Pa mak Bielsa

Kum 16 hnuah Leeds United in season tharah Premier League an khel leh dawn tih kan hre tawh a, kum 2017 – a he club leitu Italian sumdawng hausa Andrea Radrizzani leh an director of football Victor Orta te hnathawh sawi nep theih a ni lo.
 
Tun tumah erawh Championship – a Leeds United champion puitu manager Marcelo Bielsa chanchin ngaihnawm zual kan thlur dawn a ni.
 
Tunge Bielsa ?
 
Bielsa hi a hming pum chu Marcelo Alberto Bielsa Caldera a ni a, Argentine pachal kum 64 a upa a ni. A vanglaiin football khel ve thin mahse a hlawhtling lem lo a, kum 26 a nihin inkhelh chawlhsanin kum 1990 atang khan coaching lam a luhchilh ta zawk a. Club a enkawl tawh zingah Argentine club lar Newell’s Old Boys, Espanyol, Athletic Bilbao leh Marseille te an tel a, Argentina national team leh Chile a enkawl tawh bawk.
 
Bielsa hi a hminglemah ‘El Loco’ tih a ni a, chu chu saptawng chuan ‘mad man/the crazy one’ tihna a ni. Bielsa chanchin bultanna chu an khua Rosario – a club lar Newell’s Old Boys a ni a, kum 15 lek a nih laiin an in chhuahsanin he club training facility – ah hian a cheng. Player a nih lai leh manager a nih hnuah he club tan hian hun a hmang ve ve a, kum 2009 khan a Newell’s Old Boys stadium mi 42,000 lenna chu a hming chawiin Estadio Marcelo Bielsa tiin an thlak nghe nghe.
 
El Loco a piang…
 
Kum 1990 a Newell’s a enkawl laia an hmelma lian tak chu Rosario Central an ni a. Tum khat chu an inkhelh hma lawkin a defender kum 19 lek a upa Fernando Gamboa chu engtiang chiahin nge derby – a chak a duh tih a zawt a lawm mawle. Gamboa chuan phur takin a chhang a, mahse Bielsa chuan,“I kuttang pakhat i hleh bulh avang khan chak dawn ta ila i ti duh ang em?” tiin a zawt a, Gamboa chuan,”Chak ka duh avanga ka kuttang hleh bun a ngaih zel dawn chuan kuttang ka nei na’ng,” tiin a chhang a. Bielsa chuan a zawhna chu a man lo niin a hria a, mahse a tuka an inkhelah Gamboa chuan goal hmahruai thunin derby match -ah chuan 4-3 in an chak a ni.
 
A kum leh kum 1991 khan Newell’s hi Copa Libertadores – ah San Lorenzo chuan 6-0 zetin an sawp a. An fans ruhkawl (ultras) te lungawi lo chuan Bielsa chu a chenna inah an va pan ta theu theu mai. Zanlaiah Bielsa chu pawn a chhuak turin an au a, chutah grenade kengin Bielsa chu a rawn chhuak ! “In kal darh lo a nih chuan ka ti puak ang,” tiin an fans ruhkawl te chu a vau chher chher a ni awm e. He ta tang hian Bielsa hi ‘El Loco’ (mad man/the crazy one) tih a lo ni ta a ni.
Ram tan….
 
Kum 1999 kum tawp lam atanga 2004 thleng khan Argentina manager a ni a. Kum 2002 World Cup khan player tha tak tak – Roberto Ayala, Pablo Sorin, Walter Samuel, Gabriel Batistuta, Claudio Lopez, Juan Sebasian Veron, Diego Simeone, Ariel Ortega, Pablo Aimar leh Hernan Crespo te hruai mahse first round paltlang zo loin mualpho takin an tla a, hetih laia South American Footballer of the Year ni lai Juan Roman Riquelme a koh tel ve loh avangin sawisel a tawk nasa hle bawk.
 
Argentina hi kum 2004 Copa America – ah pahnihna a nihpui a, 2004 Olympics – ah  kum 52 hnua Argentina in Olympics gold medal a lak hmasak ber lakpui mahse kumtawpah he hna hi a bansan.
An ram team enkawl a chawlhsan hnu hian hmun hrang hrang atangin sawmna dawng mahse Bielsa kha a ni miau a, team dang enkawl lam a rilruah a lang rih lo. Catholic puithiam ho chenna convent – ah thla thum (3) zet phone emaw TV pawh nei loin a cheng daih ! Hetih lai hian football ziahna lehkhabu chauh a chhiar thin a, “A tawp lamah kha chuan keimah leh keimah ka inbia in ka hria,” a ti hial. Thla thum hnuah pawh football lam a kir ta mai lo chuan a farm – ah mi tlawhpawh mai mai loh turin kum thum (3) zet a inkhung hrang leh a, heng hun hi amah inenlet nan a hmang thin niin an sawi.
Tichuan kum 2004 kumtawp a Argentina manager atanga bang khan kum 2007 khan Chile national team enkawl turin a lo kir leh chauh a ni.
Pa mak chu…
Athletic Bilbao a enkawl laiin tum khat chu insaknaa thawk pa pakhat nen an inhau chiam mai a, he pa hian engtinmah ti zui lo mahse Bielsa rilru nuam lo chu police hnenah a inpe ngawt a ni awm e. Bielsa hi mi khawngaih thei leh mi tanpui peih tak niin an sawi bawk.
Leeds United a enkawl tirh hian a staff thenkhat chu an khingpui tur te training lai enthla turin a tir thin a, hei hi eng dan bawhchhiatna mah ni lo mahse thil dik lo a ngaiin Leeds United hi pound 200,000 chawitir an ni a. Hei hi Bielsa chuan a thiam loh a ngaiin ama pawisa atangin a pe niin an sawi.
Pa invawng tak ni mahse incheina a ngaina lem lo a, a khawsa awlsam hle. Chhungkaw hausa tak atanga seilian a ni a, a unaupa Rafael Biela hi politician niin Argentine Foreign Minister hlui a ni a, a farnu Maria Bielsa hi architect atanga politician ni chho ta, tuna Argentina sorkara Minister of Territorial Development and Habitat ni lai mek a ni.
Hetiang hi an dinhmun ni mahse Biela erawh Leeds, West Yorkshire  – ah hian bedroom pakhat awmna dawr pakhat chungah a khawsa ve naw naw a, ke hlirin training ground a pan a, ruahsur changa motor – a phurh an tum pawhin a duh ngai lo niin an sawi. A vahchhuhna reng rengah an club thuam bak thawmhnaw dang a inbel meuh lo a, a staff meeting pawh Costa coffee dawrah a neihpui mai thin. Leeds United kum 100 tlin lawmna zanriah an buatsaihah pawh mikhual dangte suit leh tie nen mawi taka an inchei laiin ani chuan an club tracksuit a ha ngat a ni !
Kum 2018 khan a club hlui Newells’ Old Boys in training ground thar an mamawh tih hriain pound maktaduai hnih ngawt a pe bawk.
Nikum lawk khan Bielsa leh Leeds United hi FIFA Fair Play Award hlan an ni a. Kum 2019 April thla Championship inkhela Aston Villa an hmachhawn tumin Villa player Jonathan Kodjia inhliam laiin Leeds hian Matheusz Klich hmangin goal an thun hlauh mai a. Bielsa hian a naute hnenah tuma chuh buai lohin Aston Villa chu an siphurh sut tir nghal turin thu a pe a, Villa hian an siphurh sut nghal mahse Leeds player pakhat Pontus Jansson chuan Villa player te goal thun tur chu lo tihbuai a tum a, season tawp rualin Bielsa hian a hralhchhuak hmak !
Bielsa hi mi tam tak chuan football khawvela inkhel en tam leh zirchiang  ber pawl niin an ngai a, screen pahnihah a rualin inkhel a en thin niin an sawi ! Kum 1997 – a an ram club Velez Sarsfield – a enkawl dawn khan a thusawi innghah nan press conference – ah video tape 50 zet a keng hem mai a, a player pakhat inneih naa a kal pawhin a inkhel lai video tape a la zakzeh hram niin an sawi. Kum 2018 nipui laia Leeds United in amah ber tura Argentina – a an zuk kal pawh khan an inkhel zawng zawng a lo en thin tih an hmuchhuak mai ni loin season tluana an khingpuite formation hman zawng zawng a lo sawi chhuak vek thei a, mak an ti hle.
A chanchina mite sawi ngun pawl tak chu a training pek dan hi a ni awm e. Player – te hi training ground – ah a tlantir vak vak a, an luah (vomit) hma chu a tlan tir char char mai thin niin an sawi. A player te hi a duat hliau hliau sawi tur awm lo mahse footballer tha leh lar Gabriel Batistuta, Mauricio Pochettino, Benjamin Mendy, Aymeric Laporte leh Diego Simeone te hian vawiin thlengin Argentine manager hi an fak bang thei lo a, an football zinkawnga mi pawimawh a nih thu an la sawi thin. Tun a football manager ropui ni ta Pep Guardiola hian coaching a luhchilh dawn kum 2006 khan Bielsa thurawn la turin mel 5,000 chuang zet zinin Argentina a zuk pan vang vang a, darkar 11 zet an inkawm.
Bielsa chanchina ngaihnawm tak bawk chu manager lar ni ta Mauricio Pochettino a lakluh dan hi a ni. Kum 1987 khan Bielsa hian Newell’s reserve team a enkawl a, Rosario Central tan a khel mek khatih laia kum 15 chauh a upa Pochettino chu player tha a nih thu an director of football Jorge Griffa hnen atangin a lo hria a. Bielsa hi zanlaiah Pochettino te inah hian a va kal alawm, a mu lai chu a blanket hlim sakin a ke chu ngun takin a ensak a, ‘footballer ke’ a neia a hriat avangin Newell’s – ah hian a lalut thuai a, Argentina national team thlengin an inzui chho ta zel a ni.
Tum khat pawh Chile a enkawl laiin an chak lo hreawm ti lutuk chu thinrim takin dressing room – ah a lut nghal a, saruakin darkar chanve a va mu ! Chile winger Mark Gonzalez chuan,” Tumah min be loin a lut a, room kan va thleng chu doctor in an zai dawn emaw tih mai turin dawhkanah saruak ngal ngatin a lo mu,” tiin a pu hlui chanchin hi a sawi.
Leeds tana a hnathawh hi eng ang tak a ropui nge tih chu a khaw mite chhanah dah ta ila, hei, an khuaa kawtthler pakhat chu ‘Marcelo Bielsa Way’ tiin an thlak dawn niin an sawi. Pa mak Bielsa hi contract thar an zawrh dawn niin a lang a, mahse tha taka an indawr loh chuan kum 2016 – a Lazio manager thar, transfer chungchanga club thuneitute nen an thu a inmil loh vanga ni hnih chauh a hna thawk hman bang leh ta daih kha tudang ni loin pa mak Marcelo Bielsa hi a ni tlat !