Arsenal football club chu tunhnaiah a chet chhiatzia leh player thar a mamawhzia chu hai rual anilo. Manchester United in 8-2 a Old Trafford a an hneh hnu khan Arsenal muthlu chu kaihthawh a ni a, tunhnai ni 4 chhung hian Arsenal hotute chu chhun leh zanah te thawkin player an dap kual nasa hle niin a lang. Player in lei hun a tawp meuh chuan hun rei tak chhunga Gooners (Arsenal fans te sawina) ten an lo beisei thin ‘world class’ pali te chu an la fel thei ta. Arsena a lut thar te chu :-

Per Mertesacker 10 million pounds vel bawra lei hi 2005 atang khan Germany leh Werder Bremen rinrawl a ni tawh a. Tunah hian kum 26 mi niin tawnhriat a ngah tawh hle. Euro leh World Cup ah te kan lo hmelhriat tha tawh hle awm e. He defender ft 6’6 a sang hi Premier League ah pawh a sang pawl niin Arsenal tlar hnung in a mamawh tak anih hmel hle. Thomas Vermaelen nen an inkawp tur chu mi te thlir chak a tling hle awm e. Mertesacker hian Arsenal ah hian Fabregas kalsan tak no 4 chu a ha dawn a ni.

Andre Santos Turkish club Fenerbahce atanga 7 million pounds vela lei a ni a. Copa America leh World Cup ah te kan lo hmelhriat ngei tawh ang. Kum 28 mi left back hi Kieran Gibbs nena hmun inchuh tura ngaih a ni a. Santos hi tlan chak leh goal thun thei tak a ni a, Fenerbahce ah khan Roberto Carlos hnuaiah a inzir nasa hman nia sawi a ni. Arsenal ah hian Carlos Vela hak thin no 11 a ha dawn a ni.

Mikel Arteta Premier League ah chuan mi thar a ni love. Everton rinrawl thin hi Cesc Fabregas hmunawl hnawhkhat tura duh ber thin chu a ni a. Beisei a bo nia a lan laiin Arsenal hotute thawhrimna a zarah Arsenal hi ama duhthu ngei in a zawm dawn ta niin a lang. Kum 29 mi Arteta hian upat lam a hnaih avangin Champions League football te khelh ve a chak niin sawi a awm bawk. Arsenal hian Arteta manah hian 10 million pounds vel a pe nia rin a ni.

Chu Young Park AS Monaco atanga 5 million pounds vel bawra lei a ni a. Tuna South Korea captain nilai mek hi striker goal thun thei tak a ni a. Kum 26 mi niin a vanglai tak a hmang mek a. Ball a thiam bakah a che rang a. Arsenal in tlar hma lama 4-4-2 formation an hman a tul pawha player pawimawh tak tur anih a rinawm. Arsenal in player tawnhriat nei tha an mamawh tak niin a lang. Arsenal ah hian Eduardo in a lo kalsan tak no 9 a ha dawn a ni.

Yossi Benayoun West Ham, Liverpool leh Chelsea ah te lo khel kual tawh a ni a. Tunah hian kum 31 mi ni tawhin a thiam a la theihnghilh lova. Premier League a thiam avanga player hnawksak te zinga chhiar tham chu a ni. Arsenal hian Chelsea atangin Benayoun hi an lei chhuak lova, tun season chhung an hawh dawn a ni. Benayoun hi attacking midfielder niin Liverpool ah a hun thatlai ber a hmang niin a lang a, Arsenal tan hian thawh ve tur a la neih ngei a rinawm. A hlawh tur hi kar khata 70,000 pounds vel bawr nia rin a ni.

Heti hian Arsenal chuan ni 4 chhungin player 5 a la a. Park Ju Young, Andre Santos, Per Mertesacker, Mikel Arteta, Yossi Benayoun leina tur hian Arsenal hian Andy Carroll Liverpool in an leina man pawh an hmang senglo tihna a ni. Heng player thar te hian Arsenal squad naupang te chu a dawmkang thei tura ngaih a ni.

Player lut an awm lai hian chhuak an awm ve bawka.Nicklas Bendtner chu loan in Sunderland a pan a.Henri Lansbury chuan loan in West Ham a zawm a. Gilles Sunu chu Lorient ah hralh a ni a. Player thar work permit la hmu theilo Joel Campbell chuan France ah Sunu hi zui in Lorient a zawm ve leh bawk dawn a ni.