Premier League bul tan niah Liverpool in si thum faia an hneh tawh Norwich City chu Carabao Cup Round thumnaah an in tawng leh nghal a, tun hnaiah a tum hnih nan Norwich City khelmual Carrow Road-ah Liverpool an leng lut, English domestic Cup zinga ngaih hlut pathumna a ni bawk a team pahnih ten player rinrawl te dah tha in rawlthar te an kheltir nual. Liverpool in Minamino goal hnih leh Origi goal khat hmangin 3-0 in an chak leh ta a ni.
Norwich City 0-3 Liverpool FC
(Minanimo 4′, Origi 50′, Minanimo 80′)
INKHEL TE :
NORWICH (3-5-2): Angus Gunn; Ben Gibson, Grant Hanley, Andrew Omobamidele; Bali Mumba, Billy Gilmour, Lukas Rupp, Pierre Lees Melou, Dimitris Giannoulis; Adam Idah, Christos Tzolis.
SUBS: Kieran Dowell, Ozan Kabak, Tim Krul, Teemu Pukki, Milot Rashica, Jacob Lungi Sorensen, Brandon Williams.
LIVERPOOL (4-3-3): Caoimhin Kelleher; Konstantinos Tsimikas, Joe Gomez, Ibrahima Konate, Conor Bradley; Naby Keita, Curtis Jones, Alex Oxlade-Chamberlain; Takumi Minamino, Divock Origi, Kaide Gordon.
SUBS: Adrian, James Balagizi, Jordan Henderson, Diogo Jota, Tyler Morton, Nat Phillips, Andy Robertson.
MINAMINO A MAWI : Team pahnih ten player an siksawi nual a Norwich lamin kartawp Premier League a Watford an khelh tum a inkhel bul tan zingah Billy Gilmour leh Grant Hanley te chiah bul an tan tir a, chutiang in Liverpool pawh Crystal Palace an tum tum a bul tan zingah Tsimikas leh Konate ten bul an tan. Liverpool tan an Academy naupang Kaide Gordon chuan senior level a khelh vawi khatna atan bul tantuah a tang nghal a kum 16 chauh a ni.
Inkhel an tan a, player nei tha zawk Liverpool in ball an chang tam nghal a, corner vawi hnihna an hlawh chhuah chu mual veilam atangin Tsimikas chuan pet in Origi head chu minute 4-naah Japanese star Takumi Minamino ke-ah tla in a mawi takin a pet goal. Minamino hi season hmasaah Southampton lamah Loan in a chhuak a, Liverpool tan tun season a khelh vawi khatnaah goal a khung nghal a ni.
Minute 41-naah Liverpool rawlthar Conor Bradley chuan box chhungah Dimitris Giannoulis a tih tluk avangin penalty an chawi Norwich tan Christos Tzolis pet chu Liverpool keeper Caoimhin Kelleher chuan tha takin a dan sak a, first half-ah Liverpool in si khat faiin hma an hruai phah ta a ni.
ORIGI THIAM A LA THEIHNGHILH LO: Second half an tan chiah a Conor Bradley bawk a talbuai, a ho taka ball a hloh chu Norwich lamin hmang tangkai in nawr mahse Pierre Lees Melou chuan a pet over luah a, Liverpool an him hram. Liverpool in an nawr chhunzawm nghal a minute 50-naah Curtis Jones-a’n ball tawih taka Tsimikas ball a pek chu box chhungah tlanluh pui in a ball cross chu UCL an champion tum a Final leh Barcelona lama goal hming thang pet goal tu Origi chuan mawi takin a tauh goal a, sihnih faiin Liverpool in hma an hruai.
Minute 80-naah Liverpool tan Minamino chuan goal thumna a khung leh a, Ox nen one-two in penalty box chhungah a khalh lut in Norwich defender pahnih a paltlang hnuah cool takin a pet goal. Goal dang a luh belh lo a, 3-0 in Liverpool chak in Round lina an kai ta a, Norwich City erawh Premier League lamah theih tawp an chhuah zawm a ngai dawn ta a ni.
LIVERPOOL RESULT JURGEN KLOPP TAN LAWMNA: Liverpool player thenkhat Thiago, Arnold, Firmino, Neco Williams leh Elliot te inhliam mahse squad ala chhah tawk tih lantir nan tun nipui bazar a an hralh tak loh Origi leh Minamino ten goal khung thei player an nih an lantir thei a. An 3rd choice keeper Kelleher a khel tha tak zet a, penalty a save bakah goal zawn a pet vawi hnih/thum tha tak takin a dang thei bawk.
Rawlthar Gordon a naupan aia ngaihnep chi a nilo tih a lantir thei a, penalty chawitu Breadly pawh la naupang hle mahse zam mai lo in a khel tha chhunzawm telh telh bawk. Naby Keita thlaktu Morton pawh holding midfielder game tha takin a rawn khel chhuak thei a. Tsmikas hian Robertson la phak chiah lo mahse a theih ang chu a thei ve zel niin a lang bawk. Liverpool hi tun season a team hmuhnawm leh hlauhawm tak an nih chhunzawm zel a rinawm ta hle a ni.
