North East Games a tel tur Mizoram Football Team chuan tukin khan A.R. Lammual-ah practice hnuhnung ber an nei a, ZoFooty pawn he hun hi hmang remchangin Mizoram players thenkhat leh Coach kawmna hun kan han nei a. Tun post-ah hian Manager T.Vanlalhuluna kawmna bakah Mizoram team squad kan rawn tarlang phawt anga. Post dangah players kawmna kan rawn dah ang.
Mizoram Manager Pu T. Vanhlalhluna kawmna:

Inpuahchhahna
Kan inpuahchhahna hi tlang taka sawi chuan a tha tawk lo, rei chu a rei khawp mai. Ni 6-14 Ferbruary chhung khan non-residential in training kan neihpui a, ni 15-25 February chhung khan camp kan nei leh a. Chuan ni 27 February atanga 12 March thleng T.Ao Trophy khelin kan zin chhuak a, kan rawn thleng hnu hi chuan non-residential in training kan chhunzawm.

Team dinhmun
Senior player an tam lova, Aizawl F.C. leh Luangmual F.C. ten I-League an khel a. Police Meet a lo awm bawk nen player kan thlan theih chin chu an tlem deuh a, mahse kan thlan chinah chuan kan lungawi khawp mai, chubakah police player rawn khel thei an awm leh bawk a. T Ao Trophy-ah khan players 20 kan hruai a, tunah hian 18 chiah a ngai tawh sia. Inhliam an awm bawk nen mi paruk aiah pali kan la leh a ni.

Team Chakna leh Chaklohna
Team balance a tha a, an tangrual bawk. An thawhhona a that hi kan thatna ber a ni, Sikkim kan zuk kal pawh khan kan attacking a na khawp mai.

Defensive Midfield mal din tur kan neilo hi kan that lohna lai ber chu a ni. Hei vang hian 4-4-2 pawh kan hmang ngam lova, defensive midfield pahnih awm theihna 4-2-3-1 formation kan hmang deuh ber.

Tumpui turte
Sikkim an rawn kal thei dawn lova. Assam an khelh theih dawnlo bawk avangin Meghalaya, Manipur, Arunachal, Tripura leh keini chiahin kan khel dawn tihna anih chu.
Meghalaya: Anni hi team tha tak an ni a, an rang a, an solid a, experience player 6 (Santosh leh team tha Lajong etc) a lo khel tawhin an tel pui a. T.Ao ah pawh khan an vanduai a ni.

Manipur: Manipur pawh hi Meghalaya ang thovin an tha a. An ni chu an rei tawh avangin khelh dan nghet an nei tawh a, north east ah chuan anni hi football khawvel-ah chuan hnam upa an nia, Brazil, Germany te an chhiat tak tak theihloh ang hian an chhe thei lova. Tun tumah pawh hian an tha ang. Sikkim-ah khan an vanduai vangin a thlengtu Sikkim kha an hneh ta lo a ni.

Tripura: Anni hi kan tawng mawilo ni lo se, national level hi an fight ngai meuh lova. Mahse Northeast erawh hi chu an ti tak tak thung a. An game hi hit and run kan tih ang chi kha a ni a, an defender ten attack an pui ngai lova. An game a luh hi a awl phian a, anni tum dawn chuan muttuilohna tham chu a ni tho mai.

Arunachal Pradesh: Team tha a an ni lova, an la naupang a. An coach pawh tuna kan coach Zara te batchmate a ni a. Mahse an fit tha khawp mai.

Fans lam te
Khelhna hmun a zir a ni mai. Lammual-ah tlai dar 3 vela kan khel anih chuan entu an tam viau ang. Mahse a hun a fuhlo erawh chuan entu an tlem thei tho bawk.

Lawmthu sawina leh Sawi belh duh
3:16 Solution in kan Camp lai khan TV an rawn dah a, Zonet Connection an rawn ti nghal bawk a. An chungah kan lawm takzet a ni.
Northeast Games hi Northeast Festival tih thin kha a nia, tuna Northeast Games anih hnu pawh hian ni li chhungin zawh vek a ngai a. Ni khatah match 2 te khel a ngai a, hun a chep lutuk a, hei aia rei deuh hi chu ni thei se chu ka ti khawp mai.
KAWMNA HUN THA TAK MIN PEK AVANGIN KAN LAWM TAK MEUH MEUH E

Mizoram Team Squad

Manager: T. Vanlalhluna
Coach: H.C. Zarzoliana