Brazilian rawlthar duhawm leh Santos Striker ni bawk Neymar da Silva Santos Júnior chuan kum 2011 a khelh that em avangin South American Player of the Year Award ah thlan a ni.

Neymar hian he Award vawi-26na dawng tur hian Universidad de Chile star player Eduardo Vargas chu vote 60 ngawtin a hneh a, Neymar hian vote 247 atangin vote 130 a hmu a. Neymar hian record siamin kum 2009 a Estudiantes midfielder Juan Sebastian Veron an vote 109 a lo hmuh tawh chu a khum a ni.

Neymar a khelhpui Paulo Henrique Ganso chu pathumna niin palina ah Uruguay leh Tijuana midfielder Egidio Arevalo Rios chu a awm bawk.

Neymar tan hian 2011 hi kum tha a ni ve reng reng a, Copa Libertadores leh Campeonato Paulista ah a team Santos chu a Champion pui a. Hei bakah hian Club World Cup ah Santos hi final a thlen pui bawk. Brazil tan pawh Neymar hi a langar hle a, February thla a South American Under 20 Championship neihah khan goal 9 thunin an ram a champion pui bawk.

Uruguay 2011 Copa America Champion puitu Oscar Tabarez chu Coach of the Year a thlan a ni a. Ani hian he award hi nikum lam pawh khan a lo la tawh bawk.