A vanglaia football fans te’n goal khat tal thun lo chuan a awm thiam lo antih thin ‘Scoring machine’ an tih mai Ruud Van Nistelrooy chuan a ball boot a khai thu a puang ve ta. Season tharah chuan field chhungah Nistelrooy-a che vel kan hmu tawh dawn lo a ni.

Kum 35-a upa Nistelrooy hi tunah hian Malaga-ah a khel mek a. A contract renew a tum tawh lova, tun nipui chawlh lai hian inkhelh chawlhsan a tum a ni. Netherlands-in Euro khel tur squad an puanah khan a tel lova, hei vang hian a hma thei ang bera football chawlhsan a duh a ni.

Nistelrooy chuan “Ka match hnuhnung ber ka khel tawh a. Ka upa tawh a, ka duh angin ka fit tawh lova, tunah chuan football chawlhsan chiah ka hmabawk tawh a ni. Ka club khelh tawhna zawng zawng leh ka chhungte hnenah lawmthu ka sawi duh a. A bikin ka thiante leh ka fans te chungah lawmthu ka sawi duh bawk a ni. Tin, chawimawina leh lawmman ka lak zawng zawng te kha ka ngaihlu in ka lawm tak zet zet a ni” a ti.

Nistelrooy hian 1993 atang khan football a khel tan a. Dutch club Den Bosch tan khel tanin Heerenveen leh PSV-ah a khel leh a. 2001 khan Manchester  United-ah khel tanin record a siam nghal a. Match 8 ngawt a zawnin a pet goal a. A zawna pet goal rei ber record a siam nghal a ni. Kum 5 chhung zet a khel a, hming a chher hle.

2006 khan Real Madrid a zawm leh a. Real Madrid-ah pawh hian a thiam thil a la theihnghilh lova. La Liga-ah top scorer a ni nghal a. La Liga-a a zawna goal thun rei ber record a zuk nihrual leh bawk a. A zawnin match 7 ngawt goal a thun a, Hugo Sanchez nen chiah hetiang ti thei hi an awm a ni.

2010-2011 season-ah erawh Hamburger SV-ah khel lehin match 36-ah goal 12 ngawt a thun leh hram a. Nikum khan Malaga-ah lut lehin kum khat a khelh hnuah football a chawlhsan thu a puang ta a ni.

Nistelrooy hian ram tan match 70 khel hmanin goal 35 a thun hman a. Euro 2004, 2006 World Cup leh Euro 2008-ah te ram tan a khel a. Club football bikah hi chuan tournament hrang hrangah match 588-ah goal 347 zet a thun a ni. Tunah hian Champions League-ah goal thun hnem ber dawttu a ni mek a, goal 56 a thun tawh a. Goal thun hnem ber chu Raul niin goal 71 zet a thun tawh a ni.