OLD TRAFFORD-AH ENNAWM MAK TAK – Lawmkima Hmar

Estimated read time 6 min read
Zanin dar 7:35 hian tunkar tawp English Premier League inkhel tura mit la berah Manchster United chuan Chelsea an lo mikhual dawn a, inkhel entu mi 74,994 lenna Old Trafford-ah ennawm mak tak thlir tur a awm ang.

Boruak nei lian zinga pakhat chu Red Devils boss khabe chheh thiam Mourinho hi a ni a, tum hnih lai Chelsea enkawl tawhtuin a club hlui a lo hmachhawn tur hian inkhel entuteah ‘engemaw tak beiseina’ a siam!

Master of Defensive : ‘The Special One’ inti ngam ngat Mourinho hi defensive game khelhpui thiam bera chhal mek niin an goal venhim na’n defensive game chi khat, player ven bik nei lo va, mual chhung venlai tur (area) bik neia goal venhim ‘Zonal Marking’ hmang tangkaitu a ni. Inter Milan a enkawl lai kum 2010 a Champions League title a lakpui kum a, semi-final a Barcelona aggregate 3-2 an hneh tuma a defensive game khelh dan phei kha chu tun thleng hian coach tam takin inzir na’n an la en fo thin.

Defensive game-ah chuan Zonal Marking a ni emaw Man Marking emaw pawh nise hmang thiam em em hian tlawm ai chuan tiin an goal hmaah bus a hung leh ang em?

Manchester United tantu tam tak chuan a contract pawtsei zo hlim Mourinho hi an ei lo! A chhan chu attacking-ah pawh winger leh side-defender te hmang tangkaia ‘wide attacking’ khel thin, an chhiat lai ber pawha goal hmaa inhnawh tup tup duh ngai lo, Sir Alex Ferguson-a hnuaia, “Defensive game khelh dan tha ber chu attacking game khelh a ni,’ tih than hnantute hian game dawihzep khelh an duh lo.

Mahse, kum 1992 a English coach Bobby Robson-a’n Benfica a enkawl lai atanga a tawng lettua a hman, FC Porto leh Barcelona a enkawl hnu thlenga tawnglettu rinawm ni zel hian football a point khat hlutzia a hrechiang a, huaisen taka tlawm ai chuan dawihzep chan changa point hlawhchhuah a thlang zawk. Table-ah ‘0’ aia ‘1’ in awmzia a neih thui dan a hai lo.

Back Three : Italian coach Antonia Conte hi khawnvartui pawl hmaa Italy in an uar em em, defender 3 (back three) rawn ching lar lehtu a ni a, season liam ta khan he formation hlui herlum hmang hian a season khatnaah Chelsea chu Premier League title a lakpui.

Conte hman thiam 3-5-2 formation-ah hian defender 3 hman an nih thin avangin defender an rintlak a ngai zual a, side defender (full-back) kan tih maite chuan hna hnih kawpin winger leh full-back nih an fawmkem a. Nawr a tul hunah winger anga nawrin goal venhim a tul hunah side defender angin an che leh mai thin.

He formation-a hian defensive midfielder chu counter-attack ven a ngaih avangin an tawlh hnung zual a, centre defender hma chiahah awmin ‘sweeper’ hna an thawk thin. David Luiz leh Roma defensive midfielder De Rossi te hi he role play tura rintlak tak an ni.

Hman ata tawh Italian hovin hmang mahse Serie A tih lohvah chuan hman zui a hlawh lutuk lo va, kum 2012 Euro-ah khan Italy coach Cesare Prandelli chuan rawn chawi nungin he formation hmang hian final a thlenpui a, final-ah erawh 4-0 in Spain an hneh ta lo.

Juventus a enkawl lai khan Antonio Conte hian hmang fuhin Chelsea thlengin a rawn chhawm a, club dang pawhin an ching ta viau. Kum 2014 World Cup-ah khan Italy bakah Chile leh Mexico khan rawn hmangin Mexico leh Cameroon an inhmachhawn tum phei kha chuan Africa chhuanvawr ram hian Mexican wing-back te dan chah ngaihna an hre lo a nih kha.

Defender 3 hman hi a fuhna tam tak awm mahse midfielder ball sem thiam leh fing (creative midefielder) awm lohna tactic a nih avangin ball chan tam a har fo va, tin, lehlamin striker 2 emaw 3 emaw an hmanin talbuai a awl hle. Tun season Premier League-a Manchester United leh Arsenal inhmachhawn tum khan Mourinho chuan hmangin The Gunners back-three an ching phar hle a nih kha.

Inhliam leh dam : Manchester United midfielder Ander Herrera chu kar laihawl Champions League a Sevilla an hmachhawn tum khan inhliamin a chawlh rih a ngai dawn a (media thenkhat erawh chuan a khel thei dawn niin an tarlang thung!).

Nikum November hnu lama a vawi khat na’n Eric Bailly chu a inlan thei dawn a, hetih mek lai hian inhliam sa Marouane Fellaini, Zlatan Ibrahimovic, Daley Blind, Marcos Rojo leh Phil Jones te hmel erawh mual chhungah hmuh tur a awm lo vang.

Chelsea lamah inhliam tharlam an awm lo va, inhliam sa David Luiz, Tiemoue Bakayoko leh Ross Barkley te chu inkhel entua an tan a ngai rih dawn.

Chhinchhiah atan :

*An intawn hnuhnung 14-ah Manchester United hian vawi khat chiah hnehna changin nikum khan Old Trafford-ah an lo hneh (W1, D5, L8)

*United hian Premier League-ah vawi 18 zet Chelsea hneh tawh lovin goal 67 an chhuah tawh a, EPL club laka goal an chhuah tam berna a ni.

*Chelsea hian Old Trafford-ah goal thun an harsat a, he hmuna Premier League game 4 an khelh hnuhnunah goal khat chiah thunin chu chu kum 2014 October thlaa Didier Drogba goal thun kha a ni.

*May 2013 a Chelsea in Old Trafford-a 1-0 a hnehna an va chan hnu khan team pahnihte intawn tumah mikhual team zawkin hnehna an la chang leh ta lo.

Manchester United :
*United hian tun season Premier League match an muala vawi 13 an khelhah goal 5 chiah an la chhuah.

*Jose Mourinho hian Manchester United a enkawl hnuah an mual hmanthiamah hian competitive match 49 khelhpui tawhin vawi 2 chiah an la tlawm a, an hneh loh hi Manchester City ve ve a ni.

*Mourinho hian United a enkawl hnuah vawi 3 lai Chelsea a hneh tawh lo va, Premier League club zinga a ngam loh ber an ni mek.

Chelsea :
*The Blues chetchhiat a chhuak a, khual muala an match hnuhnung 9 ah vawi 2 chiah hnehna an chang (D4, L3).

*Chelsea hi tun season Premier League-ah vawi 6 tlawm tawhin season liam ta khan vawi 5 chiah an tlawm.

*Antonio Conte hian vawi 5 an intawn tumah te Mourinho hi vawi 3 hnehin vawi khat a hneh lo.

*Eden Hazard hian Premier League a khelh hnuhnung 6 atangin goal 6 a thun.

*Pedro hian Jose Mourinho club enkawl lamah goal 7 thun tawhin goal 11 thuntu Messi tih lohva Mourinho ngam ber a ni!

07:35PM – Manchester United vs Chelsea (Star Sports Select 1)
C Tlanthianghlima

Football tui ve tak

You May Also Like

More From Author

+ There are no comments

Add yours