French striker Nicolas Anelka chungchangah Chinese club  Shanghai Shenhua leh English club Chelsea te an inrem tawh. Anelka hian kum 2012 January thla aṭangin Shanghai Shenhua hi a zâwm dawn a, kum 2 daih contract a ziak a ni.

Kum 32 a upa Anelka hi Real Madrid, Arsenal, Paris Saint-Germain, Fenerbahce, Manchester City leh Bolton Wanderers ah te a lo khel kual tawh a, a khelhna hmun apiangah player pawimawh tak a ni zel a tih theih awm e. Kum 2008 ah Chelsea a zawm a, Stamford Bridge-a kum thum a châm chhungin game 184 ah goal 59 a thun a ni.

Shanghai Shenhua director Zhou Jun chuan chanchinthar lakhawmtute kawmin, Anelka an lalût tur chuan Chinese football-ah hmasawnna a thlen ngei a rin thu a sawi a. Footballer naupang zawkten an entawn a, football level sâng zawk a thlenpui ngei a beisei thu a sawi a ni. “Hei hi a bulṭanna a ni a, hmasawn tur chuan ramdang aṭanga player ṭha tak tak lakluh hi kan mamawh a ni.” a ti.

Anelka hlawh tur chungchang an zawhna chhangin, “Anelka hian Chelsea-ah kumkhat chhungin euro maktaduai 5.8 a hlawh mek a, China-a a rawn kal hunah pawh hei aia hniam hi chu a hlawh lo ang.” a ti. Report hrang hrang aṭanga a landanin Anelka hian karkhatah £170, 000 vel a hlawh rin a ni.

Shanghai Shenhua hi season hmasa khan Chinese League-ah 11 na an ni a, Anelka bakah hian Bordeaux coach hlui Jean Tigana chu manager turin an be fel ṭep tawh tih an puang bawk.

source: chelseafc.com