OLD TRAFFORD-AH KAWR PAWL AN CHUNGNUNG – Lawmkima Hmar

Beiseilawk ang ngeiin mikhual kawlhrawng rual, player tuanrang leh ball thiam City player ten bul an tan tha a, a tira atanga inkhel thununin a chanve an zo va, a tawp tha takin an khar bawk.

Old Trafford-a Premier League palian pahnih inchaltuahnaah hian hunawl leh hmunawl a tlem a, chawlhlawk hma lawkin City hian goal an thun, United striker man to Romelu Lukaku chuan corner atanga ball kal chu City Spanish midfielder David Silva bulah a tauhthlak sak a, ani hian hnai set sawt atangin a hlap goal. Jesse Lingard awm hnufual hlauh lo se chuan offside an phar ngei ang.

United in an nawr let a, pressure sang tak an pek avangin City tlarhnung an talbuai a, Nicolas Otamendi leh Fabian Delph te che pherhin Delph hian ball clear thelhin sakeibaknei patuai Marcus Rashford-a lawmah a tla a, hun pekbelh hnu minute 45’+3 ah an si phurh sut na’n a hmang.

Second half-ah Argentine defender Otamendi chuan rinloh takin goal a thun; an goal khatna luh kawnga mawhphurtu lian Lukaku bawk chesual nawnin a ball clear sual atangin an goal hnihna hi an chhuah.

Reds Devils erlet a na a, mahse, City keeper Ederson a tangkhawng hram hram; a hmingchhiatna thupbo na’na goal thun mamawh Lukaku pet leh hun tawp hnaiha Juan Mata pette tha zetin a lo dansak.

Lukaku tan ni lawmawm a ni lo va, an lama goal hnih luhna kawnga demrawn hlawh tur a nih bakah goal dang an thun loh chhan lian ber a ni, a hun tha khawhral a uiawm zual. Bei nge sei rundung tia penalty area-a Otamendi laka tlu der Ander Herrera chuan yellow card a chawi bawk.

Tun season-ah City an tluang a, hneh theih an nihzia lang thin mah se, vanneihnain a hlat lo va, point 11 zeta hma an hruai tawh avangin khelh hmabak la tam mahse, season tawpa a chung bera awm tura hual awm ber an ni tawh.

December hi Premier League-a player te fit vanglai a nih avangin match a tam a, chawlh awm vak lovin khelh chhunzawm lehnghal a ni ang. Karlaihawl Manchester City hian Swansea City an tlawh dawn a, Manchester United hian Bournemouth an lo mikhual thung ang.

Match Statistics

35% Ball Possession 65%
8 Shots 14
5 Shots on Target 7
2 Corners 8
16 Fouls 10