NORTH EAST DERBY-AH AIZAWL FC IN LAJONG HNEH

Hero I-League khelh mekah vawiin khan Rajiv Gandhi Stadium-ah North East derby khelh a ni a, Aizawl FC chuan an mikhual Shillong Lajong FC cu 2-1 in an hneh a, khelh thumah point sarih an hmu ta.
He inkhelah hian Aizawl FC tan Lalruatthara leh Jayesh Rane te chuan an thun a, Lajong tan Aizawl FC player hlui Yuta Kinowaki chuan penalty atangin a thun ve bawk. Tin, Aizawl FC midfielder Mahmoud Al Aman chu hero of the match atan thlan a ni a, game hnihah vawi hnih hero of the match a ni ta a ni.

Inkhel tlangpui:
Rajiv Gandhi Stadium-ah hian team pahnihte an inbeitawk hle a, minute 32-ah left back Ruatthara cross chu striker Alfred Kemah Jaryan chuan mawi taka lo khengin Lajong defender leh goalkeeper ten an lo dan hnuah Ruatthara hian chuang zetin a pet lut a, Aizawl FC in hma an hruai.
Lajong lam hian bul an tan tha in minute nga lekah penalty an hmu a, hei hi Fabio Pena chuan petin Aizawl FC goalkeeper Albino Gomes chuan tha zetin a lo dang a ni. Chawlhlawk zawhah Lajong hian bul tan tha zawkin an nawr bet deuh reng a, mahse, counter attack-ah Amna chuan ball tha la in Jayesh Rane tan ball tha a pe a, hei hi defender pahnih a bum hnuah petin defender ten an lo tawh kawi avangin Lajong goalkeeper Vishal Kaith tan tihngaihna a awm lo a, an goal hnih na a lut leh.
Aizawl FC in an goal an veng tlang mai dawn emaw tih hnuah minute 84-ah Yuta pet chu Kingsley Eze chuan lo dangin an intawhna lamah referee chuan penalty a pe leh a, hei hi penalty tur niin a lang lo. He penalty hi Yuta chuan petin a pet lut chiang hle a, amaherawhchu, a tawp thlenga goal dang a luh belh loh avangin Aizawl FC an chak ta a ni.

A chung berah Aizawl FC:
Aizawl FC in game thumah point sarih an hmu ta a, tun dinhmunah chuan a chung berah an awm mek. Vawiin tlai dar 4:30 hian Mohun Bagan leh Minerva Punjab te an inhmachhawn dawn a, hemi result azir hian an dinhmun a danglam leh thei ang. Aizawl FC hian Minerva Punjab an hmachhawn tuma khel chhe tak striker Kamo Bayi chu squad-ah an dah lo a, defensive midfielder a khel tha em em mai Alfred chu striker-ah dahin a aiah H. Lalbiakthanga chu luhtir a ni a, a khel chhe lo.
Game tantirah Aizawl FC tlarhnung a buai a, a bikin Kingsley a positioning leh timing a tha tawk lo a, Lajong in game an thunun a tih theih. Mahse, tlarhnung an insiamtha thuai a, an game pawhin hma a sawnin goal pawh an thun ta mai reng a nih kha. Goal an thun hnu lawkah Amna pass tha tak mai chu Albert Zohmingmawia chuan uiawm takin a thelh a, Chawlhlawk hnuah an beh laiin Alfred hian Bta puiin a let a, striker mumal awm lo chungin goal an thun leh tho.
Goal hnihna an thun hnuah Albert through ball tha tak mai chu Jayesh chuan a lo thunun tha tawk lo a, a uiawm hle. Hemi hnu lawk pawh hian Ruatthara cross tha tak mai chu Amna chuan la in H. Lalmuankima (MKA) a pe a, goal ngei tura ngaih nimah se a thun lo leh hlauh.
A tlangpuia thirin AIzawl FC an khel chhe lo a, an tlarhnung a phui tha in goalkeeper pawh a rintlak hle. An tlarhmaah striker tha tak an mamawhna a lal danglam lo a, winger pahnihten beisei an phak lo leh thin bawk. A bikin MKA a tangkai lo a, coach in a thlak har thin. Albert pawh mual laiah a lut nasa a, a tangkai tur angin a tangkai lo thin niin a lang.

 

Lajong buai chhunzawm zel:
Lajong hian tun I-League ah chak an la nei lo a, point an la hmu lo chhunzawm zel. Vawiin inkhelah pawh khan a khel tha zawk nih chang ngah mah se goal an thun hleithei lo a, penalty vawi hnih hmu in vawi khat chiah an thun avangin chak thei dinhmuna ding tur an chak lo kan ti thei ang.
Anni hian chance an nei lo a ni lo a, penalty an miss hnuah pawh Yuta, Dipanda leh Fabio te inkawp chuan goal an thun thelh a, Issac cross, Fabio tauh luh lohte kha a uiawm hle bawk.
Anni hian Mizo player an chhawr nasa a, vawiina captain pawh kha Isaac Vanlalmalsawma Chhakchhuak niin Zodingliana nen atir atangin an lut a, substitute bench atangin Samuel Lalmuanpuia leh Jacob Lalrawngbawla te an rawn lut bawk.
Khelh thuma point hmuh miah loh hi buaina tham a tling a, insiamtha leh tur chuan an beih nasat viau a ngai ve ang.

Ruatthara- Zero to Hero:
Vawiin inkhelah left back Ruatthara a langsar hle a, minute 5 lekah Redeem Tlang titlu in penalty a chawi a, a hnu lawkah yellow card hmu in ball pass sual leh tihsual a ngah avangin a khel tha lo hle. Mahse, a game rawn siam danglamin goal hmahruai a rawn thun a, an chakna kawng sialtu pawimawh tak a ni.
Club hlui lakah Yuta’n goal thun:
Aizawl FC midfielder hlui Yuta Kinowaki a rawn inlan a, Shillong Lajong jersey a ha thung. Ani hi a khel chhe lo a, penalty atangin an goal neih chhun a thun bawk.

Tute nge khel?

Aizawl FC: Albino Geovanni Gomes, Kingsley Obumneme Eze, Lalrinzuala Khiangte, Zohmingliana Ralte, Mahmoud Al Amna, Albert Zohmingmawia (Ashutosh Mehta 71’), Jayesh Rane, H. Lalmuankima (Laldanmawia Ralte 90’+5), Alfred Kemah Jaryan, H. Lalbiakthanga (Lalthakima 90’+3), Lalruatthara.
.
Subs: Zothanmawia, Lalnuntluanga, Lalnunpuia Tlau, Laldanmawia Ralte, Lalthakima, Ashutosh Mehta.
.
Shillong Lajong FC: Vishal Kaith, Nimdorjee Tamang, Chinglensana Singh Konsham, Zodingliana (Jacob Lalrawngbawla 29’), Fabio Henrique Pena (Samuel Lalmuanpuia 75’), Aser Pierrick Dipanda, Isaac Vanlalmalsawma Chhakchhuak (Alen Deory 67’), Sandeep Singh, Redeem Tlang, Pritam Kumar Singh, Yuta Kinowaki.
.
Subs: Phurba Tempa Lachenpa, Rupert Nongrum, Samuel Lalmuanpuia, Hardy Cliff Nongbri, Jacob Lalrawngbawla, Alen Deory, Bipin Singh.
ZoFooty Statistics:
Aizawl FC 2-1 Shillong Lajong FC
(Lalruatthara 32’, Jayesh Rane 64’) (Yuta Kinowaki 85’ Pen)
45% Ball Possession 55%
15 (5) Shots (On Target) 9 (4)
193 (151) Pass (Completed) 148 (126)
20 Fouls 13
1 Offside 1
4 Corner Kick 5
1 Yellow Cards 3
0 Red Cards 0
Hero of the match: Mahmoud Al Amna (Aizawl FC)
Powered by Darchiauva Hardware, Mission Veng

Posted in Aizawl Football Club, I-League.

Leave a Reply

Or