmuh apiangin an shot pawp pawp zel a, mahse hlauhawm tak erawh a awm meuh lo a ni. An game plan an thlak si lova, hneh deuh siin goal an thun thei lo a ni.

Reitlang FC lamin a bet zawk nih pawi anti lova, defender pali an hman bakah defensive midfielder pahnih an hmang tel bawk a. An tum erawh counter attack atanga nawr thut ala ni reng a. Minute 77 naah Reitlang FC lamin an duh an hmu ta. Counter attack atang an nawr let a, Lianzama ball head tha tak chu Vannunmawia Vanchhawng-in luh puiin Chanmari FC defender te tana dan hman lohvin chiang zet zawtin a pet goal a, Lammual leh Reiek a nghing a ni ber mai.

Chanmari FC lamin an siphurh sut an tum a. Sawmdawnga te an luhtir a, mahse awmzia a awm thei meuh lo. Reitlang FC am an chesual nawn duh tawh lo. Aizawl FC an hneh loh tuma thleng ang kha a thlen leh an hlauva, Coach Chawnga’n a naute a fuih a, a naute’n an tihtur dik tak an ti a, 1-0 in an chak phah a ni.

Sawi zui ang
A zawna chak lo Reitlang FC-in point thum an hlawhchhuak thei hi an fakawm. Player te inpekna leh Coach game plan a fakawm a ni. Bet zawk nih an hreh lova, bet zawk mah nise an game plan-ah an chiang a. An tum an hlen thei a, an fakawm tak zet zet. Chutih rualin striker hriam tak nei phei se chuan an hlauhawm lehzual ang. Sena hian beisei ala pha lova, Lianzama te lah finishing nei tha lo mahse defender tana hnawksak si an ni a, striker complete tak pakhat chu neih belh se chuan tawh an khirh khawp ang le.

Chanmari FC player te hi ball thiam leh khel mawi tia sawi ngam an ni a. Mahse an chak lohna erawh striker tha an nei lo hi a ni. Midfield play a mawi a, inkhel an thunun a, an rang hle a mahse chak tur chuan pet goal a ngai si. Pet goal thei tur striker an nei lova, midfield play mawi lo ‘finish’ tu leh ball tha lo dawngtu tur an nei lo an tuar a ni.

Reitlang FC lamin an khel mawi hran lo mahse an game plan an hmang tangkai a, an pet goal tlat. Chanmari FC lamin an khel mawi a, an shot hnem mahse goal an thun thei si lova an chak loh phah a ni.

Man of the Match : PC Lalnunsiama (Reitlang FC)

Reitlang.jpg

Table as on 10/November/2012 (18:00)

 

Comments:

  1. Lalramenga Hmar 11-11-2012 at 1:09:10 am
    Lalramenga Hmar

    A va mak thei tehnawlh ve mawle. Reitlang FC hi Luangmual FC tih lohah chuan ka tran ber.

  2. Lalramenga Hmar 11-11-2012 at 3:04:11 am
    Lalramenga Hmar

    Chanmari FC chuan a nawr chu an nawr hle mai. An vanduai ni a ni a nia nge.

  3. evergreen 12-11-2012 at 4:09:04 pm
    evergreen

    A ngaihnawm e.., reitlang an lawmpui awm! btw Sangsangi Pa boral chu a va pawi ve! RIP

Please login to comment