Inrinni zana Premier League inkhelah Chelsea chuan Norwich City an hneh zo lo a, point 2 uihawm tak an hloh.

Tutenge khel?

Norwich City in an mikhualte hi striker pahnih hmangin an lo mikhual a. 4-4-2 in an inrem. Chelsea squad-ah defender thar Gary Cahill hmuh tur a awm lo bawk.

Norwich City(4-4-2): Ruddy; R Martin, Ayala, Whitbread, Naughton; Pilkington, Johnson, Fox (Crofts 79′), Surman; Holt, Morison (Jackson 79′)

Chelsea(4-3-3): Cech; Bosingwa, Luiz, Terry, Cole; Ramires, Lampard (Malouda 37′), Meireles (Essien 79′); Sturridge, Torres (Lukaku 77′), Mata

First half-ah a goal lo

Inkhel ṭantirh lamah team pahnihte an inhnehtawk hle a. Chelsea in passing game khelin leiah ball an dah tam a, Norwich in long ball an vawrh hnem thung. Team pahnihten an duh angin ball an chang tam thei lo ve ve a, Chelsea tân dinglamah Daniel Sturridge a lansarh tluk zetin Norwich City striker pahnih Grant Holt leh Steve Morison te an hnawksak ve bawk. Holt leh Morison te hian penalty box pawn aṭangin vawikhat vel ve ve goal shot ṭha tak an nei a ni.

An inkhel rei tawlh tawlh a, Chelsea midfieder ten ball an hmu tam tial tial a. Minute 27 ah Torres chuan a kephahchungin mawi zetin goal ah a pet a, mahse Norwich keeper in a kuthmawrin a lo khawih ‘out’ hman chiah chiah. He goal hi lût se a mawi awm mange.

First half-ah hian tun season-a Chelsea top scorer Frank Lampard chu inhliam vangin thlak a ngai a, a aiah Malouda rawn lutin veilamah a tlân a. A hmaa veilama tlan Mata chu a laiah lut pheiin, Chelsea goal bawh a na sawt a tih theih awm e. First half tawp dawnah Juan Mata leh Ramires ten an pet goal teuh hle nghe nghe.

Second half ah Chelsea an teuh ral

Second half-ah Chelsea game a rang sawt a, goal ah pawh an hlauhawm sawt. Tlarhmaa Sturridge, Torres leh Mata te inkawp an thawkrim a, Norwich player ten ball an chang hleithei tawh lo.

Minute 60 ah dinglam aṭanga Bosingwa cross chu penalty box chhungah Torres chuan lo changin a lo pet out chiah chiah. Liverpool-a a ‘form’ tak tak lai kha chu nise a pet goal ngei ang. Minute 61 ah Mata chuan Chelsea move mawi tak khaikhawmin a pet goal teuh hle bawk. Chelsea hian a sir aṭangin an nawr nasa a, Ashley Cole te hovin cross ṭha tak tak vawrh lut ṭhin mahse Norwich centre back pahnihte an khel ṭha a, a bik takin Whithead a nghet kher mai.

A tawplamah chuan Chelsea pet goal tur Norwich City in an lo dang a ni ber a. Juan Mata chuan chance ṭha tak tak vawi 2 a neih a hmang ṭangkai lo. Huntawp thlengin goal a lût lo a, Chelsea in point 2 uihawm tak an hloh.

Chelsea hian game 22 ah point 40 hmuin palina an ni mek a, Norwich City hian point 28 an hmu tawh bawk.

Neuh neuh:

* Chelsea striker Fernando Torres hi game 15 chhung goal thun lovin a awm mek a, hei hi England-a football a khelh hnuah goal thun lova a awm rei ber a ni.

* First half-ah khan foul pakhatmah a awm lova, English Premier League-ah hetiang hi a thleng khât hle.

* He match hi tun season Premier League-a Norwich City in goal chhuah miah lo a minute 90 an khelh hmasak ber a ni.

* Chelsea hian hmahruaitu Manchester City point 11 in an pha lo tawh a, City aiin game 1 in an khel tam zawk bawk. Tunah inhliam vangin Frank Lampard an chân dawn bawk nen, champion turin an beiseiawm i la ti em?