NorthEast Derby Preview : MPL best forward MK-a

I League champion Aizawl FC tantu ruhkawl an awm chho zel a, veng thenkhatah chuan Aizawl FC flag hial zar chhuak an awm ta. Football zun zam hian Mizote a fan chho zel a, Aizawl FC hian amahni tantute ruhkawl bik chu a theih chinah duhsak zel se tih hi kan bul tanna a ni.

Kan thupui tur erawh Mizoram Premier League Season 6 khelh zawh taka best forward atana thlan H. Lalmuankima a ni a, NorthEast Derby tur thlir lawk tel chungin Bawngkawn tlangval kan zirchiang dawn a ni.

MK-a hian MPL khelh zawh takah khan minute 963 inlanin goal nga a khung a, vawi 10 starting eleven changin chung zinga vawi ngaah chuan a khel tluan a, hei bakah hian vawi li chu bench atangin a lut bawk. Statistics atanga thutlukna siam nghal erawh a fuh lo.

Bawngkawn tlangval hi kumin Santosh Trophy-ah khan Mizoram aiawha khel tura koh a ni a, amaherawhchu a mit zai tir a duh avangin kohna a hnawl. Aizawl FC an rawn lang a, I League khelh a châk leh tak si avangin Mizo club a zawm a, champion team zinga mi a ni. MFA lam tehna atang chuan MK-a chhuanlam a siam chu a dik ta lo a, hei vang hian MPL match hmasa pahnih khel thei lo tura hrem a ni.

Aizawl FC-in foreign coach Paulo Meneses an nei a, system thar a nih avangin match hmasa pahnih khel thei lo MK-a’n coach hmin turin hun a mamawh hnem hle. Round 8 thlengin vawi khat mah a khel tluan lo a, phase 1-ah vawi khat chauh inkhel bul a tan bawk. Portuguese coach-in Mizo winger tha hi a hre fuh lawk lo a, a hriat fuh hnuah erawh a ring hle. Phase 2-ah thung chuan semifinal an luh chian tawh hnuah Ramhlun North an hmachhawn tumin a awltir a, a khelh tluan loh tum pawhin minute 80 hnu lamah vek a thlak.

MK-a hian MPL6-a goal nga a khung zinga goal li hi a ke vei lam hmanga a khung a ni a, tum khat chauh hi a ke dinglama a khung a ni. Goal a khung tumah hian Aizawl FC hian a hmasa paliah hnehna an chang vek a, semifinal-a a khung tumah erawh Mizoram Police nen 1-1 in an inhnehtawk a, hemi tum hian penalty atangin chakna goal cool takin a khung bawk.

Aizawl FC-in semifinal an luh theih chhanah MK-a hi a tangkai a, final an luh theih nan erawh player pawimawh bik a ni. Police nena an inkhelh tum anga I League-ah a khelh chhunzawm theih chuan Mizo club tan chelh a har khawp ang.

MK-a hi vei lama pet a nih avangin mual vei lamah a inlan tam zawk thin a, a tlan chakna leh beih hram hramna te hi a tha bikna a ni a, hmasawn ngaihna lai erawh a ball khawih a fimkhur tawk lo thin hi a ni a, lak dam thlap hun leh lak per hun hi a thliar hrang fuh tawk thin lo. Engpawhchu nise tun dinhmunah chuan Mizo winger tha ber zinga mi a ni tih chu MPL6 best forward atana thlan a nih atang hian chiang mai awm e.

Aizawl FC jersey number 21 MK-a hi lo chhinchhiah ula, in en zawhah comment lamah in hma leh in en zawhah in hmuh dan comment lamah hian in rawn dah ve dawn nia. Han belh leh hram ila, MK-a hian Aizawl FC club bakah Luanmgual FC, Chanmari FC leh Chhinga Veng FC tan te a khel tawh a, I League-a an khingpui Shillong Lajong tan te pawh hian a khel tawh a ni.