Premier League gameweek 12 a match hmasa berah tunhnaia English team hmuhnawm ber tih ngam Arsenal an chak a, captain Robin van Persie goal 2 hmangin khualmualah Norwich City 2-1 in an hneh.

Inkhelh ṭan hmain Arsenal manager Arsene Wenger chuan, “Hremhmun aṭangin kan lo kir leh” tiin a sawi a. Ni e, he Arsenal team, season tir-a mite nuihzat ni ṭhin kha, tunah chuan England-a team form ber an ni tawh a, an game hnuhnung 12 ah vawi 10 chak  tawhin, team huphurhawm ber te zing ami an ni leh ta. Premier League-ah bik hian a zawnin vawi 5 an chak tawh a ni. He match hi Arsene Wenger enkawlna hnuaia Arsenal in away match an chak vawi 200 na chiah a ni bawk.

Line ups

Norwich City: Ruddy, Naughton, Russell Martin, Barnett, Tierney, Crofts, Johnson, Fox (Bennett 45′), Pilkington (Jackson 82′), Hoolahan (Holt 69′), Morison.

Arsenal: Szczesny, Koscielny, Mertesacker, Vermaelen, Andre Santos, Ramsey, Arteta, Song, Walcott (Djourou 93′), van Persie, Gervinho (Benayoun 78′) .

First half: Game inhnehtawk lo ah 1-1

Inkhel ṭan chiah aṭangin Arsenal an hlauhawm nghal a, second 40 lekah van Persie chuan chance ṭha tak a nei nghal. Norwich defender ten Arsenal winger tlanchak pahnih, Theo Walcott leh Gervinho te an dang hleithei lova, Arsenal game rang takah Norwich player te an hawihai a ni ber mai.

Minute 17 na a ni a, Norwich City long ball vawrh phei aṭanga Mertesacker tihsual aṭangin Steve Morrison chuan mual neitu tân a pet goal a, Norwich City in hma an hruai daih. Mahse Arsenal an buai chhunzawm lo. Goal an phurh hnuah hian an phûr ta sawt emaw tih mai turin an khel ṭha zui. Minute 27 ah mikhual lam hian an pet goal ta nge nge a, dinglam aṭanga Walcott ‘low cross’ chu pet goal reng mai Robin van Persie chuan hnai zet aṭangin a lo pet goal. Arsenal player te an khel ṭha tlâng a, a bik takin dinglama tlan Walcott a langsar kher mai. Norwich City defender Martin-a’n goal ngei ngei tawh tur nia lang vawi 3 ngawt goal line bul aṭangin a pet chhuak tih hian Arsenal in game an thunun zia chu a tichiang mai awm e.

First half-ah Arsenal in chance ṭha an nei nual chungin goal an thunbelh lo. Norwich City pawh an awm mai mai bik lova, Arsenal keeper tibuai tam lo mahse ‘half chance’ an nei ve nual. A pumpuia lakin first half a hmuhnawm thlawt a, team pahnihten attacking football rang tak min hmuhtir.

Van Persie, again

Second half tir lamah Norwich City game in hma sâwn hret mahse chance ngah zawk chu Arsenal tho an ni. Gervinho leh Ramsey ten pet goal theihna remchang ṭha tak tak an nei a, an vanneih ni chu nise an thun ngei ang.

Minute 60 ah Arsenal in goal 2 na an thun a, a pet goal tu chu Robin van Persie tho a ni. Alex Song chuan centre bulah ball a chang a, van Persie hnenah pe in ani hian keeper rawn tlanchhuak chu mawi takin a chip khum a ni. Hetiang goal hi striker ‘confident’ tân lo chuan thun theih a ni lo. Minute 65 ah Norwich City in Pilkington hmangin an siphurh an sut teuh hle bawk.

Arsenal in goal thun belh an tum a, Norwich City in point 1 tal hmuh an tum bawk a, a tawplamah team pahnihte an innawrtawn. Mual neitu lam hian striker 3 hmangin an nawr a, Arsenal an bet zawk mah. Chutihrualin counter attack-ah Walcott, van Persie te ho an hlauhawm thei hle thung. Goal dang a luhbelh lo a, Arsenal in point 3 hlu tak an hlawhchhuak leh a, an hmatâwngte khelh danin manager leh fans te a tilawm ngei ang.

Arsenal hian game 12 ah point 22 an hmu tawh a, Tottenham leh Chelsea te nen an point hmuh zat a inang mek. Norwich hian point 13 hmu tawhin table laihawlah an awm mek thung.

 The Unstoppable Van

Liverpool in Captain Fantastic an nei a, Arsenal chuan Captain Vantastic an nei thung. Tunlai chu Arsenal captain hi khawvela striker form ber a ni hial awm e. He Dutchman hian Premier League game hnuhnung 5 ah goal 10 tehmeuh mai a khung tawh a, kum 2011 chhungin Premier League-ah goal 31 a thun tawh!! A tih ang ti thei hi midang 4 (Alan Shearer, Thierry Henry, Ruud van Nistelrooy leh Les Ferdinand) te chiah an la awm a ni. Heng goal 31 thun tur hian game 29 chiah a mamawh nghe nghe.

Kumtawp hmain goal engzat tak thunbelh ang maw…