Inrinni zanah Olympics mipa football tournament quarter final khelh a ni a, a thlengtu Great Britain chuan penalty shoot-out ah South Korea hneh lovin an tla. Hetihlai hian champion tura rinkai ber Brazil chuan Honduras an hneh a, he inkhelah hian Honduras in darkat khat vel zet player 10 in an khel a ni. Semi final ah Brazil leh South Korea te hi an intum ang.

Quarter final match dangah Mexico chuan extra time ah Senegal an hneh a, Japan in Egypt an sawp bawk. Egypt player in first half ah red card a hmu a ni. Mexico leh Japan te hi semi-final ah an insu dawn a, July ni 7 (Thawhlehni) ah semi final hi khelh a ni ang.

Semi final fixture:

Mexico vs Japan. August 7, 9:30 pm (IST)

Brazil vs South Korea. August 8, 12:15 am (IST) (Thawhlehni zanrei, Nilaini zing a nih chu. Champions League chhuah hun vel)

Brazil an chak hram

Brazil hian Honduras hi hneh chiang sa tura ngaih an ni a, a khelh ah chuan a hneh pawh an hneh khawp mai. Mahse Mario Martinez chuan minute 12 lekah Honduras tân a pet goal a, 1-0 a ni der mai. Brazil in dan pangngaiin an game mawi tak hmangin an nawrlet a, minute 33 ah Honduras player Crisanto chu yellow card pahnih a hmuh avangin hnawhchhuah a ni a, minute 38 ah Leandro Damiao chuan Brazil tân a pet goal zui bawk.

Second half ṭan a ni a, Honduras bawkin an pet goal hmasa leh a. Minute 48 lekah Roger Espinoza chuan mawi zetin goal a thun a, a hnu minute 3 lekah Neymar chuan penalty aṭanga pet goal in Brazil siphurh a sût zui. Brazil chakna goal hi Pato aia lût Leandro Damiao-a’n minute 60 na-ah a thun a ni.

Inkhel tawplamah team pahnihte an ‘fet’ dun angreng khawp mai a, yellow card pawh engemawzat phawrh niin, minute 90 ah Honduras player Espinoza chu hnawhchhuah a ni bawk. Chelsea player thar Oscar che vel hmuh a nuam. Neymar ball thiam zia kan hmu leh a, a tlu ngun deuh erawhin mit a tikham lek lek fo. Brazil an khel ṭha a, goal an chhuah leh khut ṭhin erawh a pawi thui teuh hle.

Brazil 3 – 2 Honduras
Brazil: Leandro Damiao 38′, 60′, Neymar 51′
Honduras: Martinez 12′, Espinoza 48′

A thlengtu an tla

Inkhel inhnehtawk takah South Korea chuan Great Britain an hneh a, semi final a Brazil hmachhawn turin an inpettling. Millenium Stadium-a inkhelah hian Korea in minute 29 ah Dong Won-Ji hmangin hma an hruai a, hei hi Aaron Ramsey chuan penalty aṭangin a sût. Team pahnihte an inhnehtawk khawp mai a, goal thunna chance pawh an nei nual ve ve. Ramsey hian first half tâwp dawnah penalty a ṭhelh bawk.

South Korea in bul an ṭan ṭha a, goal pawh an thun hmasa a. Second half-ah erawh Great Britain an khel ṭha zawk. Hun pangngaiah goal a luhbelh lo a, extra time thlenga chak zawk an awm theih loh avangin penalty shoot-out hmanga chak zawk zawn a ni a. South Korea lamin an pet goal vek laiin Daniel Sturridge pêt chu Korea keeper in a lo dang a, 1-1 (5-4) in South Korea hi an chak ta a ni.

South Korea: Dong Won-Ji 29′
Great Britain: Aaron Ramsey 36′

Japan in semi final an pan

Olympics 2012 mipa football semi final a Asia ram pahnihna ni turin Japan chuan 3-0 in Egypt an sawp a, Old Trafford-a inkhel hi mi 70, 000 chuangin an en a ni.

Japan hian minute 14 ah Kensuke Nagai hmangin goal hmahruai an thun a, first half tawp dawnah Egypt player in red card a hmuh avangin ‘Blue Samurai’ ho hian inkhel an thunun a, a bik takin second half-ah an chungnung hle. Minute 78 ah Maya Yoshida chuan Japan goal hnihna thunin, minute 83 ah Yuki Otsu chuan lungthu a kim a. Huntawp dawnah Egypt player Alla Edin chu a inhliam avangin a khel chhunzawm thei lo a, substitution an siam zawh tawh avangin a tawplamah chuan player 9 chiahin Egypt hi an khel ta a ni.

Japan hian Olympics 2012 ah goal an la chhuah miah lo bawk.

Japan 3 – 0 Egypt
Japan:  Kensuke Nagai 14′ , Maya Yoshida 78′, Yuki Otsu 83′

Mexico in Senegal an vel

Mexico in 2-0 in hma an hruai reng a, Senegal in an sût zo leh vek a. Mahse extra time ah Senegal player te tihsual vangin Mexico in goal hnih an thun a, 4-2 in an chak ta a ni. He match hi Wembley Stadium-ah nghah niin, entu hi mi 81, 000 vel an ni.

Mexico 4 – 2 Senegal
Mexico: J.Enriquez 10′ , J.Aquino 62′, Giovanni dos Santos 98′, H.Herrera 109′
Senegal: Moussa Konate 69′, Ibrahima 76′ 

Thawhlehni-a semi final ah Brazil leh South Korea an intum ang a, Mexico leh Japan an intum bawk ang. London Olympic Games Men’s Football Tournament final-ah All-Asian final kan hmu lo ang tih a sawitheih loh.